ۇلى تۇران دالاسىن انمەن تەربەگەن حالىقارالىق بايقاۋدىڭ ءبىرىنشى كۇنى شارتاراپتان كەلگەن قاتىسۋشىلار ەلىمىزگە تانىمال ەسترادا انشىلەرىمەن بىرگە قازاق اندەرىن شىرقاپ, كورەرمەنگە كوتەرىڭكى كوڭىل كۇي سىيلادى. ەكىنشى كۇنى قاتىسۋشىلار الدىمەن ءشامشى قالداياقوۆتىڭ «ارىس جاعاسىندا» ءانىن بىرگە ورىندادى. سودان سوڭ بايقاۋ تالابى بويىنشا قازاقتىڭ تانىمال اندەرىن شىرقاپ, قازىلار القاسىنىڭ باعاسىن الدى. اتالعان فەستيۆال قازاق مۋزىكاسى مەن قازاقستاندىق كومپوزيتورلاردىڭ ۇزدىك شىعارمالارىن, سونداي-اق قازاق اندەرىن الەمگە ناسيحاتتاۋ, شىعارماشىل, دارىندى جاستاردى انىقتاۋ جانە ولارعا قولداۋ كورسەتۋ, حالىقارالىق بايلانىس پەن ءوزارا ىنتىماقتاستىقتى نىعايتۋ, رۋحاني ءارى مادەني قۇندىلىقتار الماسۋ, تۇركىستاننىڭ تۋريستىك الەۋەتىن ارتتىرۋ سىندى ۇلكەن ماقسات قويعان. بايقاۋدىڭ اشىلۋ سالتاناتىندا تۇركسوي حالىقارالىق ۇيىمىنىڭ باس حاتشىسى سۇلتان راەۆ فەستيۆال ۇلى دالانىڭ, اتا-بابالارىمىزدىڭ قانىندا بار ءان-جىردىڭ مەرەكەسى ەكەنىن اتاپ ءوتتى. بيىلعى بايقاۋدىڭ ەرەكشەلىگى, ازيا ەلدەرىنەن عانا ەمەس, ەۋروپا مەملەكەتتەرىنەن دە انشىلەر كەلىپ قاتىستى. تۇركيا, وزبەكستان, قىرعىزستان, تاتارستان, ازەربايجان, پولشا, چەرنوگوريا, بەلارۋس, مولدوۆا, گرۋزيا, سەربيا, قاراشاي-شەركەس رەسپۋبليكاسى, بۋرياتيا, ماكەدونيا, بولگاريا ەلدەرىنەن كەلگەن قاتىسۋشىلار ەلىمىزگە تانىمال ەسترادا انشىلەرىمەن بىرگە قازاق اندەرىن شىرقادى. ولاردىڭ قاتارىندا تولەگەن مۇحامەدجانوۆ, نۇرجامال ۇسەنباەۆا, مەدەۋ ارىنباەۆ, ايگۇل قوسانوۆا, مارجان اراپباەۆا, جانار دوعالوۆا, «مەلومەن» توبى, رۋحيا بايدۇكەنوۆا سىندى مادەنيەت مايتالماندارى مەن ونەر جۇلدىزدارى بار.
مەملەكەتتىك سىيلىقتىڭ لاۋرەاتى تولەگەن مۇحامەدجانوۆ توراعالىق ەتكەن قازىلار القاسىنىڭ شەشىمىمەن گرۋزيا ەلىنەن كەلگەن تاتيا كوبالادزە گران-پري يەگەرى اتاندى. ال 1-ورىن تاتارستاننان كەلگەن يلگيز شايحرازيەۆكە بۇيىردى. جۇلدەلى 2-ورىندى سەربيالىق ستەفان زدراۆكوۆيچ پەن پولشا ءانشىسى ميحال كاچمارەك يەلەندى. ءۇشىنشى ورىنعا كاتارينا بوگيچەۆيچ (چەرنوگوريا), حريستيانا دانكوۆا (بولگاريا), ناۆرۋزا ماحامادجانوۆا (وزبەكستان) لايىقتى دەپ تانىلدى. جەڭىمپاز بەن جۇلدەگەرلەرگە ارنايى ديپلومدار مەن قارجىلاي سىيلىقتار, ال گران-پري يەگەرىنە ارنايى ستاتۋەتكا تابىستالدى.
ايتا كەتەيىك, بۇعان دەيىن اتالعان بايقاۋ 2 رەت ونلاين وتكەن بولاتىن. 2020 جىلى مولدوۆا رەسپۋبليكاسىنان گالينا شكودا باس جۇلدەنى جەڭىپ السا, 2021 جىلى بۋرياتيالىق تسىدەن ەشي بيمباەۆ گران-پري يەگەرى اتانعان. حالىقارالىق ءان سايىسىنىڭ ناتيجەسىندە 4 ەلدىڭ ۇزدىك انشىلەرىنەن قۇرىلعان «Turan Boys» كۆارتەتى بايقاۋدىڭ جابىلۋ سالتاناتىندا ءان شىرقادى.
تۇركىستان
