اباي اتىنداعى مەكتەپتەر قوستاناي, جىتىقارا, ليساكوۆ جانە رۋدنىي قالالارىندا ورنالاسقان. وبلىس ورتالىعىنداعى №29 مەكتەپكە, سونداي-اق ارقالىقتىڭ ىرگەسىندەگى رودينا اۋىلىنداعى ءبىلىم وشاعى مەن رۋدنىيداعى قاشار جالپى ءبىلىم بەرەتىن مەكتەپكە ءاليحان بوكەيحاننىڭ ەسىمى بەرىلدى. سونىمەن قاتار رۋدنىي قالاسىنداعى ەكى بىردەي ءبىلىم ۇياسى الاش ارداقتىلارىنىڭ ەسىمدەرىمەن اتالاتىن بولادى. كەنشىلەر شاھارىنداعى №19 مەكتەپ احمەت بايتۇرسىن ۇلىنىڭ, №15 مەكتەپ مىرجاقىپ دۋلات ۇلىنىڭ اتىن يەلەندى.
رۋدنىيدا وسىدان 20-25 جىل بۇرىن جالعىز-اق قازاق مەكتەبى بولاتىن. «وتانداستار قورىنىڭ» وبلىستاعى وكىلى ءنازيرا جارىمبەتوۆانىڭ ايتۋىنشا, شاعىن شاھارداعى قازاق مەكتەپتەرىنىڭ كوبەيۋىنە, قالاداعى ءبىلىم وشاقتارىنا الاش ارداقتىلارى ەسىمدەرىنىڭ بەرىلە باستاۋىنا وسى وڭىرگە كەلىپ جاتقان قانداستار كوشىنىڭ ىقپالى ەرەكشە.
– وزبەكستاننان كوشىپ كەلىپ, رۋدنىي قالاسىن قۇتتى قونىس ەتىپ وتىرعان اعايىننىڭ سانى 17 مىڭدى شامالاپ قالدى. كەنشىلەر قالاسىنىڭ قازاقىلانىپ, بۇرىن-سوڭدى بولماعان قازاق مەكتەپتەرىنىڭ اشىلۋى, رۋدنىي مەن قاشاردا ورنالاسقان ءۇش مەكتەپكە ءۇش بىردەي الاش ارىسىنىڭ ەسىمدەرىنىڭ بەرىلۋى سونىڭ جەمىسى. بۇگىندە بۇل مەكتەپتەرگە وقۋشى سىيماي جاتىر. سوندىقتان قازاق مەكتەپتەرىن ءالى دە اشا بەرۋ كەرەك, – دەدى ن.جارىمبەتوۆا.
سونىمەن قاتار امانگەلدى اۋدانىنا قاراستى قابىرعا اۋىلىنداعى ن.كرۋپسكايا اتىنداعى ورتا مەكتەپ ەندى بەلگىلى ساتيريك, جۋرناليست جۇماتاي سابىرجان ۇلىنىڭ ەسىمىمەن اتالاتىن بولدى. ال قاراسۋ اۋدانىنداعى ورتا مەكتەپكە ۇلى اعارتۋشى ىبىراي ءالتىنساريننىڭ ەسىمى بەرىلدى.
قوستاناي وبلىسى
