رەسپۋبليكالىق «Zhas project» جوباسى جۇمىسسىز جاستار سانىن ازايتۋعا باعىتتالعان. وڭىردە جاس قازاقستاندىقتاردىڭ باستامالارىن قولداۋعا 63 شاعىن گرانت ءبولىندى. ءاربىر گرانتتىڭ مولشەرى 1 ميلليون تەڭگەگە دەيىنگى سومانى قۇرايدى.
«Zhas Project» جەرگىلىكتى قوعامداستىقتاردىڭ الەۋمەتتىك ماسەلەلەرىن شەشۋگە, جاستار باستامالارىن قولداۋعا, سونداي-اق كاسىپكەرلىك يدەيالارعا جاردەمدەسۋگە باعىتتالعان. وتكىزىلگەن شاعىن گرانتتار كونكۋرسىنا تۇركىستان وبلىسىنىڭ 18-دەن 29 جاسقا دەيىنگى جاس تۇرعىندارى قاتىسسا, وسال توپتارداعى ارىز تۇسىرۋشىلەرگە ەرەكشە باسىمدىق بەرىلدى. 924 ءوتىنىمنىڭ ىشىنەن كوميسسيا 63 ۇزدىك جوبانى انىقتادى», دەدى تۇركىستان وبلىسى بويىنشا «Zhas Project» جوباسىنىڭ ۇيلەستىرۋشىسى اسەم مادەكەشوۆا.
ۇيىمداستىرۋشىلاردىڭ ايتۋىنشا, جوبالاردىڭ باسىم بولىگى الەۋمەتتىك جاعىنان از قامتىلعان, كوپ بالالى وتباسىلارعا, سونداي-اق مۇمكىندىگى شەكتەۋلى جاندارعا كومەكتەسۋگە باعىتتالعان.
جوبا اياسىندا تۇركىستان وبلىسىندا كومپيۋتەرلىك كۋرستار, سپورت سەكتسيالارى, بالالارعا ارنالعان ماسساج كابينەتتەرى, ءتۇرلى ۇيىرمەلەر اشىلدى. سونداي-اق كونديتەرلىك ونىمدەردى دايىنداۋدان جانە قۇراق كۇراۋدان شەبەرلىك سىنىپتارى وتكىزىلەدى.
ماسەلەن, ءمادينا دۇيسەنبەكوۆا «يپپوتەراپيا» جوباسىن ىسكە قوستى, ول پسيحيكالىق اۋرۋلارعا شالدىققان جانە تىرەك-قيمىل اپپاراتى زاقىمدالعان بالالارعا ارنالعان اتقا سالت ءمىنىپ جۇرۋدەن ساباقتاردى جۇرگىزەدى. ال سايرام اۋدانىنىڭ اقبۇلاق اۋىلىنىڭ تۇرعىنى اسقاربەك ماماتوۆ تاۋىق جۇمىرتقالارىن ينكۋباتسيالاۋ جوباسىن جۇزەگە اسىرىپ جاتىر.
كەنتاۋ تۇرعىنى الۋا تۇرسىنحان كوپ بالالى وتباسىلاردا تاربيەلەنىپ جاتقان جانە جەتىم بالالارعا تەگىن تاراتۋ ماقساتىندا قايتا قولدانىلاتىن جايالىقتار تىگۋدى باستادى.
ال ابدىحالىق ەسەنوۆ تۇلكىباس اۋدانىنىڭ تۇرعىندارىنا سابىن جاساۋ ساباقتاردى وتكىزسە, ابەن يمانعالي ماقتاارال اۋدانىنا قاراستى اتاكەنت اۋىلىندا الەۋمەتتىك شاشتاراز قىزمەتىن اشتى.
ايتا كەتسەك, «Zhas Project» الەۋمەتتىك جوباسى قر اقپارات جانە قوعامدىق دامۋ مينيسترلىگىنىڭ جانە ازاماتتىق باستامالاردى قولداۋ ورتالىعىنىڭ قولداۋىمەن الماتى, قاراعاندى, ماڭعىستاۋ, تۇركىستان وبلىستارىندا, سونداي-اق جەتىسۋ جانە ۇلىتاۋ وبلىستارىندا وتكىزىلەدى. جوبا اياسىندا رەسپۋبليكا بويىنشا بارلىعى 252 باستاما ىسكە اسىرىلۋدا.
