استاناداعى Women Grand Prix-2022 دەپ اتالاتىن ايەلدەر اراسىنداعى اسا ءىرى حالىقارالىق تۋرنيردە الەمنىڭ ەڭ تاڭداۋلى دەگەن 12 ويىنشىسى باق سىنادى. سونداي-اق بۇل جارىستا قازاقستان قۇراماسى ساپىندا بىلتىرعى جىلدام شاحماتتان (بليتس) الەم چەمپيوناتىنىڭ جەڭىمپازى ءبيبىسارا اساۋباەۆا مەن تالاي باسەكەدە توپ جارعان حالىقارالىق دارەجەدەگى گروسسمەيستەر جانسايا ابدىمالىك ونەر كورسەتتى.
11 كەزەڭگە جالعاسقان Women Grand Prix-2022 جارىسىنىڭ ءبىرىنشى كەزەڭىندە بىردە-ءبىر ويىندا جەڭىلمەي, سەگىز ۇپاي ولجالاعان ەكاتەرينا لاگنو باس جۇلدەنى ولجالادى. سوڭعى تۋردا ول 38 جاستاعى وتانداسى الەكساندرا كوستەنيۋكپەن كەزدەسىپ, قارا فيگۋرامەن ويناسا دا تەڭ ناتيجەگە قول جەتكىزدى. جۇلدەلى ەكىنشى ورىندى الەمدىك رەيتينگتە ەكىنشى ورىندا تۇرعان تاعى ءبىر رەسەيلىك الەكساندرا گورياچكينا جەڭىپ الدى. 11-تۋردا ول ۇندىستاندىق رامەشبابۋ ۆايشاليمەن ۇپاي ءبولىستى. ەنشىسىندە – 7,5 ۇپاي بار. ال ۇزدىك ۇشتىكتى جارىستىڭ التىنشى كەزەڭىنە دەيىن كوش باستاپ كەلگەن قىتايلىق چجۋ تسزينەر (6,5 ۇپاي) تۇيىندەدى.
وكىنىشكە قاراي, قازاقستاندىق شاحماتشىلار جەڭىس تۇعىرىنان كورىنە المادى. جەتى تۋردا تەڭ ويناپ, سوڭعى ەكى ماتچتا عانا جەڭىسكە جەتكەن جانسايا ابدىمالىك 5,5 ۇپايمەن بەسىنشى ورىنعا تابان تىرەسە, جەتى رەت تەڭ ويناپ, بىرەۋىندە قارسىلاسىنان باسىم تۇسكەن ءبيبىسارا اساۋباەۆا 4,5 ۇپايمەن 11-ورىننان كورىندى. ايتا كەتەيىك, جارىستىڭ ءبىرىنشى تۋرىندا-اق ەكى وتانداسىمىز ءبىر-بىرىمەن كەزدەستى. قازاقستاننىڭ قوس مىقتىسى اراسىندا وتكەن ويىن تەڭ ەسەپپەن اياقتالدى.
وسىلايشا, جارىس جەڭىمپازى اتانعان لاگنو 15 000 ەۋرو قارجىلاي سىياقى مەن 160 رەيتينگتىك ۇپايعا يە بولسا, كۇمىس جۇلدەگەر الەكساندرا گورياچكينا 12 000 ەۋرو جانە 130 ۇپايدى قانجىعاسىنا بايلادى. ءۇشىنشى ورىنداعى چجۋ تسزينەر 10 000 ەۋرو مەن 110 رەيتينگتىك ۇپايعا يە بولدى.
سونداي-اق ايەلدەر اراسىنداعى العاشقى گران-پري كەزەڭىندە جۇلدەگە ىلىگە الماعان ويلىلار ويىنىنىڭ وكىلدەرى دە قارجىلاي سىياقى مەن رەيتينگتىك ۇپايدان قۇرالاقان قالعان جوق. ماسەلەن, ءتورتىنشى ورىنداعى الەكساندرا كوستەنيۋككە 8 000 ەۋرو مەن 90 ۇپاي بەرىلسە, بەسىنشى ساتىعا جايعاسقان جانسايا ابدىمالىك 6 750 ەۋرو جانە 80 ۇپايدى قورجىنىنا سالدى. كەيىنگى ورىندارعا جايعاسقان تان چجۋني (5 750 ەۋرو, 70 ۇپاي), رامەشبابۋ ۆايشالي (5 000 ەۋرو, 60 ۇپاي), دينارا ۆاگنەر (4 500 ەۋرو, 50 ۇپاي), الينا كاشلينسكايا (4 000 ەۋرو, 40 ۇپاي), مەن ەليزابەت پەتتس (3 500 ەۋرو, 30 ۇپاي), ءبيبىسارا اساۋباەۆا (3 000 ەۋرو, 20 ۇپاي) جانە پولينا شۋۆالوۆانىڭ دا (2 500 ەۋرو, 10 ۇپاي) استانادان قورجىنى بوس قايتقان جوق.
