سپورت • 04 قازان، 2022

كوڭىل قۇلازىتقان كورسەتكىش

58 رەت كورسەتىلدى

ۆولەيبولدان نيدەرلاند پەن پولشادا ءوتىپ جاتقان ايەلدەر اراسىنداعى الەم چەمپيوناتىنىڭ العاشقى كەزەڭى اياقتالدى. س توبىنداعى قازاقستان قۇراماسى اتالعان مەملەكەتتەردىڭ ارنەم جانە لودز قالالارىندا ونەر كورسەتتى. وكىنىشكە قاراي، بارلىق كەزدەسۋىندە ويسىراي ۇتىلعان جەرلەستەرىمىز جارىس كەستەسىندە ەڭ سوڭعى ورىندا قالىپ قويىپ، ءوز جانكۇيەرلەرىن جەرگە قاراتتى.

تارقاتىپ ايتساق، تۇساۋكەسەر كەزدەسۋدە ءبىزدىڭ قىزدار وليمپيا ويىندارى مەن الەم چەمپيوناتتارىندا جۇلدەلەردىڭ تولىق جيىنتىعىن جەڭىپ العان ايگىلى اقش قۇراماسىنان ۇتىلدى. ەكىنشى ويىن­دا ەۋروپا بىرىنشىلىگىنىڭ ءتورت دۇركىن جەڭىمپازى گەرمانياعا ەسە جىبەردى. ءۇشىنشى باسەكەدە پانامەريكا ويىندارىنىڭ قولا جۇلدەگەرى كانادا قاپى قالدىرىپ كەتتى. ودان كەيىن الەم جانە ەۋروپا چەمپيونى، وليمپيا ويىندارىنىڭ كۇمىس جۇل­دەگەرى سەربيا سان سوقتىردى. سوڭعى سا­يىستا ماسكەۋ وليمپياداسىنىڭ قولا جۇل­دەگەرى، قۇرلىق چەمپيونى بولگاريا بەت قارات­پادى. بۇل كەزدەسۋلەردىڭ بارلىعى دا 0:3 ەسەبىمەن اياقتالدى. ەڭ وكىنىشتىسى، قازاقستاننىڭ ۆولەيبولشىلارى بىردە-ءبىر پارتيادا جەڭىسكە جەتە المادى. بۇل – قىزدارىمىزدىڭ الەم چەمپيوناتى تاريحىنداعى ەڭ ناشار كورسەتكىشى.

اتالعان جارىستا بارلىعى 24 كوماندا ونەر كورسەتۋدە. ولار التى-التىدان ءتورت توپقا ءبولىندى. بۇل باسەكەلەر مىناداي ناتيجەلەرمەن اياقتالدى: ا توبى – يتاليا (15 ۇپاي)، بەلگيا (9 ۇپاي)، نيدەر­لاند (9 ۇپاي)، پۋەرتو-ريكو (6 ۇپاي)، كەنيا (3 ۇپاي) جانە كامەرۋن (0 ۇپاي). ۆ توبى – تۇركيا (11 ۇپاي)، دومينيكان رەس­پۋب­ليكاسى (11 ۇپاي)، تايلاند (10 ۇپاي)، پولشا (10 ۇپاي)، وڭتۇستىك كورەيا (3 ۇپاي) جانە حورۆاتيا (0 ۇپاي). س توبى – سەربيا (14 ۇپاي)، اقش (12 ۇپاي)، كانادا (8 ۇپاي)، گەرمانيا (7 ۇپاي)، بولگاريا (4 ۇپاي) جانە قازاقستان (0 ۇپاي). D توبى – قىتاي (12 ۇپاي)، جاپونيا (12 ۇپاي)، برازيليا (12 ۇپاي)، ارگەنتينا (5 ۇپاي)، چەحيا (3 ۇپاي) جانە كولۋمبيا (1 ۇپاي).

ءار توپتىڭ ۇزدىك ءتورت كومانداسى ەكىن­شى اينالىمعا ءوتتى. ەندى ولار ەكى توپقا ءبولىنىپ، ەكىنشى كەزەڭدە كۇش سىناسۋدا. بۇل سىناقتان ىركىلمەي وتكەن ەڭ مىقتى سەگىز ۇجىم پلەي-وففقا جولداما الادى. شي­رەك فينالدىق سايىستار 11 قازاندا وتسە، ەكى كۇننەن سوڭ جارتىلاي فينالدىق باسە­كەلەردى تاماشالايمىز. ال بيىلعى الەمدىك دودانىڭ جەڭىمپازدارى مەن جۇل­دەگەرلەرى 15 قازان كۇنى انىقتالادى.

تاريحقا ۇڭىلسەك، ايەلدەر اراسىنداعى الەم چەمپيوناتىنىڭ تۇساۋى سوناۋ 1952 جىلى ماسكەۋ قالاسىندا كەسىلگەن ەكەن. سو­دان باستاپ، توقسانىنشى جىلداردىڭ باسىنا دەيىنگى كەزەڭدە ەڭ كوپ ولجاعا كەنەلگەن كسرو قۇراماسى. ولار اتالعان مەر­زىم ارالىعىندا وتكەن 11 دودانىڭ بە­سەۋىندە (1952، 1956، 1960، 1970، 1990 جىل­دارى) دارا شىقسا، سونىمەن قاتار ەكى كۇمىس پەن ءبىر قولا مەدال ەنشىلەدى. ءبىر ايتا كەتەرلىگى، 1970 جىلى بولگاريادا وتكەن جارىستا باس جۇلدەنى ولجالاعان كوماندانىڭ ساپىندا 22 جاستاعى نينا سمولەەۆا ونەر كورسەتتى. لەنينگراد وب­لى­سىندا دۇنيەگە كەلگەن بولاشاق جۇل­­دىزدىڭ بالالىق جانە جاستىق شاعى الماتىدا وتكەنىن كوزى قاراقتى جان­كۇيەرلەر جاقسى بىلەدى. جەرگىلىكتى ادك كلۋبى ساپىندا شەبەرلىگىن شىڭداعان نينا ۋاقىت وزا وداقتىڭ بەتكەۇستار ۆو­لەيبولشىلارىنىڭ بىرىنە اينالدى. ءدال سول سمولەەۆا 1978 جىلعى چەمپيو­ناتتا دا وينادى. سول جىلى كەڭەس وداعىندا جالاۋى جەلبىرەگەن جارىستا جەرگىلىكتى كوماندا قولا مەدالدى قاناعات تۇتتى. ودان بولەك، نينا سمولەەۆانىڭ مەحيكو مەن ميۋن­حەن وليمپيادالارىنىڭ جەڭىمپازى، مون­رەال وليمپياداسىنىڭ كۇمىس جۇل­دەگە­رى، الەم كۋبوگىنىڭ يەگەرى جانە ەۋرو­پانىڭ ءتورت دۇركىن چەمپيونى دەگەن اتاقتارى بار.

1990 جىلى كسرو قۇراماسى تاعى دا تەڭدەسسىز دەپ تانىلدى. قىتايدا شىمىل­دىعى تۇرىلگەن جارىستا 25 جاستاعى ەلە­نا چەبۋكينا جاسىنداي جارقىلدادى. ول – بالقاش قالاسىنىڭ تۋماسى. 1983-1991 جىلدار ارالىعىندا ەلەنا ادك-ءنىڭ نامىسىن قورعادى. جەرلەسىمىز سەۋل وليمپياداسىنىڭ جەڭىمپازى، بارسەلونا وليمپياداسىنىڭ كۇمىس جۇلدەگەرى، الەم كۋبوگىنىڭ يەگەرى، ەۋروپا بىرىنشىلىگىنىڭ ءۇش دۇركىن جەڭىمپازى جانە ءتورت دۇركىن قولا جۇلدەگەرى اتاقتارىن يەلەندى.

جاپونيا قۇراماسىنىڭ دا قارقىنى وتە كۇشتى بولدى. ولار دۇنيەجۇزىلىك دو­دالاردا ءۇش مارتە (1962، 1967، 1974) دا­را شىقتى. سول جارىستاردىڭ ەكەۋىندە كۇن­­شىعىس ەلىنىڭ قىزدارى كسرو-نى قاپى قالدىرسا، تاعى بىرەۋىندە اقش-تان ايلاسىن اسىردى. قىتاي ەكى رەت (1982، 1986) جانە كۋبا ءبىر رەت (1978) چەم­پيون­دىق تۇعىرعا كوتەرىلدى. ال كەڭەس وداعى كەلمەس­كە كەتكەننەن كەيىن ناقتى ءبىر كومان­دانىڭ ايقىن باسىمدىعى بايقالعان جوق. العاش­قى ەكى جارىستى كۋبا قۇراماسى ۇتتى. بوستاندىق ارالىنىڭ بۇرىمدىلارى 1994 جانە 1998 جىلدارى الدارىنا جان سالمادى. 2002 جىلعى جارىستا يتاليا جەڭىمپاز اتاندى. 2006 جانە 2010 جىلدارى رەسەي توپ جاردى. 2014 جىلى اقش-تىڭ ارۋلارى التىننان القا تاقتى. ال 2018 جىلى سەر­بيانىڭ شوقتىعى بيىك بولدى. سوڭعى دۇنيەجۇزىلىك دودانىڭ جارتىلاي فينالىندا نيدەرلاندتى (3:1) سان سوقتىرعان سەرب­تەر فينالدا يتاليادان (3:2) باسىم ءتۇستى.

قازاقستان قۇراماسى جەر-جاھاننىڭ ەڭ ۇزدىكتەرى جينالعان ءدۇبىرلى دودادا بەس مارتە باق سىنادى. 2006 جىلى جا­پو­­نيادا س توبىندا ويناپ، التى كومان­دا ارا­سىندا بەسىنشى ورىن يەلەندى. ءبىز­دىڭ قىزدار اقش (2:3)، برازيليا (0:3)، پۋەرتو-ريكو (1:3) جانە نيدەرلاندقا (2:3) ەسە جىبەرىپ، كامەرۋندى (3:0) قاپى قال­دىر­­دى. قورىتىندى ەسەپتە 24 كوماندا ارا­­سىنان 17-ورىندى يەلەندى. 2010 جىلعى جا­رىستى دا جاپونيا قابىلدادى. بۇل جولى بەس باسەكەنىڭ بارلىعىندا جەڭىلىستىڭ كەر­مەك ءدامىن تاتىپ، 21-ورىندى قاناعات تۇت­تىق. كۇنشىعىس ەلىندە اقش (0:3)، گەر­مانيا (0:3)، كۋبا (2:3)، تايلاند (1:3) جانە حورۆاتيا (0:3) ۆولەيبوشىلارىنىڭ وڭاي ولجاسىنا اينالدىق. 2014 جىلى يتا­ليادا ەكى كەزدەسۋدە جەڭىسكە جەتىپ، سونىڭ ارقاسىندا 15-ساتىعا تابان تىرەدىك. اپەن­نين تۇبەگىندە تايلاند (3:0) پەن مەك­سيكانى (3:0) ۇتقانىمىزبەن، اقش (0:3)، رە­سەي (0:3)، نيدەرلاند (0:3)، برا­زيليا (0:3)، سەربيا، (0:3)، بولگاريا (0:3) جانە تۇر­كياعا (0:3) جول بەردىك. 2018 جىلى جاپون جەرىنەن جانارىمىزبەن جەر شۇ­قىپ قايت­تىق. بۇل جولى برازيليا (0:3)، سەر­بيا (0:3)، دومينيكان رەسپۋبليكاسى (0:3)، پۋەرتو-ريكو (0:3) جانە كەنيادان (0:3) وي­سىراي ۇتىلدىق. ال بيىلعى جارىس­تا قان­داي ناتيجە كورسەتكەنىمىزدى جوعا­رىدا ايتتىق.

سوڭعى جاڭالىقتار

ەلىمىزدە 175 ادام كوروناۆيرۋس جۇقتىردى

كوروناۆيرۋس • بۇگىن، 09:06

«ايبوز» دارابوزدارى انىقتالدى

ادەبيەت • بۇگىن، 08:55

پرەزيدەنت قۇتتىقتاۋى

پرەزيدەنت • بۇگىن، 08:50

ەلدىك نيەت

ايماقتار • بۇگىن، 08:48

كەزەكتە – جەر ۇيلەر

ايماقتار • بۇگىن، 08:46

زاڭ جوباسى قارالدى

ساياسات • بۇگىن، 08:42

ءتيىمدى ىنتىماقتاستىق

ساياسات • بۇگىن، 08:38

جەڭىستىڭ باستاۋى – حالىق

قوعام • بۇگىن، 08:27

اسىل تۇقىمنىڭ پايداسى

ايماقتار • بۇگىن، 08:24

بەرەكەلى اقباس سيىر

ەكونوميكا • بۇگىن، 08:20

اۆتوجولدىڭ سان الۋان ماسەلەسى

ەكونوميكا • بۇگىن، 08:18

ىشكى جالپى ءونىم 4 پايىزعا وسەدى

ەكونوميكا • بۇگىن، 08:14

ينفلياتسيانىڭ كەزەكتى تولقىنى

ەكونوميكا • بۇگىن، 08:10

ۇقساس جاڭالىقتار