بيىل ءساۋىر ايىندا اناسى بالانىڭ ءىشى تىم ۇلكەيە باستاعانىن بايقاپ, جۇكتى ايەلگە ۇقساۋىنا الاڭداعان. سودان كەيىن جاسالعان مەديتسينالىق زەرتتەۋلەر ءىشتىڭ كەڭ ءتۇزىلۋىن كورسەتكەن. ناتيجەسىندە, بالانى استاناعا اپارىپ, شۇعىل تۇردە №2 قالالىق بالالار اۋرۋحاناسىنا جاتقىزدى. ناۋقاس اۋرۋحاناعا اۋىرسىنۋ سيندرومى, تومەن گەموگلوبين دەڭگەيى, ورتاشا اۋىرلىق جاعدايىمەن تۇسكەن. ىشىندەگى ىسىكتىڭ تىم ۇلكەيىپ كەتكەنى سونشالىق, باسىن كوتەرىپ ءجۇرۋى قيىندىق تۋعىزدى.
سودان لاپاروسكوپيالىق وپەراتسيا كەزىندە 8 ليتردەن اسا سۇيىقتىق الىنىپ تاستالدى. ىسىك وڭ جاق انالىق بەزدە پايدا بولعان. وڭ جاق انالىق بەزدىڭ تىندەرى وزگەرگەندىكتەن, دارىگەرلەر بالانىڭ دەنساۋلىعىنا قاۋىپ توندىرمەۋگە شەشىم قابىلداپ, وڭ جاق انالىق بەزدى تۇتىكپەن الىپ تاستادى.
جوسپارلى حيرۋرگيا ءبولىمىنىڭ مەڭگەرۋشىسى ازامات ءورازالينوۆتىڭ ايتۋىنشا, دارىگەرلەر اسا كۇردەلى وپەراتسيا جاساعان. «ناۋقاستىڭ رەپرودۋكتيۆتى فۋنكتسياسى زارداپ شەككەن جوق, ويتكەنى ەكىنشى انالىق بەز جۇمىس ىستەپ تۇر. اسا ۇقىپتىلىقپەن ءۇش تەسىك جاسالىپ, 3 سم-گە دەيىن كەسىلدى. قازىر جەتكىنشەك اۋرۋحانادان شىعارىلدى, ەندى ءوز قالاسىندا گينەكولوگتىڭ باقىلاۋىندا بولادى», دەيدى ول.
اناسى وپەراتسيا جاساپ, ۇلكەن كومەگىن كورسەتكەن دارىگەرلەرگە العىسىن جاۋدىردى. اسىرەسە, شۇعىل تۇردە شەشىم قابىلداپ, وپەراتسيانى ساپالى ءارى ءساتتى جاساپ شىققان مامانداردىڭ كاسىبيلىگىن ەرەكشە اتاپ ءوتتى.
بۇعان قوسا ەلوردالىق حيرۋرگتەر بەس جاسار بالاعا سيرەك كەزدەسەتىن پەركۋتاندى گاستروستوميا بويىنشا تاعى ءبىر وپەراتسيا جاسادى.
تابيعي جولمەن تاماقتانۋعا مۇمكىندىك بەرمەيتىن بىرقاتار نەۆرولوگيالىق اۋرۋلار بار. گاستروستوميانى ورىنداۋ اۋىر اۋرۋلارى بار ناۋقاستاردىڭ تولىققاندى دۇرىس تاماقتانۋىنا مۇمكىندىك بەرەدى. استانالىق حيرۋرگتەر ءدال وسىنداي وپەراتسيا جاساپ, گاستروستوميالىق تۇتىكتى ورناتۋ ارقىلى ناۋقاستىڭ دۇرىس تاماقتانۋىن قالپىنا كەلتىردى.
