ANTIKOR • 05 قازان، 2022

قتج قىزمەتىندە جەمقورلىق تاۋەكەلدەرى انىقتالدى

55 رەت كورسەتىلدى

«قازاقستان تەمىر جولى»، «اتامەكەن» ۇكپ وكىلدەرىنىڭ، قوعامدىق كەڭەس مۇشەلەرىنىڭ جانە جۇك جونەلتۋشىلەردىڭ قاتىسۋىمەن وتكەن كەڭەس بارىسىندا سىبايلاس جەمقورلىققا قارسى قىزمەت قتج قىزمەتىندە انىقتالعان جەمقورلىق تاۋەكەلدەرى جايىندا ەگجەي-تەگجەيلى ايتتى، دەپ حابارلايدى Egemen.kz ANTIKOR-عا سىلتەمە جاساپ.

انىقتالعان جەمقورلىق تاۋەكەلدەرى ۆاگونداردى بەرۋ كەزىندەگى اكىمشىلىك كەدەرگىلەرمەن جانە جەمقورلىق سحەمالارىمەن، ءتيىستى تسيفرلاندىرۋدىڭ بولماۋىمەن، تەمىرجولشىلاردىڭ كاسىپكەرلەرمەن تىكەلەي بايلانىسىمەن، قاعاز نىساندا وتىنىمدەر بەرۋمەن بايلانىستى بولعان.

«ماسەلەن، سوڭعى 5 جىلدا قتج لاۋازىمدى تۇلعالارى مەن ونىڭ ۆەدومستۆولىق باعىنىستى ۇيىمدارىنا قاتىستى 136 قىلمىستىق ءىس تىركەلگەن. ولار بويىنشا 52 ادام سوتتالدى. بۇل سالاداعى قىلمىستاردىڭ كوپشىلىگى پاراقورلىق (70%) جانە ۇرلىق (13%) فاكتىلەرىنە بايلانىستى. اتالعان قىلمىستار ورىندالعان جۇمىستار اكتىلەرىنە قول قويۋ كەزىندە زاڭسىز سىياقىلار الۋمەن، جۇمىسقا قابىلداۋمەن جانە قىزمەت بويىنشا اۋىسۋمەن، سونداي-اق جۇكتەردى تاسىمالداۋ ءۇشىن ۆاگوندار مەن تەپلوۆوزداردى جەدەلدەتىپ جانە كەدەرگىسىز بەرۋمەن بايلانىستى»، دەلىنگەن حابارلامادا.

اگەنتتىك توراعاسىنىڭ ءبىرىنشى ورىنباسارى دميتري مالاحوۆ ءوز سوزىندە جۇرگىزىلگەن تالداۋعا سايكەس قتج جەكەلەگەن بولىمشەلەرىندە ۆاگوندارمەن ايلا-شارعى جاساۋ بويىنشا جەمقورلىق سحەمالارى قۇرىلعانىن حابارلادى.

ء«ىس جۇزىندە پارا بەرگەن ادام ءوز جۇكتەرىن ۋاقىتىلى جىبەرەدى. بۇل پروبلەمالاردىڭ بارلىعى كاسىپكەرلەردىڭ دالەلدەرىمەن عانا ەمەس، قىلمىستىق ىستەردىڭ ناقتى ماتەريالدارىمەن دە راستالادى. جاقىندا عانا قوستاناي وبلىسى بويىنشا قتج بولىمشەسىنىڭ باسشىلارى سوتتالدى، ولار زاڭسىز سىياقىلار ءۇشىن ۆاگوندار بەرۋ جونىندەگى قىلمىستىق سحەمانى ۇيىمداستىرعان»، دەدى دميتري مالاحوۆ.

سونداي-اق «قازتەمىرترانس» قوستاناي فيليالىنىڭ بۇرىنعى باسشىسى ۋسابەكوۆكە قاتىستى قىلمىستىق ءىس بويىنشا وعان ۆاگونداردى بەرۋ نەمەسە باس تارتۋ ماسەلەسىن ءوز بەتىنشە شەشۋگە مۇمكىندىك بەرگەن جاسىرىن پروتسەستەر انىقتالدى.

«ۋسابەكوۆ لوببيزم جاساعان كاسىپكەرلەر تاۋلىك بويى ءوز ۆاگوندارىن تاپشىلىق كەزەڭىندە دە الدى، ال باسقالارى ءوز كەزەگىن بىرنەشە اپتا كۇتۋگە ءماجبۇر بولعان. ب.ۋسابەكوۆ جاساعان قىلمىستارى ءۇشىن 6 جىلعا باس بوستاندىعىنان ايىرىلدى، ال پارا بەرۋشى فيرماعا 24 ملن تەڭگە كولەمىندە ايىپپۇل سالىندى»، دەپ جازدى ANTIKOR ءباسپاسوز قىزمەتى.

كەڭەس قورىتىندىسى بويىنشا دميتري مالاحوۆ ايتىلعان ۇسىنىمدار سىبايلاس جەمقورلىققا قارسى قىزمەتتىڭ قاتاڭ باقىلاۋىندا بولاتىنىن ايتىپ، قتج-نى اتالعان ماسەلەلەردى دەرەۋ شەشۋگە شاقىردى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار