ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ 4-ءسامميتى اشىلدى

استانا. 21 مامىر. بۇگىن شانحايدا ازياداعى ءوزارا ءىس-قيمىل جانە سەنىم شارالارى كەڭەسىنىڭ كەزەكتى ءسامميتى باستالدى. وعان مەملەكەت باسشىسى نۇرسۇلتان نازارباەۆ قاتىسۋدا. بۇل تۋرالى egemen.kz ءتىلشىسى حابارلادى. بۇل اۋقىمدى شاراعا قازاقستان, رەسەي, ازەربايجان, يران, پاكىستان, قىرعىزستان, وزبەكستان, تاجىكستان, اۋعانستان, موڭعوليا, شري-لانكا مەملەكەتتەرىنىڭ باسشىلارى جانە كامبودجانىڭ پرەمەر-ءمينيسترى, بۇۇ-نىڭ باس حاتشىسى كەلدى. سونداي-اق, بۇلاردىڭ قاتارىندا 10 حالىقارالىق ۇيىمنىڭ جەتەكشىلەرى بار. شاحتاداعى كەنشىلەردىڭ قازا بولۋىنا بايلانىستى تۇركيا پرەزيدەنتى ابدۋللا گۇل سامميتكە كەلە المادى. ونىڭ ورنىنا تۇركيا سىرتقى ىستەر ءمينيسترى قاتىسۋدا. ازياداعى ءوزارا ءىس-قيمىل جانە سەنىم شارالارى كەڭەسىنىڭ 4-ءسامميتى قارساڭىندا, ياعني, كەشە قىتاي حالىق رەسپۋبليكاسىنىڭ توراعاسى سي تسزينپين رەسمي قابىلداۋ ۇيىمداستىردى. ەستەرىڭىزگە سالا كەتەيىك, بۇگىندە ازيا اۋماعى مەن 26 مۇشە-مەملەكەتتىڭ باسىن بىرىكتىرىپ وتىرعان ازياداعى ءوزارا ءىس-قيمىل جانە سەنىم شارالارى كەڭەسىن قۇرۋ تۋرالى باستامانى پرەزيدەنت نۇرسۇلتان نازارباەۆ 1992 جىلى بۇۇ-نىڭ باس اسسامبلەياسىنىڭ 47-سەسسياسىندا جاريا ەتكەن. جولدىباي بازار. دەرەككوز: egemen.kz. فوتو: Facebook.com.