بايراقتىڭ كولەمى 800 شارشى مەتر بولدى (سالىستىرۋ ءۇشىن: استاناداعى باس فلاگشتوكتاعى بايراقتىڭ كولەمى – 450 شارشى مەتر). تۋ وسى ەرەكشە وقيعا ءۇشىن ارنايى دايىندالىپ, ناتيجەسىندە, قازاقستاننىڭ رەكوردتار كىتابىنا ەندى. پاراشيۋتيست سەكىرگەن بيىكتىك 3 000 مەتردى قۇرادى, بۇل – تاۋداعى ەڭ اتاقتى شىمبۇلاق شيپاجايىنان دا بيىك.
«بۇگىن ءبىز الماتى اسپانىندا مەملەكەتتىك بايراعىمىز تۇرىندەگى شىنايى سۋرەتكە كۋا بولدىق. مەن وسى ءساتتى كوزىممەن كورىپ, ەلىمنىڭ ىنتىماعى مەن اسقاقتىعىنىڭ رۋحىن سەزىنۋ باقىتىنا يە بولدىم», دەيدى قازاقستان رەكوردتار كىتابىنىڭ وكىلى قۋاندىق قۇدايبەرگەنوۆ.
ءىس-شارانى ۇيىمداستىرعان كاسىپكەر جومارت قياستىڭ ايتۋىنشا, بۇل ناۋقاننىڭ ماقساتى – بارشا قازاقستاندىقتىڭ پاتريوتتىق رۋحىن كوتەرۋ, سونىمەن بىرگە ۇلتىنا, دۇنيەتانىمىنا قاراماستان ءبىر-بىرىنە توزىمدىلىك تانىتۋدى دارىپتەۋ.
«قازاقستان – تىنىشتىق پەن بەيبىتشىلىك مەكەنى, مۇنى بارلىق حالىقارالىق قاۋىمداستىق وكىلدەرى راستايدى. ەڭ ۇلكەن بايراقتىڭ اسپاندا قالىقتاۋىندا تەرەڭ ءمان بار, ول اشىق اسپان استىنداعى ەلىمىزدەگى بارلىق حالىقتىڭ ىنتىماعىن بىلدىرەدى», دەدى مەتسەنات.
شارانىڭ ۇرانى بولعان «اشىق اسپان» دەگەن سوزدە تۇتاستىق, قازاقستاندىقتاردىڭ بەيبىت اسپانى دەگەن ءمان جاتىر. بۇل ءسوز بەيبىتشىلىكتى قورعاۋدى, ەل تۇرعىندارىنىڭ باقۋاتتى ءومىرىنىڭ باياندى بولۋىن ناسيحاتتايدى.
الەۋمەتتىك شارانى سونىمەن بىرگە ەسكەندىر يبراگيم, تەمىر سپاتاەۆ, الجان دارمەنوۆ, تويبەك مىرزابەكوۆ, ارداق نازاروۆ, جانقوش تۇراروۆ سىندى ازاماتتار قولدادى.
