ماۋسىمنىڭ جابىلۋ راسىمىنە جينالعان ۇلتتىق سپورت جانكۇيەرلەرىن وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ پەن قوستاناي وبلىستىق ات سپورتى فەدەراتسياسىنىڭ ۆيتسە-پرەزيدەنتى نۇربول ءابدىراحمانوۆ قۇتتىقتادى.
عاۋەز تورسان ۇلى بيىلعى جاز بۇتىندەي قوستاناي تۇقىمدى تۇلپارلاردى ناسيحاتتاۋعا ارنالعانىن جانە قازىرگى تاڭدا وسى تۇقىمنىڭ قانىن تازا ساقتاپ, مەيلىنشە كوبەيتىپ الۋدىڭ جولدارى ىزدەستىرىلىپ جاتقانىنان حاباردار ەتتى.
– قوستانايدا ون توعىزىنشى عاسىردىڭ اياعىنا تامان قازاقتىڭ قازاناتىنىڭ نەگىزىندە جىلقى زاۋىتى اشىلىپ, الپىس جىلعا جالعاسقان ۇزدىكسىز كۇردەلى بۋدانداستىرۋ جۇمىستارى جۇرگىزىلگەنى بەلگىلى. ناتيجەسىندە, الىنعان قوستاناي قازاناتى 1951 جىلى رەسمي تۇردە جەكە تۇقىم رەتىندە تىركەلدى. ءبىتىمى بولەك, دەنەسى شىمىر, سۇيەكتى, ءسىڭىرلى, بولات تۇياق اسىل تۇقىمدى بۇل تۇلپاردىڭ سانى كەزىندە 44 مىڭعا دەيىن جەتكەن. وكىنىشكە قاراي, بۇگىندە مۇلدە ازايىپ كەتتى. سوندىقتان اتالارىمىزدان قالعان اسىل تۇقىمدى سايگ ۇلىكتى ساقتاپ قالۋ مىندەت, – دەدى وبلىس اكىمىنىڭ ءبىرىنشى ورىنباسارى.
بۇل جولعى بايگەدە قوستاناي قازاناتىنا ايرىقشا ءمان بەرىلىپ, تەك وسى تۇقىمعا ارنالعان 2 400 مەترلىك ۇشقىر جارىس, 5 شاقىرىمدىق قۇنان بايگە جانە 18 شاقىرىمدىق الامان ۇيىمداستىرىلدى. مۇنىڭ سىرتىندا, ارالاس تۇقىمدى سايگ ۇلىكتەردىڭ 4 شاقىرىمدىق قۇنان جارىسى مەن 16 شاقىرىمدىق الامان بايگەسى ءوتتى.
ۇيىمداستىرۋشىلاردىڭ ايتۋىنشا, وڭىردە ۇلتتىق سپورتقا دەگەن قىزىعۋشىلىق جىلدان-جىلعا ارتىپ كەلەدى. قازىر وبلىستا 13 مىڭنان استام ادام ۇلتتىق ويىن تۇرلەرىمەن اينالىسادى ەكەن. ال بيىلعى ماۋسىم ولار ءۇشىن ناتيجەلى بولدى دەۋگە تولىق نەگىز بار. ماسەلەن, توبىل وڭىرىندە مامىر ايىنان بەرى سەگىز بايگە وتكىزىلگەن. بۇل جارىستاردى باس بايگەگە تىگىلگەن اۆتوكولىك پەن جۇلدەگەرلەرگە تابىس ەتىلگەن قارجىلاي سىيلىقتىڭ كولەمى 90 ميلليون تەنگەگە ماڭايلاپ قالادى. سىيلىق قورى كەلەر جىلى دا قوماقتى بولماق.
– الداعى ماۋسىمدا دا ءدال وسى بيىلعىداي 7-8 بايگە وتكىزەمىز دەپ جوسپارلاپ وتىرمىز. سوڭعى جىلدارى ايماقتا ات سپورتىنا دەگەن قىزىعۋشىلىق ەرەكشە. جۇيرىك جىلقى ساتىپ الىپ جاتقان, ات باپتاپ, بايگەگە قوسىپ جاتقان ازاماتتاردىڭ قاتارى كوبەيىپ كەلە جاتىر. ءبىزدىڭ الدىمىزدا تۇرعان ەڭ باستى جوسپارىمىز وسى عوي, – دەيدى ات سپورتى فەدەراتسياسىنىڭ ۆيتسە-پرەزيدەنتى.
ماۋسىمدى قورىتىندىلاعان بايگەگە ەلىمىزدىڭ بىرنەشە وڭىرىنەن 30-عا جۋىق سايگ ۇلىك قاتىستى. تازا قوستاناي قازاناتتارى اراسىندا وتكەن 20 شاقىرىمدىق الاماندا اقمولا وبلىسىنىڭ سايگ ۇلىگى الدىنا قارا سالدىرمادى.
– تۇلپارلارىمىز تالاي جارىستا توپ جارىپ ءجۇر. بۇل جولى دا جۇلدەلى ورىنداردان كورىندى. جاقسى ورىنداردى الىپ جاتىرمىز. ەكى اۆتوكولىك ۇتتىق. مۇنىڭ سىرتىندا, ەكىنشى, ءۇشىنشى ورىندارعا جەتىپ جاتىرمىز. مۇنداي بايگەلەرگە ەشكىم وسال ات قوسپايدى. قازاقتىڭ «باق شابا ما, باپ شابا ما دەگەنى وسى عوي, وزگەلەرگە دە جۇعىستى بولسىن دەپ تىلەيمىن, – دەدى اتى وزعان اقمولالىق اتبەگى ادىلەت تاسمۇحامبەتوۆ.
بۇگىندە ەلىمىزدە قوستاناي تۇقىمىنا جاتاتىن جىلقىنىڭ سانى 173-كە جەتىپتى. ۇزاق جىلدار بويى جۇرگىزىلگەن سەلەكتسيالىق جۇمىستاردىڭ ناتيجەسىندە الىنعان قازاق قازاناتىنىڭ كۇش-قۋاتىنا, بىتىمىنە شەتەلدىك ماماندار دا جوعارى باعا بەرىپ وتىرعان كورىنەدى. «قازاق تۇلپارى» جشس باسقارما ءتورايىمى ايگۇل اماندىقوۆانىڭ ايتۋىنشا, قوستاناي تۇقىمدى سايگ ۇلىكتەر ۇشقىرلىعى جاعىنان الەم بويىنشا ەكىنشى ورىندا تۇر. الىسقا سالۋعا دا اسا ءتوزىمدى كەلەدى.
ماۋسىم قورىتىندىسى بويىنشا ءار قاشىقتىقتا جۇلدەلى ورىنداردان كورىنگەن شاباندوزدارعا قوماقتى قارجىلاي سىيلىقتار تابىس ەتىلدى.
قوستاناي وبلىسى
