بيىل سەگىزىنشى مارتە قورىتىندىلانىپ وتىرعان تاعىلىمدى شارا وبلىس اكىمدىگىنىڭ قوعامدىق دامۋ باسقارماسىنىڭ ۇيىمداستىرۋىمەن ءوتتى.
ۇيىمداستىرۋشىلاردىڭ ايتۋىنشا, «مەرەيلى وتباسى» ۇلتتىق بايقاۋىن وتكىزۋدەگى باستى ماقسات – قازىرگى قوعامداعى ادامگەرشىلىك قۇندىلىقتارىن جاڭعىرتۋ, سونداي-اق وتباسى مارتەبەسىن كوتەرىپ, اتا-انالاردىڭ بالا تاربيەسىندەگى جاۋاپكەرشىلىگىنىڭ ارتۋىنا ىقپال ەتۋ. وسى سەگىز جىلدىڭ ىشىندە بايقاۋعا 800-دەن استام وتباسى قاتىستى. بىلتىر 126 وتباسى باق سىناعان. وسى جىلى وبلىس بويىنشا 108 وتباسى قاتىسىپ وتىر.
بۇل جولى اۋىلدىق, اۋداندىق ىرىكتەۋدەن 20 وتباسى وزىپ شىقتى. وبلىستىق كەزەڭگە وتكەندەرگە اقشالاي جۇلدە تاعايىندالىپ, ۇلگى-ونەگەسىمەن ەرەكشەلەنگەن نەمەسە ونەرپاز وتباسىلارعا, سونداي-اق اۋلەت بولىپ ەڭبەككە جۇمىلىپ, كاسىپپەن اينالىسىپ جاتقان وتباسىلارعا ارنايى سىيلىق تابىس ەتىلدى.
سالتاناتتى جيىندا قوستاناي وبلىسى قوعامدىق دامۋ باسقارماسى باسشىسىنىڭ ورىنباسارى ابىلايحان كاكەنوۆ ءسوز سويلەپ, جەڭىمپازداردى قۇتتىقتادى.
– قازاق ءۇشىن قاشاندا كيەلى سانالاتىن ءبىر شاڭىراقتىڭ استىندا بەرەكەلى ءومىر ءسۇرۋدىڭ ءمان-ماڭىزىن ناسيحاتتاۋدا ۇلتتىق كونكۋرستىڭ الار ورنى ايرىقشا, تاعىلىمدى ءىس-شارا دەپ ايتار ەدىم. وسى سايىستا باق سىناعانداردىڭ بارلىعى دا مەرەيلى وتباسى, ءتالىم-تاربيەنىڭ قاينار كوزى, – دەدى ابىلايحان كاكەنوۆ.
بيىلعى بايقاۋعا قاتىسقانداردىڭ قاي-قايسىسى دا جەڭىسكە لايىقتى. دەگەنمەن كوميسسيا مۇشەلەرىنىڭ شەشىمىمەن قاراسۋ اۋدانىندا تۇراتىن شارىپوۆتەر اۋلەتى جەڭىمپاز اتاندى. بولات ساتىبالدى ۇلى مەن مارينا ۆاسيلەۆنانىڭ وتاسقانىنا بيىل 33 جىل بولىپتى. ەكەۋى دە قاراپايىم ەڭبەك ادامدارى. بالالارى ءدامىر مەن ديانا ءار ءتۇرلى سالادا ەڭبەك ەتىپ, تابىسقا جەتىپ ءجۇر.
– اۋلەتىمىزدە بولعان بىرقاتار قۋانىشتى وقيعالاردى سەبەپ ەتىپ, بيىل كونكۋرسقا ءوتىنىش بەردىم. تۋىستارىمىز, ارىپتەستەرىمىز, دوستارىمىز قولداۋ كورسەتتى. ءدال قازىرگى كوڭىل كۇيىمدى سوزبەن ايتىپ جەتكىزە الماسپىن. وتباسىم ءۇشىن قۋانىپ تۇرمىن, – دەدى بولات ءشارىپوۆ.
وسى سىندا ۇزدىكتەردىڭ قاتارىنان كورىنگەن جيىرما وتباسىنا وبلىس اكىمى ارحيمەد مۇحامبەتوۆتىڭ قولى قويىلعان ديپلومدار مەن اقشالاي سىيلىقتار تابىس ەتىلدى. ال شارىپوۆتەر وتباسى ەندى رەسپۋبليكالىق كەزەڭدە باق سىنايتىن بولادى.
قوستاناي وبلىسى
