ء«بىز باۋىرلاس تۇركيا ەلىمەن تۇراقتى مەملەكەتارالىق قاتىناس ورناتتىق. بيىلدىڭ وزىندە جوعارى دەڭگەيدەگى بىرنەشە ساپار بولدى. بىرقاتار ماڭىزدى قۇجاتقا قول قويىلدى. مەنىڭ مامىر ايىندا تۇركياعا مەملەكەتتىك ساپارمەن بارعانىمدى بىلەسىزدەر. سول كەزدە رەجەپ مىرزا ەكەۋمىز كەڭەيتىلگەن ستراتەگيالىق ارىپتەستىك تۋرالى بىرلەسكەن مالىمدەمە قابىلدادىق. تۇركيا – قازاقستاننىڭ وتە ماڭىزدى ستراتەگيالىق سەرىكتەسى», دەدى پرەزيدەنت.
مەملەكەت باسشىسى رەجەپ تايپ ەردوعاننىڭ ەكى ەل اراسىنداعى ىنتىماقتاستىقتى دامىتۋعا قوسقان ۇلەسىن جوعارى باعالايتىنىن ايتىپ, تۇركيانىڭ جاھاندىق جانە ايماقتاعى پروبلەمالاردى شەشۋگە بەلسەندى قاتىسىپ وتىرعانىنا توقتالدى.
پرەزيدەنتتىڭ ايتۋىنشا, ەكىجاقتى ساۋدا-ەكونوميكالىق جانە ينۆەستيتسيالىق ىنتىماقتاستىق – ءبىزدىڭ بايلانىستارىمىزدىڭ وزەگى. سوندىقتان الداعى ۋاقىتتا ەكى ەل اراسىنداعى ساۋدا اينالىمىن 10 ميلليارد دوللارعا جەتكىزۋ كوزدەلىپ وتىر. مەملەكەت باسشىسى بۇگىنگى كەزدەسۋ بارىسىندا كولىك-ترانزيت سالاسىنداعى ىنتىماقتاستىقتىڭ دامۋ پەرسپەكتيۆاسىنا نازار اۋداردى.
«ترانسكاسپي حالىقارالىق كولىك باعدارى ارقىلى تاسىمالدى ۇلعايتۋعا ەكى ەل دە مۇددەلى. وڭىردەگى تۇراقتىلىقتى ساقتاۋ ءۇشىن بۇل ستراتەگيالىق جوبانىڭ زور ماڭىزى بار. بيىل 7 ايدا وسى باعىت ارقىلى تاسىمالداناتىن جۇك كولەمى 2,5 ەسەگە ارتىپ, 1 ميلليون تونناعا جەتتى. وسى رەتتە, مەملەكەتتەرىمىزدىڭ «ورتا ءدالىزدى» دامىتۋى قازىر وتە ماڭىزدى», دەدى مەملەكەت باسشىسى.
كەلىسسوزدەر بارىسىندا جاھاندىق وزەكتى ماسەلەلەر دە نازاردان تىس قالمادى. پرەزيدەنت كوپتەگەن حالىقارالىق ماسەلەلەر بويىنشا ەكى ەلدىڭ ۇستانىمى جاقىن ەكەنىن اتاپ ءوتتى.
ء«بىز كوپجاقتى ديپلوماتيانى ودان ءارى نىعايتۋعا ەرەكشە ءمان بەرەمىز. ەكى ەلدىڭ سەرىكتەستىگى بىرىككەن ۇلتتار ۇيىمى, تۇركى مەملەكەتتەرى ۇيىمى, ازياداعى ءوزارا ءىس-قيمىل جانە سەنىم شارالارى جونىندەگى كەڭەس سياقتى كوپجاقتى قۇرىلىمدار اياسىندا ويداعىداي دامىپ كەلەدى. ەرتەڭ تۇركيا پرەزيدەنتىمەن بىرگە ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ 6-شى سامميتىنە قاتىسامىز», دەدى مەملەكەت باسشىسى.
ءوز كەزەگىندە تۇركيا پرەزيدەنتى قازاقستانعا جاساعان مەملەكەتتىك ساپارىنىڭ ناتيجەسىنە كوڭىلى تولاتىنىن جەتكىزدى.
ء«بىز باۋىرلاس قازاقستاننىڭ ەگەمەندىگىن, تەرريتوريالىق تۇتاستىعىن, بەيبىتشىلىگى مەن تۇراقتىلىعىن ءاردايىم قولدايمىز. ءبىزدىڭ بىرلىگىمىز بەن ىنتىماقتاستىعىمىز ماڭگىلىك! قازاقستان پرەزيدەنتىنىڭ باسشىلىعىمەن جۇرگىزىلىپ جاتقان رەفورمالاردى جوعارى باعالايمىن. الداعى پرەزيدەنت سايلاۋىنىڭ قورىتىندىسى قازاقستانعا يگىلىك اكەلسىن», دەدى رەجەپ تايپ ەردوعان.
