ء«بىزدىڭ «Jas talap» ونەر-ءبىلىم ورتالىعى 2021 جىلدىڭ قاڭتار ايىندا اشىلدى. بۇل كوروناۆيرۋسقا بايلانىستى كارانتين كەزى ەدى عوي. ساباقتىڭ ءبارى ونلاين, قاشىقتان ءوتىپ جاتتى. حالىق ءبىر جىلعا جۋىق كارانتيننەن ابدەن شارشاعان كەزى. اسىرەسە بالالاردىڭ ابدەن ءىشى پىسقان ۋاقىت. ءاۋ باستا ءوز بالام مانسۇرعا ۆيدەوبلوگەرلىكتىڭ قىر-سىرىن ۇيرەتىپ, قالاداعى تانىمال بالالاردان سۇحبات الا باستاپ ەدىم. كەيىن ءبىزدى كورگەن تانىستارىم, بالامنىڭ دوستارى «بىزگە دە ۇيرەتشى» دەپ جالىندى. وسىلايشا, مەكتەپ وقۋشىلارىنا ارنالعان جەكەمەنشىك ورتالىق دۇنيەگە كەلدى», دەپ ەسكە الادى ەرنار.
ەرناردىڭ ءوزى سەگىز قىرلى, ءبىر سىرلى جىگىت. موبيلوگرافيامەن كاسىبي تۇردە اينالىسادى. مەملەكەتتىك مەكەمەلەردىڭ اقپارات پاراعىن جۇرگىزىپ, كوممەرتسيالىق جارناما جاساۋدان دا تاجىريبەسى كوپ. مولدىرەتىپ ولەڭ جازاتىن ءحوببيى بار. ونىسى ينستاگرام پاراعىندا ۇزبەي جاريالانىپ جاتادى. قازىرگى زاماننىڭ ەڭ كەرەكتى داعدىسى – الەۋمەتتىك جەلىنى ابدەن مەڭگەرىپ العان, ۇرشىقشا يىرەدى.
«Jas talap» ۇيىرمەسىن اشار كەزدە جاندوس باقتىعاليەۆ ەسىمدى رەجيسسەر جىگىتپەن پىكىر ءبولىسىپ, ورتاق مامىلەگە كەلىپتى. قۇرمانعازى اتىنداعى ورال ساز كوللەدجىن اكتەرلىك شەبەرلىك جانە رەجيسسۋرا ماماندىعى بويىنشا بىتىرگەن جاندوس تا ءوز ىسىنە جان-تانىمەن بەرىلگەن ەكەن. «Jas talap»-قا كەلگەن بالالاردىڭ ونەرىن ۇشتاپ, از ۋاقىت ىشىندە ساحنا ۇجىمىنا اينالدىرىپ جىبەرگەن.
– كارانتيننىڭ اسەرى شىعار, سول كەزدەرى الەۋمەتتىك جەلى ەرەكشە بەلسەندى دامىدى. اسىرەسە Youتube ارناسىنان قازاقشا كونتەنت ىزدەۋشىلەر كوپ بولدى. «Jas talap» ونەر-ءبىلىم ورتالىعىنداعى «اكتەرلىك شەبەرلىك», «جاس ۆيدەوبلوگەر» جانە «كومپيۋتەرلىك گرافيكا» ۇيىرمەلەرى ءوزارا توعىسىپ, بالالار كينوسىن تۇسىرۋگە كىرىستىك, – دەيدى ەرنار.
جاستالاپتىقتاردىڭ العاشقى بەينەونىمى – «8ا» دەپ اتالادى. بۇل – قىزىعى مەن شىجىعى قاتار ءجۇرىپ جاتقان ءبىر سىنىپتىڭ وقيعاسى. «سەريالدىڭ اتاۋىن ىرىمداپ ادەيى وسىلاي الدىق: 8 سانى – شەكسىزدىكتىڭ بەلگىسى, «ا» ءارپى – ءالىپبيدىڭ باسىندا تۇر. وسىلايشا, «Jas talap»-تىڭ عۇمىرى تاۋسىلماسىن, ءاردايىم الدا جۇرەيىك» دەپ باستاپ كەتتىك», دەيدى جاندوس.
ءبىر قىزىعى, كينو ءتۇسىرۋ ءۇشىن مەكتەپ تابۋ قيىن بولدى. ويتكەنى مەكتەپ عيماراتىنىڭ ءبارى كارانتينگە جابىلعان. ايتەۋىر رەتىن تاۋىپ, كەلىسىپ, ءتۇسىرىلىم جۇمىسى باستالعان. مىنە, قىزىق! «8ا» ءفيلمى العاشقى سەرياسىنان-اق كورەرمەن كوڭىلىنەن شىقتى! جۇزدەگەن پىكىر جازىلعان. بۇگىندە ءدال وسى سەريانى قاراعان ادام سانى 121 مىڭنان اسىپتى.
مىنە, ەكى جىلعا جەتپەيتىن ۋاقىت ىشىندە «Jas talap» ونەر-ءبىلىم ورتالىعى ونعا جۋىق بەينەونىم ءتۇسىرىپ, كورەرمەن نازارىنا ۇسىندى. ەڭ باستىسى, بۇل فيلمدەر – باستان اياق وتاندىق ءونىم: ستسەناريىن جازۋشى دا, ويناعان اكتەرلەرى دە, تۇسىرۋشىلەر دە, رەجيسسەر دە – جاستالاپتىقتار.
– «كىلت» دەگەن قويىلىم قويىپ, №38 مەكتەپ-گيمنازيادا ونەر كورسەتتىك. تاربيەسى قيىن بالالار جونىندە «قاتەلىك» دەگەن فيلم تۇسىرە باستادىق. ۆيدەوبلوگەرلەرمەن «قادام» دەگەن قويىلىم تۇسىردىك. ء«بىزدىڭ كلاسس» اتتى ۆەب-سەريالدى تەلەفونمەن ءتۇسىرىپ ءجۇرمىز. ءوز كۇشىمىزدى بايقاپ, كوڭىلگە سەنىمدىلىك ورناعان سوڭ رەسپۋبليكالىق دەڭگەيدەگى شارالارعا شىقتىق, – دەيدى ەرنار جاقسىباەۆ.
وسىلايشا, ورال قالاسىندا قۇرىلعان شاعىن عانا «Jas talap» ونەر-ءبىلىم ورتالىعى ۇجىمى بيىلعى ناۋرىز ايىندا شىمكەنت قالاسىنا, جازدا قىزىلورداعا جول تارتتى. شىمكەنتتەگى سايىسقا ورالدىق 11 ورەن تەلەفونعا تاۋەلدى بولىپ قالعان بالانىڭ اتا-اناسىن تىڭداماي, دوستارىنان اجىراپ قالىپ كورگەن قيىندىعىن, قالىپتى ومىرگە قايتا ورالۋىن سومداپ شىققان. ءدال بۇگىنگى كۇننىڭ حيكاياسى ەمەس پە؟! ءدال وسى «Music Drive» ونەر بايقاۋىندا ۇيىرمە مۇشەسى بەكارىس باقتىعالي پوەزيالىق شىعارمانى مانەرلەپ وقۋ سايىسىنان 1-ورىندى جەڭىپ العان.
قىزىلوردا قالاسىندا ا.توقماعامبەتوۆ اتىنداعى مادەنيەت سارايىندا وتكەن «جىبەك جولى» ءبىرىنشى رەسپۋبليكالىق بالالار مەن جاسوسپىرىمدەر شىعارماشىلىق بايقاۋىندا دا «Jas talap» ورتالىعىنىڭ ۇجىمى «اكتەرلىك شەبەرلىك» بايقاۋىنان جۇلدەلى ءۇشىنشى ورىندى جەڭىپ الدى. ال ەرالى قانعالي مانەرلەپ وقۋ سايىسىنان باس جۇلدە الىپ, الماتى قالاسىنا جولداما جەڭىپ العان. بەكارىس باقتىعالي مەن سايدا اققوبان جۇلدەلى ءبىرىنشى ورىنعا شىققان.
مىنە, وسىنداي جەتىستىكتەردەن كەيىن جاستالاپتىقتار ورالدا تانىمال جۇلدىز بولىپ كەلەدى. قازىر ولاردى مەكتەپتەرگە, كىتاپحانالارعا ءجيى كەزدەسۋگە شاقىرادى. «جازعى دەمالىس كەزىندە ءبىزدىڭ بالالاردى وقۋشىلار لاگەرلەرىنە تەگىن دەمالۋعا شاقىرىپ ءجۇردى. بۇل ەكى جاققا دا ءتيىمدى: ءبىز بىرەر كۇن دەمالىپ ءجۇرىپ, سول لاگەردىڭ تىنىس-تىرشىلىگى تۋرالى بەينەروليكتەر تۇسىرەمىز, الەۋمەتتىك جەلىدە جارناما جاسايمىز», دەيدى ەرنار.
جاقىندا «Jas talap» ستۋدياسى تۇسىرگەن تۇڭعىش تولىقمەتراجدى ءفيلمنىڭ تۇساۋى كەسىلمەك. «قولعانات» دەپ اتالاتىن بۇل فيلمدە اكتەرلىك شەبەرلىك ۇيىرمەسىنە قاتىساتىن بارلىق ۇل-قىز قامتىلعان. حاديشا بوكەەۆا اتىنداعى باتىس قازاقستان وبلىستىق قازاق دراما تەاترىنىڭ ارتىستەرى دە قولۇشىن بەرگەن. العاشىندا فيلم جاستالاپتىقتاردىڭ ءوز كۇشىمەن باستالسا, كەيىن وبلىستىق حالىق شىعارماشىلى ورتالىعى قولداۋ كورسەتتى. ۇزاقتىعى ءبىر ساعاتتاي بولاتىن ءفيلمنىڭ تۇساۋكەسەر سالتاناتى دا ونەر جاناشىرى ماۋلەت جۇباتوۆ باستاعان حالىق شىعارماشىلىعى ورتالىعىنىڭ ۇيىمداستىرۋىمەن وتپەك.
– «قولعاناتتىڭ» ستسەناريىن التى اي جازدىم. جالپى, تۇسىرىلۋىمەن قوسقاندا 18 ايداي ۋاقىت كەتتى. ءدال قازىر تاعى ءبىر ءفيلمنىڭ جوباسىن جاساپ جاتىرمىز. جىلدىڭ سوڭىنا دەيىن ءتۇسىرىپ, كورەرمەنگە ۇسىنىپ, پرەزيدەنت قاسىم-جومارت توقاەۆ جاريالاعان بالالار جىلىن ادەمى قورىتىندىلاساق دەگەن جوسپارىمىز بار, – دەيدى جاندوس باقتىعاليەۆ.
بۇگىندە سمارتفون مەن الەۋمەتتىك جەلى – ۇلكەن-كىشىنىڭ اجىراماس سەرىگىنە اينالعانى شىندىق. سوندىقتان ونى جونىمەن قولدانىپ, جاقسى ماقساتقا پايداعا اسىرعان ءجون عوي. ورالدىق «Jas talap» ونەر-ءبىلىم ورتالىعى ءدال وسى جۇمىستى ءساتتى اتقارىپ ءجۇر دەر ەدىك.
باتىس قازاقستان وبلىسى
