وڭىرلىك كوممۋنيكاتسيالار قىزمەتىندە وتكەن بريفينگتە الماتى قالاسى اۋماقتىق سايلاۋ كوميسسياسىنىڭ ءتورايىمى جاننا اسانوۆا قالادا 5 مىڭعا جۋىق مۇشەدەن تۇراتىن 600 ۋچاسكەلىك سايلاۋ كوميسسياسى بار ەكەنىن ايتتى.
«بىزدە سەگىز اۋداندىق جانە ءبىر قالالىق كوميسسيا بار. حالىق سانى 5 مىڭنان استى, ياعني بىزدە ۋچاسكەلىك كوميسسيالاردا 4696, اۋداندىق, قالالىق سايلاۋ كوميسسيالارىندا 63 ادام بار. قازىرگى تاڭدا سايلاۋشىلار ءتىزىمى اۋدان اكىمدىكتەرىمەن كەلىسىلىپ جاتىر. ءاربىر ازامات سايلاۋشىلار تىزىمىندە جوق بولسا نەمەسە باسقا قالادا تىركەلگەن بولسا, ءوتىنىش بەرىپ, ءوزىن تىزىمگە قوسا الادى. شارا 30 قازانعا دەيىن جالعاسادى. ودان كەيىن ءوزىڭىزدى تىزىمگە قوسۋ مۇمكىن بولمايدى. وسىنى ەسكەرۋ كەرەك», دەدى جاننا اسانوۆا.
ونىڭ ايتۋىنشا, الدىن الا مالىمەت بويىنشا, قالادا 1,1 ميلليوننان استام سايلاۋشى تىركەلگەن.
الماتى قالاسى اۋماقتىق سايلاۋ كوميسسياسى توراعاسىنىڭ ورىنباسارى ايگۇل قالىقوۆا قازىرگى تاڭدا جەرگىلىكتى اتقارۋشى ورگانداردا سايلاۋشىلار ءتىزىمىن ناقتىلاۋ جۇمىستارى جۇرگىزىلىپ جاتقانىن ايتتى.
ء«بىزدىڭ زاڭدا مىناداي تارماق بار. ەگەر ازامات داۋىس بەرۋگە 30 كۇن قالعاندا سايلاۋ ۋچاسكەسىنە كەلە المايتىنىن بىلسە, وندا ول سايلاۋ كۇنى ناقتى تۇرعىلىقتى جەرى بويىنشا سايلاۋشىلار تىزىمىنە ەنگىزۋ تۋرالى اكىمدىككە ءوتىنىش بەرۋگە قۇقىلى», دەپ ءتۇسىندىردى ول.
سايلاۋ ۋچاسكەلەرىنىڭ ءوزى سايلاۋ كۇنىنە 20 كۇن قالعاندا اشىلادى. ولاردىڭ ورنالاسقان جەرى كەيىنىرەك جاريالانادى.
