بالالارعا مەديتسينالىق كومەك ءمامس ەسەبىنەن تەگىن جاسالادى. ال 2011 جىلدان بەرى حيرۋرگتەر «يىلگىش شەگەلەر» نەمەسە تەن ارقىلى وستەوسينتەز تەحنولوگياسىن قولدانىپ كەلەدى. بۇل شەگەلەر جامباس سۇيەك, يىق, جىلىنشىك, بۇعانا سىنعاندا تيىمدىلىگىن كورسەتتى.
تەحنولوگيانىڭ ەرەكشەلىگى – سىنعان سۇيەكتەردى تۋرا سايكەستەندىرىپ, ارناۋلى سىم-شەگە ارقىلى بەكىتەتىنىندە. شەگە سۇيەك ابدەن جازىلعاندا عانا بارىپ الىنادى. بۇل تەحنولوگيا ناۋقاستىڭ اۋرۋحانادا جاتىپ, ەمدەلۋ مەرزىمىن كەمىتتى. بۇرىن وسى تەكتەس سىنىقتارمەن اۋرۋحانا توسەگىنە تاڭىلۋ 4 اپتاعا سوزىلسا, ەندى 5 كۇندە ۇيىنە شىعادى.
– مۇنداي تەحنولوگيا 12-13 جاسقا دەيىنگى بالالاردىڭ جىلىك سەكىلدى سۇيەكتەرىنىڭ ديافيزدىك سىنىقتارىن ەمدەۋدىڭ وزىق جولى دەپ ەسەپتەيدى ماماندار. بالا وپەراتسيادان سوڭ اۋرۋحانادا 5 كۇن عانا بولادى. سۇيەكتىڭ قايىرا ورنىنان قوزعالىپ كەتۋىنە جول بەرمەيدى. بىرنەشە رەت رەنتگەنگە ءتۇسىرۋ قاجەتتىلىگى دە جوق. تاعى ءبىر ارتىقشىلىعى – سۇيەك ورنىنا كەلىپ, بەكىتىلگەن سوڭ ناۋقاستار وتىرىپ, تۇرىپ, قوزعالا الادى, – دەيدى بالالار ورتوپەدياسى ءبولىمىنىڭ مەڭگەرۋشىسى شولپان مۇقاشەۆا.
بۇگىندە اۋرۋحانادا جاتقان جامباس سۇيەگى سىنعان ەڭ كىشكەنتاي ناۋقاس 1 جاستان 3 اي اسقان ءسابي ەكەن.
ويناپ ءجۇرىپ جامباسىن سىندىرعان بالالار دا ءجيى كەزدەسەدى. بولىمشەدەگى پاتسيەنتتەردىڭ ءبىرى – 12 جاستا. ونىڭ سول جاق جامباس سۇيەگىنە تەن ورناتىلىپتى. سۇيەك سىنعان كەزدە ورنىنان جىلجىپ كەتكەن. وتا كەزىندە سىنىق سايكەستەندىرىلىپ بەكىتىلدى. بىرەر كۇندە اۋرۋحانادان شىعادى, دەيدى دارىگەرلەر.
