قاسىم-جومارت توقاەۆ اوسشك سامميتىنە قاتىسۋ ءۇشىن استاناعا ارنايى كەلىپ, ۇيىمدى ودان ءارى ينستيتۋتسيونالدى تۇرعىدا دامىتۋعا باعىتتالعان ەلىمىزدىڭ باستامالارىن قولداعان پاكىستاننىڭ ۇكىمەت باسشىسى شاحباز شاريفكە ريزاشىلىعىن ءبىلدىردى.
پرەزيدەنت پاكىستاندى قازاقستاننىڭ وڭتۇستىك ازياداعى نەگىزگى سەرىكتەستەرىنىڭ ءبىرى ەكەنىن اتاپ ءوتىپ, ەكى ەل اراسىنداعى ساۋدا-ەكونوميكالىق بايلانىستاردىڭ دامۋ قارقىنىنا كوڭىلى تولاتىنىن جەتكىزدى.
كەزدەسۋدە كولىك, ترانزيتتىك لوگيستيكا جانە ەنەرگەتيكا سالالارىندا ىنتىماقتاستىق ورناتۋدىڭ پەرسپەكتيۆالارى زەردەلەندى. ەكى ەل اراسىنداعى تىكەلەي اۋە قاتىناسىن جاقىن ارادا قالپىنا كەلتىرۋگە, سونداي-اق ساۋدا-ەكونوميكالىق, مادەني-گۋمانيتارلىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيانىڭ جۇمىسىن جانداندىرۋ ماڭىزدى ەكەنىنە نازار اۋدارىلدى.
پاكىستان پرەمەر-ءمينيسترى شاحباز شاريف قاسىم-جومارت توقاەۆقا پاكىستان پرەزيدەنتى اريف ءالۆيدىڭ سالەمىن جەتكىزىپ, مەملەكەتتەر اراسىنداعى قارىم-قاتىناستاردىڭ قارقىندى دامىپ كەلە جاتقانىن اتاپ ءوتتى.
