اقتاۋداعى «شىنى پلاستيكالىق قۇبىرلار زاۋىتى» جشس 2003 جىلى «Mاڭعىستاۋمۇنايگاز» اق قاجەتتىلىگىن قامتاماسىز ەتۋ ءۇشىن سالىنعان زاۋىت بولاتىن. الايدا اراعا ءبىر جىل سالىپ ءوز الدىنا ىرگەلى زاۋىت بولىپ قايتا قۇرىلدى. وندىرىستىك الەۋەتى زور ماڭعىستاۋ وڭىرىندە شيكىزات ءوندىرىپ قانا قويماي, ءتۇرلى كاسىپورىنداردى وركەندەتۋ وتە ماڭىزدى, اسىرەسە وندىرىسكە قولداۋ كورسەتۋ باعىتىنداعى كاسىپورىنداردىڭ ساپالى ءونىمى سۇرانىسقا يە بولۋى قاجەت. سوندىقتان «شىنى پلاستيكالىق قۇبىرلار زاۋىتى» جشس قازاقستاندىق نارىقتا باسەكەگە قابىلەتتى, ساپاسى مەن سەنىمدىلىگى جاعىنان ۇزدىك ۇلگىلەردەن كەم تۇسپەيتىن, تۇتىنۋشىلاردىڭ تالاپتارىنا جاۋاپ بەرەتىن ءونىمدى تۇراقتى ءوندىرۋ مەن ساتۋدى قامتاماسىز ەتۋدى ستراتەگيالىق ماقساتى ەتىپ قويدى.
كاسىپورىن قازاقستانداعى مۇناي مەن گاز وندىرىستەرى جانە شارۋاشىلىق-تۇرمىستىق قاجەتتىلىكتەرگە ارنالعان ءتۇرلى ديامەترلى, ناقتىراق ايتساق, جۇمىس ديامەترى 63-تەن 500 مم-گە دەيىن, جۇمىس قىسىمى 30-دان 152 اتم-عا دەيىن ءتوزىمدى شىنى تالشىقتى قۇبىرلار وندىرەدى.
ادەتتە پلاستيك بۇيىمدارعا قاراعاندا تەمىردەن جاسالعان قۇرالدار الدەقايدا ساپالى, شىدامدى بولىپ كەلەدى دەگەن تۇسىنىك بار. تەمىردىڭ توزىمدىلىگى تالاسسىز. الايدا مامانداردىڭ ايتۋىنشا, كەي جاعدايلاردا پلاستيكتىڭ دە وزىندىك ارتىقشىلىقتارى بولادى. مىسالى, شىنى تالشىقتى قۇبىرلاردىڭ تەمىر قۇبىرلاردان ارتىقشىلىعى رەتىندە قىزمەت ەتۋ مەرزىمىنىڭ ۇزاق مەرزىمگە – 25 جىلعا دەيىن توتەپ بەرەتىندىگى, توتىعۋعا قارسى 100% قورعانىسى, حيميالىق اگرەسسيۆتى ورتالارعا جانە پارافيندىك شوگىندىلەرگە توزىمدىلىگى, قۇبىرلاردىڭ سالماعىنىڭ جەڭىلدىگى جانە قۇراستىرۋدىڭ وڭايلىعى ايتىلادى.
– مۇنايلى ماڭعىستاۋداعى كەن ورىندارىندا جانە ەلىمىزدىڭ وزگە وڭىرلەرىندە بۇگىنگە دەيىن ءبىزدىڭ زاۋىتتان شىققان شىنى تالشىقتى قۇبىرلار 4 650 شاقىرىمنان استام جەرگە توسەلىپ, مۇنايشىلار وسى جىلدار ىشىندە بولات قۇبىرلارمەن سالىستىرعاندا شىنى تالشىقتى قۇبىرلاردىڭ ارتىقشىلىعى كوپ ەكەنىنە كوز جەتكىزدى. كومپانيامىز شىعارعان شىنى تالشىقتى قۇبىرلاردى ەلىمىزدىڭ كەن ورىندارىندا پايدالانۋ ميللياردتاعان قارجى ۇنەمدەۋگە جول اشادى. ال قۇبىرلاردىڭ ساپاسى ۇزاق مەرزىمدى قولدانىسقا كەپىلدىك بەرەدى. بۇل كەپىلدىكتەردىڭ كىلتى – زاماناۋي تەحنولوگيالاردى, جاڭارتىلعان قۇرال-جابدىقتاردى پايدالانۋ, ۇلتتىق ستاندارت تالاپتارىنا سايكەستىك جانە جوعارى ساپالى شيكىزات, – دەيدى زاۋىت باسشىسى ا.ايتقۇلوۆ.
مەتالل قۇبىرلاردى شىنى تالشىقتى قۇبىرلارعا اۋىستىرۋ كەن ورىندارىنداعى قۇبىرلار اپاتىن ازايتۋمەن بىرگە ەكولوگيالىق جاعدايدى جاقسارتادى. وسى ۇدەدەن تابىلۋ ءۇشىن كاسىپورىن باسشىلىعى ساپا ماسەلەسىن باستى نازاردا ۇستاپ كەلەدى. 2010 جىلدان باستاپ زاۋىتقا ساپا مەنەدجمەنتى, قورشاعان ورتا مەنەدجمەنتى جانە ەڭبەك قاۋىپسىزدىگى مەن ەڭبەكتى قورعاۋ مەنەدجمەنتىنىڭ ينتەگراتسيالانعان جۇيەلەرى, 2018 جىلدىڭ مامىر ايىنان باستاپ ەڭبەكتى قورعاۋ جانە قاۋىپسىزدىكتى باسقارۋ جۇيەسى ەنگىزىلدى. 20 جىلعا جۋىق تاريحى بار كاسىپورىن زاۋىتتا وندىرىلەتىن قۇبىردى تولىق قۇراستىرۋعا قاجەتتى بارلىق فيتينگتەرمەن قامتاماسىز ەتەدى. 2019 جىلى زاۋىت ونىمدەرى ءوندىرىستىڭ وڭدەۋشى سەكتورىنداعى «قازاقستاننىڭ ۇزدىك تاۋارى» اتانىپ, سەرىكتەستىك «ساپا ۇزدىگى» بولىپ تانىلدى. بۇل كاسىپورىننىڭ ءاردايىم ساپا ماسەلەسىن باستى نازاردا ۇستايتىنىنىڭ دالەلى.
قازىرگى تاڭدا كاسىپورىننىڭ ونىمدىلىگى جىلىنا 590 شارشى مەتر قۇبىردى قۇرايدى. سۇرانىستى قاناعاتتاندىرۋ ماقساتىندا كاسىپورىن ءوندىرىستى كەڭەيتۋ باعدارلاماسىمەن جاڭادان تسەح سالىپ جاتىر. بۇل تسەحتا ديامەترى 100 مم شىنى تالشىقتى قۇبىرلاردى ءوندىرۋ جوسپارلانعان. زاۋىت 250-گە جۋىق ادامدى جۇمىسپەن قامتىپ وتىر. جۇمىسقا نەگىزىنەن جاقىن ماڭداعى اۋىل تۇرعىندارى ورنالاسادى, قازىر زاۋىت جۇمىسشىلارىنىڭ 57 پايىزى – مۇنايلى جانە تۇپقاراعان اۋداندارىنىڭ تۇرعىندارى. سەرىكتەستىك باسشىلىعىنىڭ ايتۋىنشا, جۇمىسشىلار ومىرىنە نازار اۋدارۋ ۇمىت قالعان جوق. ۇزدىك جۇمىسشىلار مەن ينجەنەر-تەحنيكالىق قىزمەتكەرلەردى ماراپاتتاپ, جۇمىسشىلاردى تەگىن تاماقپەن, اۋىز سۋمەن قامتيدى, ۇجىمدىق شارت اياسىندا ماتەريالدىق كومەك كورسەتىلەدى, اتاۋلى مەرەكەلەرگە سىياقى بەرىلەدى. «شىنى پلاستيكالىق قۇبىرلار زاۋىتى» جشس ءوز قاراجاتى ەسەبىنەن جاڭادان قابىلدانعان قىزمەتكەرلەردى وقىتىپ, قىزمەتكەرلەردىڭ بىلىكتىلىگىن ارتتىرۋدى جولعا قويعان.
نارىقتىڭ ءوز زاڭى مەن تالابى بار – ساپا, ۇنەم, تيىمدىلىك. وتاندىق ءونىمدى قولدانۋ تۇتىنۋشىعا وسى ءۇش قاجەتتىلىككە قول جەتكىزۋگە مۇمكىندىك بەرەدى. ەل ەكونوميكاسىن كوتەرۋدە ءوز كاسىپورىندارىمىزدىڭ, وندىرۋشىلەرىمىزدىڭ ورنى زور. سوندىقتان اۋقىمدى وندىرىسكە ۇلكەن ماقساتپەن ۇلەسىن قوسىپ, الدىنا بيىك جوسپارلار قويعان شاعىن ۇجىمنىڭ جۇمىسى – قازاقستان ەكونوميكاسىنا قوسىلعان زور كومەك. سوندىقتان وتاندىق ءونىمدى قولداۋ – ەلدى قولداۋ بولماق.
ماڭعىستاۋ وبلىسى
