– ەلىمىزدىڭ وركەندەۋ جولىنداعى ءوڭىردىڭ ءاربىر تۇرعىنىنىڭ ۇلەسىن ماقتانىشپەن جانە اسقان قۇرمەتپەن اتاپ وتكىم كەلەدى. اسىرەسە, ارداگەرلەر قاۋىمىنا شەكسىز ريزاشىلىعىمدى بىلدىرەمىن. ءوز ىسىنە ادالدىقتىڭ ۇلگىسىن كورسەتكەن سىزدەرگە باس يەمىن, – دەدى جەڭىس قاسىمبەك.
ەل پرەزيدەنتىنىڭ جارلىعىمەن مەملەكەتتىك جانە قوعامدىق قىزمەتتەگى ەڭبەگى, ەلدىڭ الەۋمەتتىك-ەكونوميكالىق جانە مادەني دامۋىنا قوسقان ەلەۋلى ۇلەسى, دوستىق پەن ىنتىماقتاستىقتى نىعايتقانى ءۇشىن قاراعاندى وبلىسىنىڭ 34 تۇرعىنى ماراپاتتالدى. ولارعا «پاراسات», «قۇرمەت», ءىىى دارەجەلى «ەڭبەك داڭقى» وردەنى, «ەرەن ەڭبەگى ءۇشىن», «شاپاعات» مەدالى, سونداي-اق «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى, قازاقستان رەسپۋبليكاسىنىڭ قۇرمەت گراموتاسى تابىستالدى. ماراپاتتالعانداردىڭ قاتارىندا جۇمىسشىلار, كاسىپورىن-ۇيىم باسشىلارى, دارىگەرلەر, سپورتشىلار جانە وزگە سالانىڭ دا وكىلدەرى بار.
– بۇل – مەنىڭ عانا ەمەس, بارلىق ارىپتەستەرىمنىڭ ەڭبەگىن باعالاۋ دەپ بىلەمىن. ءبىز, اعا بۋىن وكىلدەرى ءۇشىن رەسپۋبليكا كۇنى – قازاقستان رەسپۋبليكاسى حالقىنىڭ بىرلىگى مەن كەلىسىمىنىڭ نىشانى, – دەيدى «ەرەن ەڭبەگى ءۇشىن» مەدالى يەگەرى, وساكاروۆ اۋدانىنىڭ ەڭبەك ارداگەرى «ريابينا» قب توراعاسى ۆلاديمير كوشەۆەتس.
سونىمەن قاتار سالتاناتتى جيىندا حيرۋرگ-ونكولوگ, مەديتسينا عىلىمدارىنىڭ دوكتورى, پروفەسسور قاني مۇسۇلمانبەكوۆكە, قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى رىمبالا وماربەكوۆاعا, قاراعاندى وبلىستىق وليمپيادالىق رەزەرۆتەگى مامانداندىرىلعان بالالار مەن جاسوسپىرىمدەر سپورت مەكتەبىنىڭ ديرەكتورى اناتولي ستەپانەنكوعا «قاراعاندى وبلىسىنىڭ قۇرمەتتى ازاماتى» اتاعى بەرىلدى.
قاراعاندى وبلىسى
