سپورت • 07 قازان، 2022

جۇلدەنىڭ اۋىلى الىس ەمەس

39 رەت كورسەتىلدى

وزبەكستاننىڭ باس شاھارى – تاشكەنتتە دزيۋدودان ەرلەر مەن ايەلدەر اراسىنداعى الەم چەمپيوناتى باستالدى. جارىستىڭ العاشقى كۇنى ەكى سالماق دارەجەسى بويىنشا باسەكەلەر ءوتتى. تاتاميگە قازاقستاننىڭ ءۇش بالۋانى شىقتى. سولاردىڭ ەكەۋى جۇلدەلى ورىندار ءۇشىن تالاسۋ مۇمكىن­دىگىنە يە بولدى.

60 كيلو سالماقتاعى ەل­دوس سمەتوۆ تۇساۋكەسەر كەزدە­سۋىن كارا­مات حۋسەينوۆكە قار­سى وت­كىزدى. 24 جاستاعى ازەر­باي­جان­نىڭ بالۋانى 2021 جىلعى الەم جانە ەۋروپا چەمپيوناتتارىندا قولا مەدال يەلەندى. قازىرگى كەزدە ول IJF رەيتينگىندە 11-ورىندا. سالىستىرمالى تۇردە الساق، قانداسىمىز 38- سا­­تىعا تابان تىرەپ تۇر. ونىڭ ۇستىنە ءدال وسى جىگىت بىلتىر بۋداپەشتتە ۇيىمداستىرىلعان دۇنيەجۇزىلىك دودادا ءبىزدىڭ ماعجان ءشامشاديندى قولا مەدالدان ايىرعان ەدى. ەكەۋارا تارتىس وتە شيەلەنىستى ءوتىپ، بۇل باسەكە سمەتوۆتىڭ پايداسىنا شە­شىلدى. كەلەسى كەزەڭدە ەلدوس يزرايلدىك ماتان كوۆلاەۆتى يپپونمەن جەڭدى. شيرەك فينالدا ونىڭ جولى الەمدىك رەيتينگتە كوش باستاپ تۇرعان تايپەيلىك يان يۋن ۆەيمەن قيىستى. توكيو وليمپياداسىنىڭ ءفيناليسى، ازيا ويىندارى مەن قۇرلىق چەم­پيو­ناتىنىڭ بىرنەشە دۇركىن جۇل­­دەگەرىنە قازاق دزيۋدو­شى­سىنىڭ ءالى جەتپەدى. كەشە كەش­كىسىن سمەتوۆ جۇ­بانىش بەل­دەسۋلەرىندە باق سىنادى.

ءدال وسى سالماقتاعى ماعجان شامشادين العاشقى اينالىمدا 25 جاستاعى يتاليا دزيۋدوشىسى اندجەلو پانتانومەن كۇش سىناستى. ۇزدىكتەر تىزىمىندە ماعجان 9-ساتىعا جايعاسسا، اپەننين تۇبە­گىنىڭ وكىلى قالىڭ توپتىڭ ورتا­سىن­دا قالىپ قويدى. سوعان قارا­ماستان، پانتانو ءشامشاديندى شاڭ قاپتىرىپ كەتتى.

ايەلدەر سايىسىندا اسا جەڭىل سالماقتا ءابيبا ابۋ­جا­قىنوۆا ءوز جانكۇيەرلەرىن قۋانتتى. باستاپقى باسەكەسىندە ول برازيليالىق اماندا لي­مامەن شەبەرلىك بايقاستى. IJF رەيتينگىندە ەكەۋى قاتار جايعاسقان. قازاق قىزى 22-ورىندى يەلەنسە، پانامەريكا چەمپيونى ودان ەكى ساتى جوعارى تۇر. قوسىمشا ۋا­قىتتا ءابيبا قارسىلاسىن قوس جاۋىرىنىمەن جەرگە قاداسا، كەلەسى كەزەڭدە ەۋروپانىڭ ەكى دۇركىن چەمپيو­نى، الەمدىك رەيتينگتىڭ كوش­باسشىسى، فرانتسيالىق شيرين بۋكليدەن باسىم ءتۇستى. شيرەك في­نالدا ابۋجاقىنوۆا قۇرلىق بىرىن­شىلىگىنىڭ قولا جۇلدەگەرى، سەر­بيالىق ميليتسا نيكوليچتىڭ وسال تۇسىن تاپتى. وسىلايشا، ول جار­تىلاي فينالعا جولداما الدى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار