– مەن 1998-2008 جىلدارى جىلىوي اۋدانىنداعى تەڭىز كەن ورنىندا مونتاجداۋشى بولىپ جۇمىس ىستەدىم. كەيىن ۆاحتالىق جۇمىستى قويىپ, جىلقى شارۋاشىلىعىن دامىتۋدى قولعا الدىم. باستاپقىدا ءبىر ءۇيىر جىلقىم بار ەدى. قازىر ەكى ۇيىرگە جەتتى. ءۇش بيەنى ساۋامىز. جىلقىعا قانداي ازىق بەرۋدى بىلمەي, جۇيرىك باپتاۋ, سانىن كوبەيتۋ مۇمكىن ەمەس. ءبىر قاراعاندا, ءشوپ بەرۋمەن ءىس بىتكەندەي كورىنۋى مۇمكىن. جىلقىنىڭ الدىنا ءۇيىپ-توكپەي, قاجەتتى ازىقتى ولشەپ, ەسەپتەپ بەرۋ كەرەك ەكەن. ەڭ تابيعي ازىق – دالا ءشوبى. جاڭا ورىلعان ءشوپ بولسا, ءتىپتى نارلەنە تۇسەدى. جانۋار باپتاۋىڭا قاراي ءسۇت بەرەدى, – دەيدى تالاپ قاجيموۆ.
ەرلى-زايىپتىلار ساۋمال مەن قىمىز ساتۋدى 2017 جىلى باستاعان. وتاناسى زامزاگۇل جاڭاباەۆا اۋىلداعى ق.قالىبەكوۆ اتىنداعى ورتا مەكتەپتە بيولوگيا پانىنەن ءدارىس بەرەدى. العاشىندا ساۋمال ساتۋ تۋرالى ويى بولماعان.
– ەنەمنىڭ اسقازانى اۋىرىپ, سول كىسىنىڭ دەنساۋلىعى ءۇشىن بيە ساۋدى باستادىم. ساۋمالدى كۇندەلىكتى ۇزبەي ىشكەننەن كەيىن ەنەمنىڭ دەنساۋلىعى جاقساردى. سودان بەرى بيەنى ۇزبەي ساۋىپ كەلەمىن. جۇزگە جۋىق تۇراقتى تۇتىنۋشىمىز بار. بيە ساۋدى مامىر ايىنان قازانعا دەيىن جالعاستىرامىن. ءبىر بيە كۇنىنە 6-7 رەت ساۋىلادى. ءبىر ساۋعاندا 1 ليتر ءسۇت بەرەدى. ساۋمالدى ءار ادام دياگنوزى مەن تابەتىنە قاراي ءارتۇرلى مولشەردە ىشەدى. قازىر سۇرانىستىڭ كوبى اتىراۋ قالاسىنان بولىپ تۇر, –دەيدى زامزاگۇل جاڭاباەۆا.
ەندى ەرلى-زايىپتىلار مەملەكەت تاراپىنان بەرىلەتىن قولداۋدى پايدالانۋعا نيەت ەتىپ وتىر. ءسويتىپ وتباسىلىق كاسىپتى كەڭەيتپەك.
اتىراۋ وبلىسى
