قوعام • 16 قازان، 2022

العىس ارقالاعان جاۋىنگەر

بيىل قىركۇيەك ايىندا قوستاناي وبلىسى اۋليەكول اۋدانىندا بولعان الاپات ءورتتى سوندىرۋگە بەلسەندىلىك تانىتقاندار پرەزيدەنت اتىنان مەملەكەتتىك ماراپاتتارعا لايىق دەپ تانىلدى. سولاردىڭ قاتارىندا قارۋلى كۇشتەردىڭ جاۋىنگەرى، اسكەرگە بورىشىن وتەۋگە كەلگەنىنە نەبارى ءتورت اي بولعان الەكساندر فلەيتلينگ تە بار.

ورالحان احماديا

جاس جاۋىنگەر توتەنشە جاعدايلار ءمينيسترى يليا ءيليننىڭ قولىنان مەملەكەت باسشىسى قول قويعان «ەرلىگى ءۇشىن» مەدالىن الدى. وتان الدىنداعى بورىشىن 31 775 اسكەري بولىمىندە ابىرويلى اتقارىپ جۇرگەن الەكساندردى اڭگىمەگە تارتتىق. 18 جاستاعى الەكساندر بالا كەزىنەن جاۋاپكەرشىلىكتىڭ سالماعى قانداي ەكەنىن ءبىلىپ وسكەن ۇيدەگى ءتورت بالانىڭ ۇلكەنى ەكەن.

«وتباسىدا التى جانبىز، – دەپ اڭگىمەسىن قازاقشا باستادى الەكساندر. – قازاق اۋىلىندا تۋىپ-ءوستىم، انام – قازاق، مەكتەپتى دە، كوللەدجدى دە قازاقشا وقىپ ءبىتىردىم، ونىڭ ۇستىنە مەملەكەتتىك ءتىلدى ءبىلۋ – مىندەتىمىز».

شىعىس قازاقستان وبلىسىنىڭ ءۇرجار اۋدانىنا قاراستى جاڭا تىلەك اۋىلىندا تۋىپ-وسكەن الەكساندردىڭ تراكتور جۇرگىزىپ ۇيرەنگەنىنە ەكى جىل بولىپتى. ءتىپتى اسكەردە جۇرگەن از عانا ۋاقىتتا بمپ (جاياۋ اسكەر ماشيناسى) كولىگىن جۇرگىزۋدى ۇيرەنىپ العان. 9-سىنىپتى بىتىرگەن سوڭ ۇرجارداعى اۋىلشارۋاشىلىق كوللەدجىن ءتامامداپ، بىردەن اسكەرگە اتتانعان. «گەنەرال بولۋدى ارماندامايتىن سارباز جوق»، دەمەكشى الەكساندر دا «وتان الدىنداعى بورىشىن وتەگەن سوڭ مىندەتتى تۇردە اسكەري جوعارى وقۋ ورنىنا ءتۇسىپ، وفيتسەر بولامىن»، دەيدى.

«اسكەرگە كەلگەندە ماعان قولداۋ كورسەتكەن كومانديرىم مايور رۋستام سيتياكوۆتەن كوپ نارسە ۇيرەندىم. بولاشاقتا كومانديرىم سياقتى وفيتسەر بولىپ، اسكەردە قىزمەت جاساعىم كەلەدى. قازىرگى كەزدە اسكەرگە بارعىسى كەلمەيتىن جىگىتتەر بار. سوندا ەلدى، جەردى كىم قورعايدى؟ ەل باسىنا كۇن تۋسا، كەز كەلگەن ماماندىق يەسى وتاندى قورعاۋعا ءتيىس. بەيبىت كۇننىڭ وزىندە ءورت سوندىرۋگە قانشاما ادام، نەشە تەحنيكا جۇمىلدىرىلدى؟ ورتكە ورانعان دالا، بىرنەشە شاقىرىمعا سوزىلعان تۇتىنگە قاراماستان، سول ساتتە ءورت سوندىرۋدەن باسقا باسىما ەشقانداي قورقىنىشتى وي كەلگەن جوق»، دەيدى الەكساندر.

التى جىل گرەك-ريم كۇرەسىمەن اينالىسقان الەكساندر اسكەري ءبولىم ىشىندەگى سپورتتىق جارىستاردا ناتيجەلى ونەر كورسەتىپ ءجۇر. وتان الدىنداعى بورىشىن وتەگەن سوڭ ءبىلىمدى وفيتسەر بولۋدى ارماندايتىنىن ايتىپ قالدى. ءبىلىمدى ازامات – ەلدىڭ كەلەشەگى. بولاشاقتا وتباسىنا كومەكتەسىپ قانا قويماي، ەل قورعانى بولار مىقتى وفيتسەر بولار دەگەن ءۇمىت تە جوق ەمەس. ايتپاقشى، الەكساندر ءبولىم باسشىلىعى بەرگەن 10 كۇن دەمالىستى پايدالانىپ، تۋعان اۋىلىنا بارىپ قايتىپتى. «جاڭا تىلەكتە بىرگە ءوسىپ، بىرگە وقىعان دوستارىممەن، اۋىلداستارىممەن كەزدەسىپ، ساعىنىشىمدى باستىم»، دەيدى. الەكساندردىڭ العان ماراپاتىنا اتا-اناسى مەن اۋىلداستارى، ساباق بەرگەن مۇعالىمدەرى قاتتى قۋانعان كورىنەدى.