ءبىلىم • 02 قازان، 2022

اسحات ايماعامبەتوۆ مۇعالىمدەردى كاسىبي مەرەكەسىمەن قۇتتىقتادى

128 رەت كورسەتىلدى

قر ءبىلىم ءمينيسترى اسحات ايماعامبەتوۆ ەلىمىزدىڭ بارشا مۇعالىمدەرىن كاسىبي مەرەكەسىمەن قۇتتىقتادى، دەپ حابارلايدى Egemen.kzء مينيستردىڭ Telegram ارناسىنا سىلتەمە جاساپ.

قىمباتتى ارىپتەستەر!

سىزدەردى كاسىبي مەرەكەمەن شىن جۇرەكتەن قۇتتىقتايمىن!

ۇستاز - ول تەك ماماندىق قانا ەمەس، سونىمەن بىرگە ارنايى اعارتۋشىلىق ميسسيا. سىزدەر كۇن سايىن بالالاردى ءبىلىم نارىمەن سۋسىنداتىپ، ولاردىڭ دارىندارىن اشۋعا، دۇرىس قۇندىلىقتاردى بويلارىنا سىڭىرۋگە كومەكتەسەسىزدەر.

بۇگىنگى كۇنى ەلىمىزدەگى ءبىلىم بەرۋ جۇيەسى - 500 مىڭعا جۋىق ۇستازىمىز ەڭبەك ەتەتىن ۇلكەن سالا.

قاسىم-جومارت كەمەل ۇلى توقاەۆ پرەزيدەنت بولىپ سايلانعاننان كەيىن بىردەن مۇعالىمدەر كورپۋسىن قولداۋ ءۇشىن بارلىق شارانى قابىلداۋدى تاپسىردى.

وسىلايشا 2019 جىلى «پەداگوگ مارتەبەسى تۋرالى» زاڭ قابىلدانىپ، مۇعالىمدەردى شامادان تىس ەسەپ بەرۋدەن، مىندەتىنە جاتپايتىن فۋنكتسيالاردان بوساتۋعا جاعداي جاسالدى. بىلىكتىلىك ساناتى، ماگيستراتۋرا، سىنىپ جەتەكشىلىگى، داپتەر تەكسەرگەنى جانە ت.ب. ءۇشىن ءار ءتۇرلى قوسىمشا تولەمدەر ەنگىزىلىپ، ولاردىڭ كولەمى ۇلعايتىلدى»، دەپ جازدى ا. ايماعامبەتوۆ.

ءمينيستردىڭ ايتۋىنشا، مەملەكەت باسشىسىنىڭ شەشىمدەرى ارقاسىندا مۇعالىمدەردىڭ جالاقىسى بىرنەشە جىلدان بەرى جىل سايىن 25%-عا كوتەرىلىپ كەلەدى.

بيىل 25 جىلدان استام ەڭبەك ەتكەن بارلىق ۇستازعا ارنايى ماراپات تاعايىندالدى. ويتكەنى ءوز ىسىنە وسىنشا جىل ادال قىزمەت ەتكەن ماماندار ەرەكشە قۇرمەت پەن قولداۋعا لايىق.

سونىمەن قاتار 30 جىلدان استام پەداگوگيكالىق تاجىريبەسى بار مۇعالىمدەردى ساناتتار مەن اي سايىنعى قوسىمشا تولەمدەر الۋ ءۇشىن تاپسىراتىن تەستتەن بوساتۋ تۋرالى شەشىم قابىلدادى.

«قىركۇيەك ايىنان باستاپ ەل مەكتەپتەرىنىڭ باسىم كوپشىلىگى بەس كۇندىك وقۋ اپتاسىنا اۋىستى. سوندىقتان وسى مەكتەپتەردىڭ مۇعالىمدەرىنە سەنبىنى قوسىمشا دەمالىس كۇنى رەتىندە بەرۋدى ءجون كوردىك. ەندى وزدەرىڭىزگە جانە جاقىندارىڭىزعا كوبىرەك كوڭىل بولە الاسىزدار.

كەلەسى جىلى قاڭتار ايىنان باستاپ مەكتەپ، كوللەدج جانە قوسىمشا ءبىلىم بەرۋ ۇيىمدارىنداعى بارلىق پەداگوگتىڭ جالاقىسى تاعى 25%-عا وسەدى.

سونداي-اق كەلەسى جىلى ەل پرەزيدەنتىنىڭ تاپسىرماسى بويىنشا بالاباقشالارداعى بارلىق تاربيەشىنىڭ جالاقىسى وسەدى.

ءبىز بۇل باعىتتاعى جۇمىستى توقتاتپاي، بۇدان دا قولايلى جاعداي جاساۋدى جالعاستىرا بەرەمىز.

قادىرلى ارىپتەستەر!

پاندەميا كەزىندە دە وزدەرىڭىزدى لايىقتى كورسەتە بىلدىڭىزدەر. كوپتەگەن اتا-انا سىزدەردىڭ جۇمىستارىڭىزدىڭ قانشالىقتى جاۋاپتى جانە قيىن ەكەنىن تاعى ءبىر مارتە ءتۇسىندى. ال بالالار مۇعالىمنىڭ مەيىرىمدى كوزقاراسى، جىلى ءسوزى، ونىڭ كومەگى قانشالىقتى ماڭىزدى ەكەنىن سەزىندى.

مەن قالا جانە اۋىل مەكتەپتەرىنە بارعاندا ارىپتەستەرىممەن اڭگىمەلەسكەندى ۇناتامىن. سىزدەردىڭ ءبىلىم سالاسىنا ءسىڭىرىپ جاتقان قاجىرلى ەڭبەكتەرىڭىزدى كورىپ، ىستەرىڭىزگە دەگەن سۇيىسپەنشىلىكتەرىڭىز جانە ادالدىقتارىڭىز ءۇشىن العىسىمدى بىلدىرگىم كەلەدى.

سىزدەرگە زور دەنساۋلىق، باقىت، ىستەرىڭىزگە بەرەكە جانە شاڭىراقتارىڭىزعا اماندىق تىلەيمىن!

مەرەكەلەرىڭىزبەن، قۇرمەتتى ارىپتەستەر! ۇستازدار كۇنى قۇتتى بولسىن!»، دەلىنگەن ءمينيستردىڭ قۇتتىقتاۋ سوزىندە.

سوڭعى جاڭالىقتار

دوللار باعامى تومەندەدى

قارجى • بۇگىن، 16:10

ۇقساس جاڭالىقتار