قىركۇيەكتىڭ 24-ىنەن باستاپ سولتۇستىك قازاقستان وبلىسىندا 2022-2023 جىلدارداعى جىلىتۋ ماۋسىمى باستالدى. قىركۇيەكتىڭ سوڭعى كۇندەرى مەن قازاننىڭ باسىندا قىلىشىن سۇيرەتكەن قىستىڭ العاشقى ىزعارى ءتۇستى. الايدا قازاننىڭ وسى كۇندەرى قايتا جايلانىپ, قازىر اۋانىڭ تەمپەراتۋراسى كۇندىز 7-8 گرادۋستىق جىلىلىق كورسەتىپ تۇر. ميزامشۋاق تا ءالى الدا سياقتى. بىراق ءتۇننىڭ ىزعارى بار. قازان ايىن تەرىسكەي ءوڭىر سۋىقتان كۇشەنە بەرەتىندىكتەن «كۇشەنشەك» ايى دەپ تە اتايدى. سول «كۇشەنشەكتىڭ» تۇنگى ىزعارى ادامدى ءبۇرىستىرىپ جىبەرەدى.
پەتروپاۆل قالاسىنىڭ اكىمى رۋسلان اڭباەۆتىڭ ايتۋىنا قاراعاندا, وبلىس ورتالىعىندا الەۋمەتتىك سالانىڭ بارلىق 177 نىسانىنا جىلۋ بەرىلدى. ورتالىق جىلۋ جۇيەسىنە قوسىلاتىن 1 115 كوپقاباتتى ءۇيدىڭ 1 109-ىنا جىلۋ بەرىلدى, تەك دايىندىق پاسپورتىن الماعان 6 ۇيگە عانا جىلۋ بەرىلگەن جوق. جاعانى جايلاۋعا سالعان ۇيلەردىڭ تۇرعىندارى ەرتەڭ سۋىق قىسا باستاعاندا شۋلايتىنى بەلگىلى. ءوزىن ءوزى باسقارۋعا ۇيرەنە الماي كەلە جاتقان وسى ىسپەتتى ۇيلەر ءالى دە بارشىلىق.
پەتروپاۆل قالاسىندا 4 مىڭعا جۋىق جەكەمەنشىك تۇرعىن ءۇي سەكتورى بار. ونىڭ ءبىرازى ورتالىق جىلۋ جۇيەسىنە قوسىلعان. بىراق باسىم بولىگى وت جاعادى. جىلۋ ماۋسىمىندا 70 مىڭ تونناداي كومىر تۇتىنادى. 4 قازانداعى مالىمەتكە قاراعاندا, قالانىڭ تەمىر جول تۇيىقتارىندا 35,1 مىڭ توننا كومىر قورى بار. «قالعانى ماۋسىم بويىنا جەتكىزىلىپ تۇرادى», دەدى ر.اڭباەۆ. قولداعى قوردا جينالعان كومىردىڭ 910 تونناسى – «شۇباركول», 811 تونناسى – «مايكوبە», 300 تونناسى – «ەكىباستۇز» كەندەرىنەن. ال قالا تۇرعىندارى جوعارى باعالايتىن, قىزۋى جاقسى «قاراجىرا» كومىرى ءالى جەتكىزىلمەگەن.
وبلىستىق تۇرعىن ءۇي-كوممۋنالدىق شارۋاشىلىعى باسشىسىنىڭ مىندەتىن اتقارۋشى پ.شيلوۆ وڭىردەگى 285 شاقىرىمدىق جىلۋ جۇيەسى تۇگەل دايىندىق ساپىندا تۇرعانىن ايتتى. سونىڭ 6,3 شاقىرىمىنا بيىل كۇردەلى جوندەۋ جۇمىستارى جۇرگىزىلگەن. 602 شاقىرىمنان تۇراتىن سۋ جەتكىزۋ جۇيەلەرى دە تولىعىمەن دايىن. وبلىستاعى 324 اۆتونومدى قازاندىق تا ىسكە قوسىلۋعا ءازىر. ءبىلىم سالاسىنىڭ – 604, دەنساۋلىق ساقتاۋ سالاسىنىڭ – 369 جانە مادەنيەت سالاسىنىڭ 167 نىسانى جىلۋعا قوسىلعان.
وبلىستاعى بۋ قازاندىقتارىمەن جىلىتىلاتىن بارلىق بيۋدجەتتىك مەكەمەلەرگە قاجەتتى 141 مىڭ توننا كومىر جەتكىزىلگەن. الايدا تۇرعىندارعا قاجەتتى 419 مىڭ توننا كومىردىڭ ازىرگە 249 مىڭ تونناسى عانا جەتكىزىلىپتى. اققايىڭ, مامليۋت اۋداندارى قاجەتتى مولشەردىڭ جارتىسىن عانا قامتاماسىز ەتكەن. سونىمەن بىرگە بارلىق ەلدى مەكەندە جىلۋ جۇيەسىنە قوسىلماعان 12 كوپقاباتتى ءۇي بار. ونىڭ جارتىسى – پەتروپاۆل قالاسىندا, قالعان التاۋى – ايىرتاۋ اۋدانىنىڭ ورتالىعى ساۋمالكول اۋىلىندا. «ساۋمالكولدەگى ۇيلەردىڭ جىلۋعا قوسىلماۋى جاڭا ورتالىق قازاندىقتىڭ ىسكە قوسىلماۋىنا بايلانىستى بولىپ وتىر. بۇل قازاندىق العاش رەت سىنالدى, ەگەر اقاۋ بولماسا تۇراقتى تۇردە قوسىلادى», دەدى پاۆەل شيلوۆ.
ناۋرىز ايىندا پەتروپاۆل قالاسىنىڭ جەو-2-دە بولعان اپاتتان حالىق قۇلاعدار. اكىمدىك وتىرىسىندا وسى كاسىپورىنعا قارايتىن «سەۆكازەنەرگو» اق باس ديرەكتورى ولەگ پەرفيلوۆ جوندەۋ جۇمىستارىنىڭ بارىسى تۋرالى باياندادى. ونىڭ ايتۋىنا قاراعاندا, قازىر جەو-2-ءنىڭ 12 بۋ قازاندىعىنىڭ بەسەۋى جۇمىس ىستەيدى, بىرەۋى رەزەرۆتە, تاعى بەسەۋىنە جوندەۋ جۇمىستارى جۇرگىزىلىپ جاتىر. تاعى بىرەۋىندەگى جوندەۋ جۇمىستارى توقتاتىلعان. و.پەرفيلوۆ جوندەۋ جۇمىستارىنىڭ كەستەگە سايكەس جۇرگىزىلىپ جاتقانىن ايتتى. ال ورتان بەلىنەن ومىرىلعان مۇرجانىڭ تولىعىمەن بۇزىلعانىن ايتتى. بۇل ءنومىرى ءبىرىنشى مۇرجا بولاتىن. ەكىنشى مۇرجانىڭ جوندەۋ جۇمىستارى 18 قازاندا اياقتالاتىن كورىنەدى. ءۇشىنشى مۇرجا جوندەۋدەن وتكەن, قازىر قالىپتى جۇمىس ىستەۋدە. بۇل كاسىپورىن ەكىباستۇز كومىرىن جاعادى. بۇگىندە قورداعى كومىرىنىڭ كولەمى – 124 855 توننا. بۇل 21 تاۋلىككە جەتەدى.
سولتۇستىك قازاقستان وبلىسى
