سپورت • 03 قازان، 2022

دەنيس تەننىڭ ءتۋرنيرى الماتىدا وتەدى

46 رەت كورسەتىلدى

وسىعان دەيىن استانادا ءوتىپ كەلگەن قازاقستاننىڭ اتاقتى مانەرلەپ سىرعاناۋشىسى دەنيس تەندى ەسكە الۋعا حالىقارالىق تۋرنير الاتاۋ باۋرايىنا قايتا ورالدى. اتالعان جارىستىڭ جالاۋى بيىل 26-29 قازان ارالىعىندا الماتىداعى «حالىق ارەنا» سپورت كەشەنىندە جەلبىرەيدى.

دەنيس تەننىڭ ەل سپورتىنا سىڭىرگەن ەڭبەگى ەرەن. بالاۋسا شاعىنان مايتالمان مامانداردىڭ نازارىن وزىنە اۋدارعان ول شەبەرلىگى شىڭدالا كەلە، ءدۇبىرلى دودالاردا دارا تالانتىمەن وقشاۋلاندى. العاشىندا تورتكۇل دۇنيەنىڭ ءار قيىرىندا ۇز­دىكسىز ۇيىمداستىرىلىپ تۇراتىن ءتۇرلى تۋرنير­لەردە ەلەۋلى تابىستارعا قول جەتكىزسە، ودان كەيىن رەسمي حالىقارالىق جارىستاردا جاسىنداي جار­قىلدادى. ناقتىلاپ ايتساق، 2011 جىلى ازيا ويىندارىنىڭ جەڭىمپازى اتانىپ، 2017 جىلى دۇنيەجۇزىلىك ۋنيۆەرسيادادا الدىنا جان سالمادى. بۇل دودالاردىڭ ەكەۋى دە الماتى وتكەن ەدى. 2004 جىلى سوچي وليمپياداسىندا قولا مەدالدى موينىنا ءىلدى. 2013 جىلى لوندون جانە 2015 جىلى شانحايدا وتكەن الەم چەمپيو­نات­تارىندا جۇلدەگەرلەر قاتارىنان كورىندى. 2015 جىلى سەۋلدە ء«تورت قۇر­لىقتىڭ بىرىن­ش­ىلىگىندە» باس جۇلدەنى ءوز قان­جىعاسىنا بايلادى. وسى­لاي تىزبەكتەي بەرسەك، جەر­لەسىمىزدىڭ با­عىن­دىرعان بەلەس­تەرى وتە زور ەكە­نىن اڭعارۋ قيىن ەمەس. ەڭ باستىسى، ول قازاقستاننىڭ ما­نەرلەپ سىرعاناۋ سپورتىن جاڭا بيىككە كوتەردى.

تەننىڭ ەل سپورتىنا بەرگەنىنەن بەرەرى كوپ ەدى. الايدا 2018 جىل­دىڭ 19 شىلدەسىندە الماتىنىڭ قاق ورتاسىندا ول قاندىقول قاراقشىلاردىڭ قولىنان قازا تاپتى. سول قارالى كۇنى دەنيس ءوزىنىڭ «تەمىر تۇلپارىن» قۇرمانعازى مەن بايسەيىتوۆا كوشەلەرىنىڭ قيىلىسىنا قويىپ كەتەدى. سول ماڭدى اينالشىقتاپ جۇرگەن ەكى ۇرى كولىكتىڭ ايناسىن قولدى ەتپەك بولدى. سونى بايقاپ قالعان دەنيس ولاردى توقتاتۋعا تىرىسادى. توبەلەس كەزىندە قاراقشىلاردىڭ ءبىرى اتاقتى سپورتشىعا پىشاق سۇعادى. تەن اسا اۋىر حالدە اۋرۋحا­ناعا جەتكىزىلەدى. بىراق اقجەلەڭدىلەر ورىم­دەي جاستى اجال تىر­ناعىنان امان الىپ قالا المادى. دەنيس نەبارى 25 جاستا ەدى...

2019 جىلى ال­ماتىدا دەنيس تەندى ەسكە تۇسىرۋگە ارنالعان حالىقارالىق ءتۋرنيردىڭ تۇساۋى كەسىلدى. ودان كەيىن ول استانادا وتە باستادى. «چەلەندجەر» ساناتىنا ەنگەن جارىسقا الەمنىڭ كوپتەگەن مەملەكەتىنىڭ مىقتى مانەرلەپ سىرعاناۋشىلار كەلىپ، ءوز ونەرلەرىن ورتاعا سالدى. بىلتىر ەرلەر ارا­سىنداعى دودادا العاشقى ءۇش ورىندى رەسەي سپورتشىلارى يەلەندى. ولار – پەتر گۋمەننيك، مارك كوندراتيۋك جانە اندرەي موزالەۆ. ايەلدەر سايىسىندا بەلورۋسسيالىق ۆيكتوريا سافرونوۆا التىننان القا تاقسا، ازەربايجاندىق ەكاتەرينا ريابوۆا مەن ۋكراينالىق اناستاسيا شاباتوۆا كۇمىس پەن قولا مەدالداردى مويىندارىنا ءىلدى. بيشىلەردىڭ باسەكەسى رەسەيلىك جۇپ اناستاسيا سكوپتسوۆا مەن كيريلل الەشيننىڭ جەڭىسىمەن اياقتالدى.

مىنە، ەندى «دەنيس تەننىڭ مەموريالى» قايتا الماتىدا وتەتىن بولدى. دەنيس ءدال وسى الاتاۋ باۋرايىندا دۇنيەگە كەلگەنىن جۇرت جاقسى بىلەدى. ونىڭ بالالىق جانە جاستىق شاعى وسى اسەم شاھاردا ءوتتى. ولاي بولسا، «حالىق ارەنادا» وتەتىن جارىستى تاماشالاۋ ءۇشىن كورەرمەندەردىڭ كوپتەپ كەلەتىنىنە ەش كۇمانىمىز جوق.

سوڭعى جاڭالىقتار

كونستيتۋتسيالىق مارتەبە بەرىلدى

قازاقستان • بۇگىن، 01:05

بلوگەر جۋرناليست ەمەس!

قوعام • بۇگىن، 00:52

سوت جۇيەسىن جەتىلدىرۋ

ساياسات • بۇگىن، 00:06

ماقتاشىلاردىڭ مۇڭى

ەكونوميكا • كەشە

ۋاقىت تالابى

قوعام • كەشە

كۇرەسكەر گەينە

ادەبيەت • كەشە

اجالدى جەڭگەن اسپان

ادەبيەت • كەشە

اعاش كوشەتى ەگىلدى

ايماقتار • كەشە

ۇقساس جاڭالىقتار