9 قازان كۇنى العاشقى ءورت گلۋبوكوە اۋدانىنا قاراستى مالوۋبينكا اۋىلىندا تىركەلدى. جەكەمەنشىك قوس پاتەرلى ۇيدەن شىققان ءورت ماڭايىنداعى 38 توننا ءشوپتى دە شارپىپ وتكەن. الا جازدايعى ەڭبەك ەش كەتتى دەگەن – وسى. ءورت سوندىرۋشىلەر جەتكەنشە, ءتىلسىز جاۋ 345 شارشى مەتردى جالىنعا وراپ ۇلگەرگەن. توتەنشە جاعدايلار دەپارتامەنتىنىڭ قىزمەتكەرلەرى وقيعا ورنىنا جەتە سالا تەرەزەدەن كىرىپ, سەكسەندەگى قاريانى قۇتقارىپ قالدى. ال ءورتتىڭ نەدەن شىققانى ءالى بەلگىسىز, انىقتالىپ جاتىر.
ىلە-شالا ءورت وبلىستىڭ وزگە اۋداندارىندا دا تۇتاندى. ءبىر كۇن بۇرىن عانا تجد تاراپىنان داۋىل بولاتىندىعى تۋرالى ەسكەرتىلگەن. سويتە تۇرا ءورت قاۋىپسىزدىگىنە قارسى شارالار ساقتالماعانعا ۇقسايدى. ءبىر تال سىرىڭكە مىڭ تال ورماندى وتقا ورايتىنى اركىمنىڭ كوكەيىندە جۇرسە عوي, شىركىن. بىلمەيتىندەر بىلە ءجۇرسىن, اۋىلشارۋاشىلىق الاڭدارىندا, دالالى جەردە, ورماندى القاپتاردا وت جاعۋ اكىمشىلىك كودەكستىڭ 336, 337, 410-باپتارىمەن جاۋاپقا تارتىلۋى مۇمكىن.
ءار جەردەن ءورت شىعا باستاعاندا دابىل قاعىلىپ, ازاماتتار ءورت سوندىرۋگە شىققان. تجد ماماندارىنىڭ مالىمەتى بويىنشا, ءورتتىڭ بەتىن قايتارۋ ءۇشىن بارلىعى 120-دان اسا تەحنيكا مەن 700-گە جۋىق ادام جۇمىلدىرىلعان.
بۇل كۇنى كۇرشىم اۋدانىنىڭ ۇشبۇلاق اۋىلىنان 14 شاقىرىم جەردەگى پۋگاچەۆ ورمانشىلىعى مەن مارالدى اۋىلدىق وكرۋگىنىڭ اۋماعىنان دا ءورت شىقتى. قۋراپ تۇرعان دالالى جەردەن شىققان جالىن قانشا گەكتاردى جايپاعانى ازىرشە بەلگىسىز. تجد مالىمەتىنشە, 260-تان استام ورمانشى, 30-عا جۋىق تەحنيكا جانە قوس بىردەي مي-8 تىكۇشاعى جۇمىلدىرىلدى. تىكۇشاق جانىپ جاتقان اۋماققا 35 توننادان 14 رەت سۋ توگىپ, ءورتتىڭ بەتىن قايتارعان. دەسە دە, ايماقتا قۇرعاق اۋا رايى ساقتالۋدا.
ال زايسان اۋدانىنداعى سولەنىي ۋچاسكەسىندە 15 گەكتار جەر كۇلگە اينالعان. ءدال مۇنداي دالا ءورتى ۇلان اۋدانىنان دا شىقتى. گەراسيموۆكا اۋىلىنىڭ ماڭىنداعى اقتاستى ۋچاسكەسىندە 45 گەكتار جەر ورتەنسە, ۆىسوكايا ۋچاسكەسىندە 600 گەكتار جەر بىراق جانىپ كەتكەن. دالالى جەر بولعاندىقتان ورمان-توعاي مەن قورا-قوپسىعا بالەندەي كەسىرى تيە قويعان جوق. وسكەمەندە كەرىسىنشە, الاپات ءورت 6 ساياجاي ءۇي مەن شارۋاشىلىق عيماراتتارىن شارپىعان. ودان بولەك قالا ماڭىندا دالالى جەرلەر دە ورتەندى.
ۇيىتقي سوققان جەل وڭدىرسىن با؟! تۇسكەن شوق تۇتانعان. تۇتانعان وت ۇشقىنداپ, جان-جاققا تارالا بەرگەن. بايقاعانىمىزداي, سول كۇنى وسكەمەننىڭ اسپانى كوك تۇتىننەن كورىنبەي تۇردى. تۇپتەپ كەلگەندە, ءورتتىڭ شىعۋى ادامي فاكتورعا بايلانىستى. ايتپەسە, نايزاعاي ويناپ, كۇن كۇركىرەمەگەن. ارينە, ءورت وشاقتارىندا ارنايى ماماندار جۇمىس ىستەپ جاتىر. ءتىلسىز جاۋدىڭ نەدەن شىققانىن ناقتىلاي جاتار. ال سىزدەر تابيعات اياسىنا شىعا قالساڭىز, اسا ساق بولىڭىز. وت جاققان جاعدايدا ابدەن ءسوندىرىپ كەتىڭىز. تجد ماماندارى دا ۇنەمى بۇل تۋرالى ەسكەرتۋلەر جاساپ وتىرادى.
– ءبىز ءوز تاراپىمىزدان ءورتتىڭ شىعۋ نۇكتەسىن جەدەل باقىلاۋ ءۇشىن كوسمومونيتورينگتى پايدالانىپ وتىرمىز. بۇگىنگى تاڭدا عارىشتىق تەحنولوگيالاردىڭ كومەگىمەن وبلىستا 658 ءورتتىڭ نۇكتەسى تىركەلىپ, جەدەل ءسوندىرىلدى. وتكەن دەمالىس كۇندەرى 55 جەردە قۇرعاق ءشوپ جانىپ, ءورت سوندىرۋشىلەر ءوشىرىپ ۇلگەردى. كوپ جاعدايدا تۇرعىندار قوقىس ورتەيمىز دەپ, وت شىعارىپ الىپ جاتادى, – دەيدى وبلىستىق تجد باستىعىنىڭ ورىنباسارى سەرىك امانگەلدين.
شىعىس قازاقستان وبلىسى
