قوعام • 03 قازان، 2022

بىلىكتىلىكتى ارتتىرۋ باعىتىنداعى باستاما

83 رەت كورسەتىلدى

مەملەكەت باسشىسىنىڭ بىلتىرعى جولداۋىنداعى تاپسىرماسى بويىنشا «كاسىبي بىلىكتىلىك تۋرالى» زاڭ جوباسى ازىرلەنىپ، پارلامەنت ءماجىلىسىنىڭ قاراۋىنا جىبەرىلدى. اتالعان قۇجاتتى ازىرلەۋدە ەستونيا، سينگاپۋر، رەسەي سياقتى ەلدەردىڭ تاجىريبەسى ەسكەرىلدى. بۇل تۋرالى پرەزيدەنت جانىنداعى ورتالىق كوممۋنيكاتسيالار قىزمەتى الاڭىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس ورداباەۆ مالىمدەدى.

– وسى زاڭ جوباسى ەڭبەك نارى­عىنداعى بارلىق تاراپتىڭ ءبى­لىم بەرۋ جۇيەسىنىڭ جانە بيزنەس- قاۋىمداستىعىنداعى قىز­مەتكەر­لەردىڭ ءوزارا قارىم-قاتىناستى رەتتەۋگە ارنالعان. مۇنىڭ بارلى­عىن ۇلتتىق بىلىكتىلىك جۇيە ارقى­لى ىسكە اسىرۋعا بولادى. سەبەبى جوبا «قازىرگى ماماندار نەنى بىلۋ­گە جانە ۇيرەنۋگە ءتيىس؟»، «ولار­عا نەنى جانە قالاي وقىتۋ كەرەك؟»، «ولاردىڭ كاسىپتىك بىلىكتىلىگىن قالاي انىقتاۋعا بولادى؟» دەگەن ءۇش نەگىزگى سۇراققا جاۋاپ بەرەدى. ارينە، زاڭ جوباسىن ازىرلەۋدەن بۇرىن ۇلتتىق بىلىكتىلىك جۇيەسىن دامىتۋ بويىنشا بىرقاتار ما­ڭىزدى جۇمىس جۇزەگە استى. 2018 جىلدان باستاپ ەڭبەك نارى­عىنىڭ قۇرىلىمىن ناقتى­لاۋ ءۇشىن جاڭا ۇلتتىق قىزمەت­تەر سى­نىپ­­تاۋىشى ەنگىزىلگەن. وسى قۇجات­تىڭ قۇرامىندا 12 مىڭعا جۋىق كاسىپ پەن لاۋازىم بار، – دەيدى و.ورداباەۆ.

ونىڭ ايتۋىنشا، ۇلتتىق بىلىك­تىلىك اياسىندا سالالىق بىلىك­تىلىك شەڭبەرلەرى جانە كاسىپتىك ستان­دارت­تار ازىرلەنىپ بەكىتىلدى. كاسىپتىك ستاندارتتار جۇيەنىڭ وتە ماڭىز­دى ەلەمەنتى جانە وسى ماماندىق قىزمەتكەرلەرىنە نارىق تالاپتارىن جيناقتاۋ فۋنكتسياسىن اتقارادى، سونداي-اق قىزمەتكەرلەردى وقىتۋ جانە دايارلاۋ باعدارلامالارىن قۇرۋ ءۇشىن نەگىز بولا الادى. بۇعان قوسا رەتتەلەتىن كاسىپتەر تىزبەسى بەكىتىلدى. ۇلتتىق پالاتا ماماندارىن باعالاۋدى جۇرگىزەتىن سەرتيفيكاتتاۋ ورتالىقتارىنىڭ تىزبەسى جۇرگىزىلەدى.

سونىمەن قاتار ۇلتتىق بىلىكتى­لىك جۇيەسىن دامىتۋ ماقساتىندا ازىرلەنگەن زاڭ جوباسى بىرقاتار جاڭالىقتى قاراستىرادى. ءبىرىنشىسى – ءۇش دەڭگەيلى ينستيتۋتسيونالدىق جۇيەنى ەنگىزۋ. ەكىنشىسى – كاسىپتىك بىلىكتىلىكتەردى تانۋ ءتارتىبىن رەگلامەنتتەۋ. ءۇشىنشىسى – ەڭبەك نارىعىنىڭ بەيرەسمي جانە ينفورمالدى ءبىلىم بەرۋدى تانۋ، جەكە شەبەرلىكتى راستاۋ مۇمكىندىگى، قىز­مەتكەرلەردى ىنتالاندىرۋ شارالارى.

– «كاسىبي بىلىكتىلىك تۋرالى» زاڭ جوباسىندا جۇمىس ورنىن­دا سەرتيفيكاتتاۋ پروتسەسىن ىنتالاندىرۋ شارالارى دا بولادى. سونداي-اق جۇمىسسىز حا­لىققا وسى سەرتيفيكاتتاۋدان ءوتۋ ءۇشىن بەلگىلى ءبىر ۆاۋچەرلەر كوزدەلەدى. بارلىق پەرسونالى تاۋەلسىز راستاۋ ورتالىقتارىندا سەرتيفيكاتتاۋدان وتكەن جۇمىس بەرۋشىلەر ءۇشىن جاڭا ءتارتىپ ەنگىزىلەدى. سەنىم سەرتيفيكاتتارى بەرىلەدى. بۇل ەڭبەك ينسپەكتورلارىن تەكسەرۋ مۇلدەم باسقا رەجىمدە جۇزەگە اسىرىلاتىنىن كورسەتەدى. وسى شارالاردىڭ بارلىعى زاڭ جوباسىندا قاراستىرىلدى. ءبىز زاڭ جوباسىنىڭ قانشالىقتى ءتيىمدى بولاتىنىن باعامداپ وتىرمىز، ويتكەنى بۇل ءبىلىم بەرۋ جۇيەسى مەن ەڭبەك نارىعى اراسىنداعى كوپىر ىسپەتتەس، – دەدى ۆيتسە-مينيستر.

جوعارى وقۋ ورىندارىن اككرەديتتەۋ نەمەسە كەيبىر ساپاسى تومەن ۋنيۆەرسيتەتتەردى ليتسەنزياسىنان ايىرۋ تۋرالى اقپاراتتارعا قانىقپىز. وسى ورايدا بريفينگتە جۋرناليستەر تاراپىنان «بۇل ەرەجە كاسىپتىك جانە تەحنيكالىق ءبىلىم بەرۋ مەكەمەلەرىندە قالاي ساق­تالادى؟»، «ماماندى دا­يىن­داۋ­دا تالاپقا ساي كەلمەيتىن نەمەسە ليتسەنزياسىنان ايىرىلعان قانشا كاسىپتىك ورىن بار؟» دەگەن ساۋالدار قويىلدى.

بۇل رەتتە عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى مىندەتىن اتقارۋشى بانۋ ناربەكوۆا جوو جۇيەسىندە 2010 جىلدان باستاپ قازاقستاننىڭ بولون ۇدەرىسىنە قوسىلعانىن جەتكىزدى. ال ونىڭ باستى تالاپتارىنىڭ ءبىرى – تاۋەلسىز اككرەديتاتسيا نەمەسە ساپانى قامتاماسىز ەتۋ جۇيەسىن قالىپ­تاستىرۋ. بۇگىندە ەلىمىزدە 12 اككرە­ديتاتسيالىق اگەنتتىك بار. ولار مينيسترلىك تاراپىنان تانىلعان.

– الدىمەن اتتەستاتتاۋ مەن ليتسەنزيادان وتكىزۋدىڭ اراجىگىن اشىپ الايىق. اككرەديتتەۋدەن ءوتۋ بولون ۇدەرىسىنىڭ دەكلاراتسياسىنا قول قويعاندىقتان، جالپىەۋروپالىق ءبىلىم جۇيەسىندەگى ستاندارتتىڭ نەگىزىندە جۇزەگە اسىرىلادى جانە ءبىلىم باعدارلامالارى جۇمىس بەرۋشىلەرمەن بىرگە ازىرلەنەدى. بۇگىندە جوو-نىڭ 60%-ى ارنايى باعدارلامالارىن اككرەديتتەۋدەن وتكىزدى. بۇل ولارعا ماماندار دايىنداۋعا جانە مەملەكەتتىك تاپسىرىس الۋعا مۇمكىندىك بەرەدى. سونىمەن قاتار ينستيتۋتسيونالدى اككرەديتتەۋ بار. ودان بارلىق ۋنيۆەرسيتەت ءوتتى. سەبەبى ولار اككرەديتتەۋدەن وتپەسە، ودان ءارى قىزمەت ەتۋىنە قاتىستى سۇراقتار تۋىن­داۋى ىقتيمال. ال ليتسەنزيا ماسەلەسى – قازىر مەملەكەت تاراپىنان جۇرگىزىلىپ وتىرعان ساياسات. وسى كۇنگە دەيىن 15 وقۋ ورنى جابىلدى. بۇل جۇمىس جالعاسىن تابادى، – دەدى ب.ناربەكوۆا.

سوڭعى جاڭالىقتار

كونستيتۋتسيالىق مارتەبە بەرىلدى

قازاقستان • بۇگىن، 01:05

بلوگەر جۋرناليست ەمەس!

قوعام • بۇگىن، 00:52

سوت جۇيەسىن جەتىلدىرۋ

ساياسات • بۇگىن، 00:06

ماقتاشىلاردىڭ مۇڭى

ەكونوميكا • كەشە

ۋاقىت تالابى

قوعام • كەشە

كۇرەسكەر گەينە

ادەبيەت • كەشە

اجالدى جەڭگەن اسپان

ادەبيەت • كەشە

اعاش كوشەتى ەگىلدى

ايماقتار • كەشە

ۇقساس جاڭالىقتار