انتونيۋ گۋتەرريش ءوز سوزىندە بۇگىندە سەنىم مەن ىنتىماقتىڭ السىرەپ بارا جاتقانىن, سونىمەن بىرگە قاقتىعىستاردىڭ گەوساياسي شيەلەنىسىنىڭ ارتىپ وتىرعانىن اتاپ ءوتتى. سونداي-اق ول بۇگىندە داعدارىس حالىقتىڭ ەڭ وسال توپتارىنا اسەر ەتىپ, كەدەيشىلىكتى, اشتىقتى تەرەڭدەتىپ, قوعامدىق-ساياسي تولقۋلاردى قوزدىرىپ وتىرعانىن ايتتى. وسى اسا قيىن جاعدايدا, بۇۇ باس حاتشىسى شاقىرعانداي, ايماقتىق ىنتىماقتاستىقتى نىعايتۋ بۇرىنعىدان دا ماڭىزدىراق.
«مەن ايماقتىق الدىن الۋدى جانە ايماقتىق ۇيىمدارمەن ءوزارا ارەكەتتەسۋدى كورسەتەتىن بەيبىتشىلىكتىڭ جاڭا كۇن ءتارتىبىن قۇرۋعا شاقىرامىن. سوڭعى 30 جىلدا اوسشك ازيا ەلدەرى اراسىنداعى ماڭىزدى ديالوگ الاڭىنا اينالدى. ءبىز بارلىعىمىز بەيبىت جانە گۇلدەنگەن ازيادان پايدا كورىپ وتىرمىز, مەن سەرىكتەستىگىمىزگە, ورتاق ماقساتتارىمىزعا – تۇراقتى دامۋدى ىلگەرىلەتۋگە, ادام قۇقىقتارىن, بەيبىتشىلىك پەن تۇراقتىلىقتى ىلگەرىلەتۋگە, كوپجاقتى ىنتىماقتاستىقتى نىعايتۋعا ريزامىن. زامانىمىزدىڭ سىناقتارىن بىرگە ەڭسەرىپ, ازيا مەن الەمنىڭ جاقسى بولاشاعىن قامتاماسىز ەتەيىك», دەدى انتونيۋ گۋتەرريش ءوزىنىڭ بەينە ۇندەۋىندە.
بۇگىن استانادا قازاقستان پرەزيدەنتى قاسىم-جومارت توقاەۆتىڭ توراعالىعىمەن ازياداعى ءوزارا ءىس-قيمىل جانە سەنىم شارالارى كەڭەسىنىڭ (اوسشك) VI ءسامميتى ءوتىپ جاتىر. وتىرىسقا ازەربايجان, يراك, يران, قىرعىزستان, پالەستينا, تاجىكستان, رەسەي, تۇركيا, وزبەكستان, كاتار, بەلارۋس سياقتى 11 ەلدىڭ مەملەكەت باسشىلارى قاتىسۋدا. ەلورداعا ۆەتنامنىڭ ۆيتسە-پرەزيدەنتى, قىتاي حالىق رەسپۋبليكاسىنىڭ ۆيتسە-پرەزيدەنتى جانە بەس مينيستر دە كەلدى.
