پارلامەنت • 04 قازان، 2022

سەناتتا قازاقستان مەن يسپانيا اراسىنداعى ىنتىماقتاستىق ماسەلەلەرى تالقىلاندى

31 رەت كورسەتىلدى

سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد يسپانيانىڭ قازاقستانداعى توتەنشە جانە وكىلەتتى ەلشىسى حورحە ۋربيولامەن كەزدەستى، دەپ جازادى Egemen.kz.

سەناتور ءوز سوزىندە قازاقستان مەن يسپانيانىڭ ستراتەگيالىق ارىپتەستىگى دەڭگەيىنىڭ جوعارى ەكەنىن ايتا كەلىپ، استانا مەن مادريد اراسىندا ەكىجاقتى قاتىناستار مەن حالىقارالىق ساياساتتىڭ بارلىق سالاسىندا ءوزارا تولىق تۇسىنىستىك قالىپتاسقانىن اتاپ ءوتتى.

«پارلامەنتارالىق ىنتىماقتاستىق بويىنشا جاقسى ناتيجەگە قول جەتىپ كەلەدى. قازاقستان پارلامەنتىنىڭ ەكى پالاتاسىندا دا يسپانيامەن ىنتىماقتاستىق جونىندەگى توپتار جۇمىس ىستەيدى. مەن ءسىزدىڭ ەلىڭىزبەن ىنتىماقتاستىق جونىندەگى سەناتتاعى توپتىڭ جەتەكشىسىمىن. ءبىزدىڭ دەپۋتاتتار حالىقارالىق ۇيىمدار، اتاپ ايتقاندا، پارلامەنتارالىق وداق جانە ەقىۇ پارلامەنتتىك اسسامبلەياسى اياسىندا يسپان ارىپتەستەرىمەن قارىم-قاتىناستى دامىتۋعا نيەتتەنىپ وتىر»، دەدى دەپۋتات.

مۇحتار قۇل-مۇحاممەد مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان رەفورمالارعا توقتالىپ، الداعى كەزەكتەن تىس پرەزيدەنتتىك سايلاۋ تۋرالى حاباردار ەتتى. ول ەلىمىزدە جۇرگىزىلىپ جاتقان اۋقىمدى جۇمىستار ەل ازاماتتارىن دەموكراتيالىق ترانسفورماتسيا يدەياسى توڭىرەگىندە بىرىكتىرۋگە مۇمكىندىك بەرەتىنىن اتاپ ءوتتى.

حورحە ۋربيولا ءوز كەزەگىندە ەكى ەلدىڭ ىنتىماقتاستىعىن ودان ءارى نىعايتۋدىڭ ماڭىزدىلىعىن اتاپ ءوتتى جانە مەملەكەتتەر اراسىنداعى ديپلوماتيالىق قاتىناستار ورناعان ساتتەن باستاپ 30 جىل ىشىندە قازاقستان ءوزىن سەنىمدى ساياسي جانە ەكونوميكالىق ارىپتەس رەتىندە كورسەتىپ كەلە جاتقانىن جەتكىزدى.

تاراپتار كەزدەسۋ بارىسىندا قازاقستان مەن ەو-نىڭ كەڭەيتىلگەن ارىپتەستىگى مەن ىنتىماقتاستىعى تۋرالى كەلىسىمدى ىسكە اسىرۋ جونىندەگى بىرلەسكەن جۇمىستاردى تالقىلادى. اتاپ ايتقاندا، «جاسىل» ەكونوميكاعا كوشۋ، ساۋدا جانە ينۆەستيتسيالار، ەنەرگەتيكا، اۋىل شارۋاشىلىعى، كولىك جانە لوگيستيكا، سونداي-اق كليماتتىق وزگەرىستەر سياقتى باعىتتارداعى ىنتىماقتاستىقتىڭ ماڭىزى زور ەكەنى ايتىلدى.

سوڭعى جاڭالىقتار

دوللار باعامى تومەندەدى

قارجى • بۇگىن، 16:10

ۇقساس جاڭالىقتار