سايلاۋ ءدۇبىرى باستالىپ, ساياسات سەڭى قوزعالا باستاعانى الماتىدا انىق سەزىلەدى. ساياسي ناۋقان قارساڭىندا بيىلعى 27 قىركۇيەكتە «قازاقستان زاڭگەرلەر وداعى» رەسپۋبليكالىق قوعامدىق بىرلەستىگى الاڭىندا ء«ادىل سايلاۋ ءۇشىن» شتابى قۇرىلعان بولاتىن. شتاب كەزەكتەن تىس قازاقستان رەسپۋبليكاسى پرەزيدەنتىنىڭ سايلاۋى تۋرالى زاڭنامانىڭ نەگىزگى ەرەجەلەرىن تۇسىندىرۋگە, سايلاۋ ۇدەرىسىنە قاتىسۋشىلارعا قۇقىقتىق كومەك كورسەتۋگە ءتيىس.
تاياۋ كۇندەرى «قازاقستان زاڭگەرلەر وداعى» الماتى فيليالىنىڭ توراعاسى ءارى ء«ادىل سايلاۋ ءۇشىن» قالالىق شتابىن باسقاراتىن باۋىرجان ماقۇلباەۆتىڭ قاتىسۋىمەن ءباسپاسوز جيىنى ءوتتى. وتاندىق جانە شەتەلدىك تانىمال زاڭگەرلەر ەنگەن شتاب مۇشەلەرى سايلاۋ ناۋقانىنىڭ بارىسىن قۇقىقتىق مونيتورينگىلەۋ جانە سايلاۋ ۇدەرىسىنە قاتىسۋشىلارعا سايلاۋ زاڭناماسىن قولدانۋ ءتارتىبىن ءتۇسىندىرۋدى كوزدەيدى.
باۋىرجان ماقۇلباەۆ سايلاۋ ناۋقانىن مونيتورينگىلەۋ بارىسىندا باق, ۇكىمەتتىك ەمەس جانە حالىقارالىق ۇيىمدارمەن ءوزارا ارەكەت جاندانا تۇسەتىنى تۋرالى بايانداي كەلە, بايقاۋشىلاردىڭ دا مىندەتىن جىكتەپ: «قازاقستان رەسپۋبليكاسىنىڭ ازاماتى بايقاۋشى بولۋ ءۇشىن 18 جاستان اسقان جانە ساياسي پارتيالاردان, وزگە دە قوعامدىق بىرلەستىكتەردەن, كوممەرتسيالىق ەمەس ۇيىمداردان بايقاۋشى وكىلەتتىگى بولۋى كەرەك», دەدى.
سوڭعى كۇندەرى اتالعان قوزعالىستىڭ جۇمىسى جاندانا تۇسكەنى بايقالادى. سارسەنبى كۇنى ءال-فارابي اتىنداعى قازاق ۇلتتىق ۋنيۆەرسيتەتىندە ء«ادىل سايلاۋ ءۇشىن» شتابى مۇشەلەرىنىڭ «ازاماتتاردىڭ سايلاۋ قۇقىقتارىنىڭ كونستيتۋتسيالىق كەپىلدىكتەرى» تاقىرىبىندا ۇكىمەتتىك ەمەس ۇيىمدار وكىلدەرىمەن, وقىتۋشى-پروفەسسورلار قۇرامىمەن جانە ءبىلىم الۋشى جاستارمەن كەزدەسۋى ءوتتى.
شارانى قازۇۋ-دىڭ زاڭ فاكۋلتەتىنىڭ كافەدرا مەڭگەرۋشىسى, پروفەسسور الۋا يبراەۆا اشىپ, زاڭگەرلەردىڭ سايلاۋالدى مىندەتىنە توقتالدى.
«قوعامدا دەموكراتيانى دامىتۋدا سايلاۋ ماڭىزدى ءرول اتقارادى. بۇل كونفەرەنتسيانىڭ وزەكتىلىگى – جۇرتشىلىق, عالىمدار, ساراپشىلار سايلاۋ تۋرالى زاڭنامانى جەتىلدىرۋ ۇدەرىسىنە بەلسەنە اتسالىسادى. عالىمداردىڭ ۇسىنىسى زاڭ شىعارۋشى بيلىككە اسا قاجەت», دەدى الۋا يبراەۆا.
زاڭ فاكۋلتەتىنىڭ دەكانى, پروفەسسور داۋلەت بايدەلدينوۆ ازاماتتاردىڭ سايلاۋ قۇقىقتارىنىڭ كونستيتۋتسيالىق كەپىلدىكتەرى تۋرالى ايتتى. «كەزەكتەن تىس پرەزيدەنت سايلاۋى حالىقتىڭ دەموكراتيالىق وزگەرىستەردى كەڭەيتۋگە دەگەن سەنىم مانداتىن الۋ ءۇشىن قاجەت. بۇل قازاقستاندىقتار ءومىرىنىڭ بارلىق سالاسىنا قاتىستى», دەدى سپيكەر.
شتاب مۇشەسى, بەلگىلى زاڭگەر عالىم ەرمەك ءابدىراسۇلوۆ كونستيتۋتسيالىق رەفورمانىڭ, سايلاۋ زاڭناماسىنىڭ جانە سايلاۋ ۇدەرىسىن ۇيىمداستىرۋدىڭ نەگىزگى ەرەجەلەرىن ءتۇسىندىردى. ول: «سايلاۋدا ءوز ۇستانىمىن ءبىلدىرۋ – بارلىق ازاماتتىڭ الدىندا تۇرعان مىندەت. ول – حالىقتىڭ مەملەكەت ىستەرىن باسقارۋعا جانە جاڭا, ءادىل قازاقستاندى قۇرۋعا بەلسەندى قاتىسۋىنىڭ كورسەتكىشى. جاستار – مەملەكەتىمىزدىڭ ماڭىزدى سايلاۋ رەسۋرستارىنىڭ ءبىرى, ولار – ەلىمىزدىڭ بولاشاعى! سوندىقتان جاستارعا ساياسي ومىرگە دەگەن بەلسەندىلىك پەن ءوز ەرىك-جىگەرىن ءبىلدىرۋدى كورسەتۋ كەرەك», دەدى.
جيىندا ءسوز العان پروفەسسور ەركىن دۇيسەنوۆ سايلاۋ زاڭناماسىن جاڭعىرتۋ قاجەتتىگىن العا تارتىپ, سايلاۋ ۇدەرىسىنىڭ قىر-سىرى توڭىرەگىندە وي ءوربىتتى. بايقاۋشىلاردىڭ سايلاۋ ۇدەرىسىنە قاتىسۋى, ولاردىڭ قۇقىقتارى مەن مىندەتتەرى, سونداي-اق قازاقستان رەسپۋبليكاسىنىڭ پرەزيدەنتتىگىنە كانديداتتاردى ۇسىنۋ ەرەكشەلىكتەرى تۋرالى ماعلۇماتتار جيىنعا قاتىسۋشىلار تاراپىنان ۇلكەن قىزىعۋشىلىق تۋدىردى.
ۋنيۆەرسيتەت باسشىلىعى, وقىتۋشى-پروفەسسورلار شتاب جۇمىسىنىڭ ماڭىزىن اتاپ ءوتىپ, قولعا الىنعان شارالارعا قولداۋ تانىتتى.
الماتى
