«قاينار» ءبىلىم بەرۋ جانە بوس ۋاقىتتى قامتۋ كەشەنىنە قاراستى اۋلا كلۋبى نەگىزىندە ومىرگە كەلگەن قوسىمشا مەكتەپ – ەكىباستۇز قالاسى ءبىلىم بەرۋ ءبولىمى جانە جەرگىلىكتى توتەنشە جاعدايلار باسقارماسىنىڭ بىرلەسكەن جوباسى. مۇندا بالالاردى وقىتۋ, ولارعا مەكتەپتە العان تەوريالىق بىلىمدەرىن كەڭەيتۋگە جانە ناقتىلاۋعا, العاشقى كومەك كورسەتۋ داعدىلارىن قالىپتاستىرۋعا, توتەنشە جاعدايلاردا ءىس-ارەكەتتەر تۋرالى ءبىلىم الۋعا, ىزدەستىرۋ-قۇتقارۋ جۇمىستارىنىڭ داعدىلارىن يگەرۋگە, پسيحولوگيالىق دايىندىقتان وتۋگە مۇمكىندىك قاراستىرىلعان.
كاسىپتىك باعدارلاۋعا ارنالعان ۇيىمعا ورتا مەكتەپتەردىڭ 7-10-سىنىپ وقۋشىلارى كەلەدى. جاس قۇتقارۋشىلار توتەنشە جاعدايلار باسقارماسىمەن ازىرلەنگەن قاۋىپسىزدىك مادەنيەتىن قالىپتاستىرۋ باعدارلاماسى بويىنشا ءبىلىم كوكجيەكتەرىن كەڭەيتىپ, دارىستەردى ارنايى ماماندار مەن پەداگوگتەر جۇرگىزەدى. وقۋ-جاتتىعۋ ورتالىعى مامانداندىرىلعان جابدىقتارمەن, وقۋ ادەبيەتتەرىمەن جانە ازاماتتىق قورعاۋ بويىنشا ادىستەمەلىك قۇرالدارمەن جابدىقتالعان.
ورتالىقتىڭ اشىلۋىندا «انگرەنسور» جشس «جاس قۇتقارۋشىلار» جاساعىنا فورما جيىنتىعىن سىيعا تارتتى.
– بالالار جىلىندا قولعا الىنعان جوبانىڭ ماڭىزى زور. كوپتەگەن جوعارى سىنىپ وقۋشىلارى بەلسەندى ءومىر سالتىن ۇستانادى, سپورتپەن شۇعىلدانادى. ءبىز جاستارعا توتەنشە جاعدايدا العاشقى كومەك كورسەتۋ مۇمكىندىگىن ۇسىنا وتىرىپ, الەۋمەتتىك ماڭىزى بار سالادا وزدەرىن تانىتۋعا جاعداي تۋدىرامىز. ءپاتريوتيزمدى, جاۋاپكەرشىلىكتى, بەلسەندى قوعامدىق ۇستانىمدى قالىپتاستىرۋعا ىقپال ەتەمىز, – دەدى وبلىستىق توتەنشە جاعدايلار دەپارتامەنتىنىڭ باسشىسى, گەنەرال-مايور جاسۇلان جۇماشەۆ مەكتەپتىڭ اشىلۋ سالتاناتىندا.
ايتا كەتەلىك, بۇگىندە ەكىباستۇز قالاسىندا 8 اۋلا كلۋبى بار, ولار جالپى سانى 2 مىڭنان استام بالانى قامتىپ وتىر. «جانۇيا» وتباسىلىق كلۋبى, جاس شاشتارازدار مەكتەبى, اسپازدىق كلۋب, بالالار ۆەلوتۋريزمى جانە «جاس قۇتقارۋشىلار» ورتالىعى جەرگىلىكتى جاسوسپىرىمدەر ءۇشىن اسا تانىمال. ال جىل سوڭىنا دەيىن شاھاردا ۇلتتىق ويىندار مەكتەبىن اشۋ جوسپاردا تۇر.
پاۆلودار وبلىسى,
ەكىباستۇز قالاسى
