وبلىس ورتالىعىندا مۇنتازداي تازالىقتى مۇرات تۇتقان اكتسيانىڭ العاشقى كەزەڭى مەيلىنشە ۇيىمشىلدىقپەن ءوتتى. بۇل كۇنى مەملەكەتتىك قىزمەتشىلەر, ستۋدەنتتەر مەن ءبىلىم الۋشىلار, بەلسەندىلەر مەن ەرىكتىلەر جۇدىرىقتاي جۇمىلىپ, شاعىن قالانىڭ ءىشى مەن سىرتىن تاپ-تۇيناقتاي ەتىپ تازالادى. اتالعان اكتسيانىڭ نەگىزگى ماقساتى – وزدەرى تۇرىپ جاتقان ەلدى مەكەندى ءتۇرلى قوقىستان تازارتۋ عانا ەمەس, جالپى جۇرت, قالىڭ قاۋىمنىڭ بويىنداعى ەكولوگيالىق مادەنيەتتى جەتىلدىرۋ.
كوكشەتاۋ قالاسىنىڭ ىرگەسىندەگى تويعان قوزىداي تومپايىپ جاتقان بۇقپا تاۋىنىڭ باۋرايى سوڭعى كەزدە ىبىرسىپ كەتىپ ەدى. وعان سەبەپ كەلىمدى-كەتىمدى كىسىنىڭ كوپتىگى جانە ولاردىڭ ءتارتىپ پەن تازالىقتى ساقتاي بەرمەيتىنى. ۇيىتقىعان جەل دە يەن دالادا شاشىلىپ جاتقان پوليەتيلەن پاكەتتەر مەن قاعازداردى ۇشىرىپ اكەلىپ جاتاعان تاۋدىڭ ىعىنا شاشىپ تاستايدى. جۇمىس جەتەرلىك. تازالايتىن جەردىڭ اۋماعى اتشاپتىرىم. ايتسە دە, «جاس كەلسە ىسكە» دەگەن ەمەس پە, العاشقى بەتتە-اق بويلارىندا كۇش-قۋاتى تاسىپ تۇرعان جاس تولقىن ەتپىسىرىم ۋاقىت ىشىندە تاۋ باۋرايىن جالتىراتىپ تازالاپ شىقتى.
– ءوز باسىم وسىنداي يماندى شارۋاعا قاتىسۋعا ءاردايىم ءازىرمىن, – دەيدى جەرگىلىكتى ۋنيۆەرسيتەت ستۋدەنتى ءىلياس قاجىباەۆ, – اكەم ورمانشى بولعاندىقتان تابيعاتتى تازالاۋ پەرزەنتتىك پارىزىمىز ەكەنىن جاستايىمىزدان كوكىرەگىمىزگە توقىپ وستىك. قۇربىلارىما دا ەكولوگيالىق مادەنيەتتى ارتتىرۋ ماڭىزدى ەكەنىن ۇنەمى ايتىپ وتىرامىن.
اكتسيانى ەكولوگتەر مەن قالانىڭ تۇرعىن ءۇي-كوممۋنالدىق شارۋاشىلىعى ءبولىمىنىڭ قىزمەتكەرلەرى باستادى. ولار وبلىس ورتالىعىنداعى ەڭ لاستانعان جەرلەردى تازارتۋدى قولعا الدى. مۇنداي جۇمىس ءتورت جەردە ۇيىمداستىرىلدى. بۇقپا تاۋىنىڭ باۋرايىندا, «الاش ارىستارى» ساياباعىندا, قىلشاقتى وزەنىنىڭ جاعالاۋىندا جانە شاحمەت قۇسايىنوۆ كوشەسى بويىنداعى جەكە سەكتوردا تابيعات تازالىعى, قالا كوركى ءۇشىن تەگەۋىرىندى جۇمىس جۇرگىزىلدى. ءوز ولكەسىنىڭ ءوڭى جارقىراپ جايناپ تۇرعاندىعىن قالايتىن وبلىس تۇرعىندارى وسىنداي باعالى باستامانى ىلە قولداپ, بار كۇش-مۇمكىندىكتەرىن جۇمىلدىرۋدا. ىزگى نيەتتى ءىس جالعاسىن تاپسا, كوكشەتاۋ مەن قورعالجىننىڭ اراسىنداعى كەڭ كوسىلگەن دالا ءساۋىردىڭ اق جاۋىنى جۋعانداي اجارلى كەيىپكە ەنەر ەدى.
كوكشەتاۋ
