قر پرەزيدەنتتىگىنە كانديداتتاردى ۇسىنۋ كەشە ساعات 18:00-دە اياقتالدى.
«ورتالىق سايلاۋ كوميسسياسىنا رەسپۋبليكالىق قوعامدىق بىرلەستىكتەر ۇسىنعان 12 كانديداتتىڭ قۇجاتتارى ۇسىنىلدى», دەدى وسك حاتشىسى مۇحتار ەرمان.
كەزەكتەن تىس پرەزيدەنت سايلاۋىنا مەملەكەت باسشىسى قاسىم-جومارت توقاەۆ حالىقتىق كواليتسيادان, مەيرام قاجىكەن «امانات» قازاقستان كاسىپوداقتار دوستاستىعى» رەسپۋبليكالىق كاسىپوداقتار بىرلەستىگىنەن قاتىسۋدى جوسپارلاپ وتىر. سونداي-اق ۇلتتىق كاسىبي الەۋمەتتىك قىزمەتكەرلەر اليانسىنان قاراقات ابدەن, «اۋىل» پارتياسىنان جيگۋلي دايراباەۆ, جالپىۇلتتىق سوتسيال-دەموكراتيالىق پارتيادان نۇرلان اۋەسباەۆ سايلاۋعا تۇسەدى.
سونداي-اق تالعات ەرعاليەۆ قازاقستان قۇرىلىسشىلار وداعىنان, جۇماتاي اليەۆ «حالىق دەموگرافياسى» قوعامدىق بىرلەستىگىنەن, سالتانات تۇرسىنبەكوۆا «قازاق تالدارى – داستۇرگە جول» رەسپۋبليكالىق قوعامدىق بىرلەستىگىنەن, نۇرجان التاەۆ «مۇقالماس» رقب-نان, حايرۋللا عابجاليلوۆ ورالمانداردىڭ «اسار» رەسپۋبليكالىق قوعامدىق بىرلەستىگىنەن ءوز كانديداتۋرالارىن ۇسىندى.
ايتا كەتسەك, قر پرەزيدەنتتىگىنە كانديداتتاردى تىركەۋدىڭ سوڭعى كۇنى ورتالىق سايلاۋ كوميسسياسىنا «قازاقستان فۋتبول اۋەسقويلارى ليگاسى» قوعامدىق بىرلەستىگىنەن باقىت جاڭاباەۆ جانە «پراكتيكالىق پسيحولوگيا» رەسپۋبليكالىق قوعامدىق بىرلەستىگىنەن فاتيما بيزاكوۆا ءوز قۇجاتتارىن تاپسىردى.
سايلاۋ 20 قاراشاعا جوسپارلانعان. قازاقستان پرەزيدەنتتىگىنە كانديداتتار ءۇشىن سايلاۋ جارناسىنىڭ مولشەرى 3 ملن تەڭگەنى قۇرايدى. كانديداتتىڭ تۋى بويىنشا قر ازاماتتىعى, جوعارى ءبىلىمى, ەل اۋماعىندا سوڭعى 15 جىل تۇرۋى ءتيىس. جاسى كەم دەگەندە 40 جاستا بولۋى كەرەك. ۇمىتكەردىڭ بەلسەندى سايلاۋ قۇقىعى بولۋى, مەملەكەتتىك قىزمەتتە نەمەسە سايلانبالى لاۋازىمداردا كەمىندە 5 جىل جۇمىس تاجىريبەسى بولىپ, مەملەكەتتىك ءتىلدى ەركىن مەڭگەرۋى ءتيىس. قازاقستان پرەزيدەنتتىگىنە ءاربىر كانديدات 118 مىڭ قول جيناۋى ءتيىس.
