قازاقستاندا ايەلدەر دزيۋدوسى تىم باياۋ دامىپ جاتقانى جايىندا تالاي مارتە ايتىلدى دا, جازىلدى دا. جەر-جاھاننىڭ مىقتىلارى جينالعان جارىستا بۇعان دەيىن ءبىر عانا بالۋانىمىزدىڭ جەڭىس تۇعىرىنا كوتەرىلۋگە كۇش-جىگەرى جەتتى. دەسەك تە ريو وليمپياداسى مەن ەكى بىردەي الەم چەمپيوناتىندا قولاعا قول سوزعان گالبادراح وتگونتسەتسەگتىڭ لەگيونەر ەكەنىن جۇرت جاقسى بىلەدى. ءبىزدىڭ بۇرىمدىلار ەڭسە تىكتەي الماي جاتقاننان كەيىن رەسپۋبليكالىق فەدەراتسيانىڭ باسشىلارى موڭعوليادان وسى سپورتشىنى اتتاي قالاپ الدىردى. ناتيجەسى جامان بولعان جوق. گالبادراح تالاي بايراقتى باسەكەدە ەل نامىسىن ابىرويمەن قورعادى. اتاقتى دزيۋدوشى ۇلكەن سپورتتان قول ۇزگەننەن كەيىن «ەندى كىمگە ءۇمىت ارتامىز؟» دەپ قۇراما باپكەرلەرى ءبىراز باس قاتىرعانى راس. الايدا ارامىزدا دا ءدۇبىرلى دودالاردا دارالانا الاتىن ارۋلار بار ەكەن. سونىڭ ءبىرى – ءابيبا ابۋجاقىنوۆا.
وسىدان ەكى اي بۇرىن استانادا وتكەن ازيا چەمپيوناتىندا ابۋجاقىنوۆا كۇمىس مەدال يەلەنگەن سوڭ «ەگەمەن قازاقستان» گازەتىنە سۇحبات بەرگەندە «بۇيىرتسا, بيىل تاشكەنتتە شىمىلدىعى تۇرىلەتىن الەم چەمپيوناتىندا جەڭىس تۇعىرىنا كوتەرىلۋ ءۇشىن بارىمدى سالامىن. وعان مەنىڭ كۇش-جىگەرىم جەتەدى» دەپ سەنىمدى سويلەگەن ەدى. ءابيبا سوزىندە تۇردى. العاشقى اينالىمداردا پانامەريكا چەمپيونى, برازيليالىق اماندا ليما مەن ەۋروپانىڭ ەكى دۇركىن چەمپيونى, الەمدىك رەيتينگتىڭ كوشباسشىسى, فرانتسيالىق شيرين بۋكليدەن باسىم ءتۇستى. ودان كەيىن قۇرلىق بىرىنشىلىگىنىڭ قولا جۇلدەگەرى, سەربيالىق ميليتسا نيكوليچتەن ايلاسىن اسىردى. جارتىلاي فينالدا الەم چەمپيونى, ازيا ويىندارىنىڭ جەڭىمپازى, جاپونيالىق ناتسۋمي تسۋنودادان ۇتىلىپ, قولا مەدال ءۇشىن باسەكەدە ءچيليدىڭ وكىلى ماري دي ۆارگاس لەيدى جەڭدى. وسىلايشا, ءابيبانىڭ ەسىمى قازاق قىزدارى اراسىنان الەم چەمپيوناتىندا جۇلدە العان تۇڭعىش دزيۋدوشى رەتىندە تاريحتا قالدى.
باستاپقى باسەكەلەردە ازەربايجاندىق كارامات حۋسەينوۆ پەن يزرايلدىك ماتان كوۆالاەۆتى قاپى قالدىرعان ەلدوس سمەتوۆتىڭ شيرەك فينالدا بىلتىر توكيو وليمپياداسىندا كۇمىس مەدالدى موينىنا ءىلىپ, ازيا ويىندارى مەن قۇرلىق بىرىنشىلىگىندە جۇلدەگەر اتانعان تايپەيلىك يان يۋن ۆەيمەن جولى قيىستى. يىعىنان العان جاراقاتىن اسقىندىرىپ العان ايگىلى بالۋانىمىز بۇل باسەكەدە كەڭىنەن كوسىلە الماي, IJF رەيتينگىندە كوش باستاپ تۇرعان ۆەيگە ەسە جىبەردى. دەسەك تە ودان كەيىنگى ەكى بەلدەسۋدە بارىن سالعان سمەتوۆ جۇبانىش كەزدەسۋىندە الەم چەمپيوناتىنىڭ قولا جانە ەۋروپا ويىندارىنىڭ كۇمىس جۇلدەگەرى, ەۋروپانىڭ ەكى دۇركىن چەمپيونى, يسپانيالىق فرانسيسكو گارريگوستى ۇتىپ, ءۇشىنشى ورىن ءۇشىن تارتىستا وزبەكستاندىق ديلشودبەك باراتوۆتان باسىم ءتۇستى. ءسويتىپ, ەلدوس ءوزىنىڭ سپورتتىق مانسابىندا الەم چەمپيوناتىنىڭ ءۇشىنشى جۇلدەسىنە قول جەتكىزدى. 2015 جىلى ول استانادا التىن تۇعىردان قول بۇلعاسا, 2019 جىلى توكيو جانە 2022 جىلى تاشكەنتتە قولا مەدال يەلەندى.
العاشقى كۇنى 60 كيلو سالماقتاعى ماعجان شامشادين تۇساۋكەسەر كەزدەسۋىندە يتاليالىق اندجەلو پانتانوعا ەسە جىبەرسە, كەلەسى كۇنى 66 كيلو سالماقتاعى عۇسمان قىرعىزباەۆ تا ءسۇرىندى. سوقىر جەرەبە ونى ەكىنشى اينالىمدا ان باۋلمەن جولىقتىردى. وڭتۇستىك كورەيا وكىلىنىڭ ريو وليمپياداسىنىڭ كۇمىس, توكيو وليمپياداسىنىڭ قولا جۇلدەگەرى, الەم چەمپيونى جانە ازيا ويىندارىنىڭ جەڭىمپازى دەگەن اتاقتارى بار. وكىنىشكە قاراي, عۇسمان اننان ايلاسىن اسىرا المادى. 52 كيلو سالماقتاعى گاۋھار يرماعامبەتوۆا ء«شۇۋ» دەگەندە شۆەيتساريالىق فابينە كوشەردى شابىسىنان جاڭىلدىرعانىمەن, ەكىنشى كەزەڭدە پولشالىق الەكساندار كالەتادان جەڭىلىپ قالدى.
جارىستىڭ ءۇشىنشى كۇنى دانيار شامشاەۆ تاتاميگە شىقتى. تاياۋدا عانا استانادا وتكەن ازيا چەمپيوناتىندا بارلىق قارسىلاسىن سىپىرا ۇتىپ, باس جۇلدەنى ولجالاعان 18 جاستاعى جاس بالۋانعا وزبەكستاننىڭ باس شاھارىندا ايرىقشا سەنىم ارتتىق. سول كەزدە وعان قۇرلىقتىڭ ەڭ ۇزدىك دزيۋدوشىسى اتانۋعا نەبارى 149 سەكۋند جەتكىلىكتى بولعان ەدى. وكىنىشكە قاراي, جىلدىڭ باستى دوداسىندا دانياردىڭ جولى بولمادى. العاشقى سىناقتان ول سۇرىنبەي وتكەنىمەن, ەكىنشى كەزەڭدە كورەيالىق لي ەنحۋلدەن ۇتىلدى.
56 كيلو سالماقتاعى سەۆارا نىشانباەۆا بوسنيا مەن گەرتسەگوۆينانىڭ وكىلى اندجەلا ساماراندجيچكە جول بەردى. 81 كيلو سالماقتاعى ابىلايحان جۇبانازاروۆ نيدەرلاندتىق فرانك دە ۆيتتەن ايلاسىن اسىرا المادى.
جارىستىڭ جەڭىمپازدارى مەن جۇلدەگەرلەرى
ەرلەر: 60 كيلو – 1. ناوحيسو تاكاتو (جاپونيا), 2. ارۋنبولد ەنحتايۆان (موڭعوليا), 3. ەلدوس سمەتوۆ (قازاقستان) پەن يان يۋن ۆەي (تايپەي).
66 كيلو – 1. دزيوسيرو مارۋياما (جاپونيا), 2. حيفۋمە ابە (جاپونيا),
- ان باۋل (وڭتۇستىك كورەيا) مەن دەنيس ۆيەرۋ (مولدوۆا).
73 كيلو – 1. تتسوگبااتار ەنت-وچير (موڭعوليا), 2. سويشي حاشيموتو (جاپونيا), 3. دانيەل گارگنين (برازيليا) مەن حيدايات حەيداروۆ (ازەربايجان).
ايەلدەر: 48 كيلو – 1. ناتسۋمي تسۋنودا (جاپونيا), 2. كاتارينا مەنتس (گەرمانيا), 3. ءابيبا ابۋجاقىنوۆا (قازاقستان) مەن اسسۋنتا سكۋتتو (يتاليا).
52 كيلو – 1. ۋتا ابە (جاپونيا), 2. چەليسە گيلەس ( ۇلىبريتانيا),
- ديستريا كراسنيكي (كوسوۆو) مەن اماندي بۋشار (فرانتسيا).
57 كيلو – 1. رافاەلا سيلۆا (برازيليا), 2. حارۋكا فۋناكۋبو
(جاپونيا), 3. دجەسسيكا كليمكايت (كانادا) پەن ەنحەرلەن
لحكاگۆاتاگوو (موڭعوليا).
