قازىرگى حالىق سانى جىل باسىنداعى كورسەتكىشپەن سالىستىرعاندا 163,7 مىڭ ادامعا نەمەسە 0,8%-عا ءوستى. ال وتكەن جىلدىڭ سايكەس كەزەڭىمەن, ياعني 2021 جىلدىڭ قاڭتار-تامىز ايلارىنداعى دەرەكپەن سالىستىرعاندا, ەل حالقىنىڭ تابيعي ءوسىمى 3,6%-عا (178,9 مىڭ ادام) تومەندەپ, 172,4 مىڭ ادامدى قۇرادى. 1 مىڭ تۇرعىنعا شاققانداعى تابيعي ءوسىمنىڭ جالپى كوەففيتسيەنتى 13,19 ادامدى قۇرادى.
احات ورگاندارى ۇسىنعان ازاماتتىق حال-اكتىلەرىنىنىڭ جازبالارىنداعى مالىمەتتەرگە سايكەس, بيىل قاڭتار-تامىز ارالىعىندا 263,8 مىڭ ءسابي دۇنيەگە كەلدى. بۇل 2021 جىلدىڭ ءتيىستى كەزەڭىنە قاراعاندا 11%-عا از (296,5 مىڭ ادام). 1 مىڭ ادامعا شاققانداعى جالپى تۋ كوەففيتسيەنتى 20,19 ءسابيدى قۇرادى.
ال «تۋماق باردا – ولمەك بار» دەگەندەي, قاراستىرىلىپ وتىرعان كەزەڭدە قايتىس بولعانداردىڭ سانى – 91,4 مىڭ. بۇل وتكەن جىلعا قاراعاندا 22,3%-عا از (2021 جىلى – 117,6 مىڭ ادام). ءولىم-ءجىتىمنىڭ جالپى كوەففيتسيەنتى 1 مىڭ ادامعا 7 مارقۇمدى قۇرادى.
سونداي-اق بيىل قاڭتار-تامىز ارالىعىندا 1 جاسقا دەيىن شەتىنەگەن 2 208 نارەستە تىركەلدى جانە 2021 جىلعى ءتيىستى كەزەڭمەن سالىستىرعاندا (2 345 شەتىنەگەن نارەستە) كورسەتكىش 5,8%-عا كەمىدى. نارەستە ءولىم-ءجىتىمىنىڭ كوەففيتسيەنتى 1 مىڭ تۋعاندارعا شاققاندا 8,37 وقيعانى قۇرادى.
بۇگىندە اينالامىزداعى شيەلەنىسكەن جاعدايلارعا بايلانىستى حالىق سانى كەلىمسەكتەردىڭ ەسەبىنەن كوبەيىپ جاتقان جوق پا دەگەن سۇراقتىڭ تۋىندايتىنى دا انىق. بىراق كوشى-قون قىزمەتى ورگاندارى ۇسىنعان مالىمەتتەرگە سۇيىنسەك, بۇعان الاڭداۋعا نەگىز جوق سياقتى. ايتالىق, بيىل قاڭتار-تامىز ايلارىندا ەلىمىزگە تۇرعىلىقتى تۇرۋعا كەلگەن 9 595 ادام تىركەلگەن ەكەن. الايدا ەلىمىزدەن 18 275 ادام كەتىپتى. مۇنداعى كوشى-قون ايىرىمى – 8 680 ادامعا كەم.
كوشى-قوننىڭ نەگىزگى الماسۋى تمد مەملەكەتتەرىنىڭ اراسىندا ەكەنى تۇسىنىكتى. وندا كەتىپ جانە سول جاقتان كەلىپ كوشىپ-قونۋشىلاردىڭ جالپى سانىنان ۇلەسى 85,1% جانە 84,4%-دى قۇرادى.
ەل ىشىندە قونىس اۋداراتىنداردىڭ سانى 2,1%-عا كەمىدى. وڭىرارالىق قونىس اۋدارۋ بويىنشا حالىق كوشى-قونىنىڭ وڭ ايىرىمى ەلىمىزدىڭ 3 وڭىرىندە – الماتى (24 711 ادام), استانا (22 960 ادام) جانە شىمكەنت (2 154 ادام) قالالارىندا بايقالدى.
