وسى رەتتە پرەزيدەنت قازاقستان حالقىنا جولداعان جاڭاجىلدىق قۇتتىقتاۋىندا: «مەن مەملەكەت باسشىسى رەتىندە وسكەلەڭ ۇرپاقتىڭ بولاشاعىنا باسا ءمان بەرەمىن. جاستارعا زور ءۇمىت ارتامىن. جاستارىمىز اتقارىلىپ جاتقان اۋقىمدى جۇمىستىڭ, رەفورمالاردىڭ يگىلىگىن مىندەتتى تۇردە كورەدى. ولاردىڭ اراسىندا كوزى اشىق, كوكىرەگى وياۋ, ويى ۇشقىر ازاماتتار از ەمەس. ءبىز وسكەلەڭ ۇرپاققا جول اشۋ ءۇشىن بارلىق جاعدايدى جاساۋىمىز كەرەك. بالالار – مەملەكەتىمىزدىڭ جارقىن بولاشاعىنىڭ كەپىلى. سوندىقتان دا الداعى جىلدى بالالار جىلى دەپ جاريالاۋ كەرەك دەپ ەسەپتەيمىن. اڭگىمە جالاڭ ۇران مەن مەرەكەلىك ءىس-شارالار تۋرالى ەمەس. ءبىرىنشى كەزەكتە بيلىك تاراپىنان بالالاردى قورعاۋ ءۇشىن دەنساۋلىق ساقتاۋ, ءبىلىم بەرۋ, الەۋمەتتىك قولداۋ باعىتىندا ناقتى ءىس-شارالار قولعا الىنۋى كەرەك. وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعى – ءبىزدىڭ جالپىۇلتتىق مىندەتىمىز», دەدى قاسىم-جومارت توقاەۆ.
ەندەشە, رەسپۋبليكانىڭ ءۇشىنشى مەگاپوليسىندە دە بالالار جىلى اياسىندا ءبىرشاما ءىس-شارا ۇيىمداستىرىلىپ, يگى ىستەر قولعا الىندى. ءالى دە جالعاسىن تاۋىپ جاتىر. سونىڭ ءبىرى – شىمكەنت قالالىق ءبىلىم باسقارماسىنا قاراستى مەكتەپكە دەيىنگى دامىتۋ ورتالىعىنىڭ ۇيىمداستىرۋىمەن قالالىق «جاسىل تەحنولوگيالار بالانىڭ كوزىمەن» اتتى تاقىرىپتاعى بايقاۋ. ءىس-شارا وسى جىلدىڭ 11 قازانىندا «اينالايىن بالاپان» بوبەكجاي بالاباقشاسىنىڭ عيماراتىندا ءوتتى. بايقاۋعا 34 بالاباقشادان 100-گە جۋىق بالدىرعان قاتىستى.
بايقاۋدىڭ ماقساتى ەكولوگيالىق مادەنيەتتى قالىپتاستىرۋعا جانە وسكەلەڭ ۇرپاقتىڭ نازارىن قورشاعان ورتا پروبلەمالارىنا اۋدارۋعا باعىتتالدى.
سايىس قورىتىندىسى بويىنشا ەڭ ۇزدىك دەپ تانىلعان №61 «نۇرتاس» بوبەكجاي باقشاسىنان كەلگەن مەيىربەك ماعجاننىڭ جانە №70 «شولپان» بوبەكجاي باقشاسىنان كەلگەن اينيسا ابزالقىزىنىڭ جۇمىستارى رەسپۋبليكاعا جولداندى.
جالپى, بالالار تاربيەسى مەن بىلىمىنە جاۋاپتىنىڭ ءبىرى ۇستازدار دەسەك, مەملەكەت پەداگوگتەرگە قامقورلىقتى اياپ جاتقان جوق. ماسەلەن, 2020 جىلدان باستاپ بۇگىنگە دەيىن ۇستازدار جالاقىسى 75 پايىزعا ءوستى. 2023 جىلى تاعى 25 پايىزعا ءوسىپ, ناتيجەسىندە 2019 جىلمەن سالىستىرعاندا 2 ەسە ارتادى.
سونىمەن بىرگە بالالار جىلى شەڭبەرىندە بيۋدجەتتەن 44,6 ملرد تەڭگە قارجى ءبولىنىپ, باستاۋىش سىنىپ وقۋشىلارى 100 پايىزعا تەگىن ىستىق تاماقپەن قامتاماسىز ەتىلدى. ءبىلىم ۇيىمدارى وقۋشىلاردىڭ قاۋىپسىزدىگى ءۇشىن بەينەباقىلاۋ جۇيەسىمەن, دابىل باتىرماسىمەن تۋرنيكەتتەر جانە ءى دارەجەلى مامانداندىرىلعان كۇزەتپەن تولىق قامتىلدى. ال ماتەريالدىق-تەحنيكالىق بازانى جاڭارتۋ ۇلەسى 32-دەن 72 پايىزعا ارتتى.
وقۋشىلاردى قوسىمشا بىلىممەن قامتۋ ماقساتىندا سپورت جانە مادەنيەت سالالارىنا العاش رەت جان باسىنا قارجىلاندىرۋ جۇيەسى ەنگىزىلدى. سول ارقىلى بالالار قوسىمشا ۇيىرمەلەرگە قاتىسۋعا مۇمكىندىك الىپ, مەكتەپتەن تىس قوسىمشا ءبىلىم الاتىن وقۋشىلار ۇلەسى ءبىر جىلدا 49-دان 76 پايىزعا ءوستى. بۇل كورسەتكىشتى جەرگىلىكتى اكىمدىك تاراپىنان 2023 جىلى 85 پايىزعا, ال 2025 جىلعا قاراي 100 پايىزعا جەتكىزۋ جوسپارلانىپ وتىر.
سونداي-اق قالا ۇستازدارىنىڭ ەرەن ەڭبەگىنىڭ ناتيجەسىندە, وقۋشىلار حالىقارالىق, رەسپۋبليكالىق پاندىك ءبىلىم سايىستارىنان 10 التىن, 17 كۇمىس, 33 قولانى جەڭىپ الدى. 200-دەن استام وقۋشى جۇلدەلى ورىندار يەلەندى.
شىمكەنت قالاسىنداعى 871 ءبىلىم بەرۋ ۇيىمىندا 440 مىڭعا جۋىق تاربيەلەنۋشى, وقۋشى مەن ستۋدەنت ءبىلىم الادى. ياعني مەگاپوليستەگى ءاربىر ءۇشىنشى ادام ۇستازدان ءتالىم تەرگەن جاس.
بۇگىنگى تاڭدا جاس ۇرپاقتىڭ قامى ءۇشىن جاسالعان تىرلىكتىڭ ءبارى ء«بىلىمدى ۇلت» ساپالى ءبىلىم بەرۋ» ۇلتتىق جوباسى مەن پرەزيدەنتتىڭ قازاقستان حالقىنا ارناعان جولداۋى اياسىندا ىسكە اسىپ جاتىر. وسى ورايدا بالدىرعانداردى بالاباقشامەن قامتاماسىز ەتۋ ماسەلەسىنە كەلسەك, 2-6 جاس ارالىعىندا بالالاردىڭ – 89 پايىزى, ال 3-6 جاستاعى بالدىرعانداردىڭ ءجۇز پايىزى بالاباقشاعا بارادى. 2025 جىلعا دەيىن قوسىمشا 105 بالاباقشانى ىسكە قوسۋ ارقىلى قاجەتتىلىك ءبىرجولاتا شەشىلەتىن بولادى.
قۇدايعا شۇكىر, مەگاپوليستە مەكتەپ وقۋشىلارىنىڭ سانى جىلدان-جىلعا ارتىپ كەلەدى. ايتالىق, سوڭعى بەس جىلدا 106 مىڭنان 245 مىڭ وقۋشىعا نەمەسە 2,3 ەسەگە ۇلعايدى. الداعى 5 جىلدا مەكتەپ تابالدىرىعىن 315 مىڭعا جۋىق وقۋشى اتتايدى دەپ كۇتىلۋدە. وسىعان وراي جەرگىلىكتى اكىمدىك 2021-2025 جىلدار ارالىعىندا 101 مەكتەپ سالۋدى كوزدەپ وتىر. سوڭعى ەكى جىلدىڭ وزىندە شاھاردا 58 ورتا ءبىلىم بەرۋ ۇيىمى پايدالانۋعا بەرىلدى.
سونىمەن قاتار مەملەكەت باسشىسىنىڭ «جايلى مەكتەپ» جوباسى بويىنشا شىمكەنتتە 2025 جىلعا قاراي 32 مەكتەپتىڭ ىرگەسى قالانادى. سوڭعى ەكى جىلدا جەكە ينۆەستورلار جان باسىنا قارجىلاندىرۋ باعدارلاماسى ەسەبىنەن جاڭادان 50 مەكتەپ سالىپ, 21 300 وقۋشىعا جاعداي جاسالدى.
الداعى ۋاقىتتا تاعى دا 25 مەكتەپتىڭ قۇرىلىسىن جۇرگىزۋگە ۇسىنىستار تۇسۋدە. سونىڭ ناتيجەسىندە, ءۇش اۋىسىمدا ءبىلىم بەرەتىن مەكتەپتەر ماسەلەسى 2023 جىلى, ال سىنىپ تولىمدىلىعى جوعارى (دەفيتسيت) مەكتەپتەر پروبلەماسى 2025 جىلى تولىعىمەن شەشىلەتىن بولادى.
بالالار جىلىنىڭ مەگاپوليستىڭ ءبىلىم بەرۋ سالاسىنداعى جەمىسى, مىنە, وسىنداي!
شىمكەنت
