قازان اۋزى جوعارى

الماتى وبلىسىنىڭ ديقاندارى دا «قازان اۋىزى جوعارى» دەگەندى ءجيى ايتىپ ءجۇر. ياعني القاپتاردا ونگەن استىقتىڭ ءتۇسىمى جاقسى. بۇگىنگە دەيىن ەگىس­تىكتىڭ 80 پايىزى جينالىپتى. جي­نالعان ءداننىڭ سالماعى 361,9 مىڭ توننا­عا جەتتى.

– بۇگىنگە دەيىن 181,4 مىڭ توننا استىق جينالدى. بۇل بىلتىرعى ونىممەن سالىستىرعاندا ەكى ەسە كوپ. بيدايدى جيناۋ ناۋقانى دا اياقتالىپ قالدى. 69,4 مىڭ توننا بيداي باستىرىلدى. وتكەن جىلعى كورسەتكىش 32,1 مىڭ توننا بولاتىن. ال وبلىستا ەڭ كوپ وسىرىلەتىن ءداندى-داقىلدىڭ ءبىرى سانالاتىن ارپانى جيناۋ ناۋقانى دا اياقتالدى. 184,2 مىڭ توننا جينالدى, وتكەن جىلى 149,3 مىڭ توننا بولعان. سونداي-اق 81,5 مىڭ توننا جۇگەرى جينالدى, ونى جيناۋ قاراشانىڭ ءبىرىنشى ونكۇندىگىنە دەيىن جالعاسادى. كۇرىشتىڭ ءونىمى 26,7 مىڭ توننا بولدى, – دەيدى وبلىستىق اۋىل شارۋاشىلىعى باسقارماسىنىڭ وكىلدەرى.

سول سياقتى بيىل ەگىلگەن كارتوپتىڭ تۇينەگى مول تۇسكەن. قازىر كارتوپ القاپ­تارىنىڭ 85 پايىزى جينالىپ, جينالعان ءونىم كولەمى 429,3 مىڭ تونناعا جەتكەن. ال بىلتىر جينالعان جالپى ءونىم كولەمى 398,1 مىڭ توننا شاماسىندا بولعان. كوكونىس وسىرۋشىلەردىڭ دە بيىل ونىمگە قارىق بولىپ وتىرعان جايى بار. جالپى, جينالعان كوكونىستىڭ كولەمى بيىل 743 مىڭ تونناعا جەتتى. وڭىردە جەمىس-جي­دەك جيناۋ ناۋقانى دا اياقتالۋعا تاياۋ. بۇگىن­دە 105,6 مىڭ توننا ءونىم ءتۇرى جينال­عان.

جالپى, بيىل وبلىستاعى جەمىس-جيدەك داقىلدارىنىڭ كولەمى 12,6 مىڭ گەكتارعا جەتتى. بۇل وتكەن جىلمەن سالىستىرعاندا مىڭ گەكتارعا ارتىق. ال وبلىس بويىنشا وسىرىلگەن جەمىس-جيدەكتىڭ جارتىسىنا جۋىعى ەڭبەكشىقازاق اۋدانىنىڭ ۇلەسىندە, ديقاندار 47,2 مىڭ توننا ءونىم جيناعان. ودان كەيىنگى ورىندا ۇيعىر اۋدانى تۇر. بۇل اۋدانداعى جينالعان جەمىس-جيدەك كولەمى 29 مىڭ توننا شاماسىندا. وسى ەكى اۋداننان تالعار شارۋالارى دا قالىسار ەمەس, اۋداندا 19,1 مىڭ توننا ءونىم جينالعان كورىنەدى. بيىلعى ونىمدىلىك مولشەرى وتە جاقسى. ماسەلەن, وتكەن جىلى جەمىس-جيدەكتەن الىنعان ونىمدىلىك مولشەرى 77,5 تسەنتنەر بولسا, قازىردىڭ وزىندە ءار گەكتارداعى ءونىمنىڭ تابىسى 83,5 تسەنتنەردەن اينالىپ وتىر.

الماتى وبلىسى