كەيىنگى جىلدارى قازاقستاننىڭ ءتۋريزمى جاپونيا ءۇشىن پەرسپەكتيۆالى جانە ماقساتتى نارىقتىڭ بىرىنە اينالىپ كەلەدى. بۇعان قازاقستاننىڭ ەلگە كەلەتىن جاپونيا تۋريستەرىنە ۆيزاسىز رەجىم ورناتىلعانى سەبەپ بولىپ وتىر. حالىق سانى جاعىنان الەمدە 11-ورىنعا يە جاپونيانىڭ (126 ملن) 16-18 ملن ازاماتى جىل سايىن شەتەلگە ساياحاتتايدى ەكەن. سونداي-اق ولار باسقا شەتەلدىڭ تۋريستەرىنە قاراعاندا ساياحاتتارىندا ورتاشا ەسەپپەن 2-3 ەسە كوپ قارجى جۇمسايدى. جاپونيا سىرتقى ءتۋريزمىن دامىتۋ جىلدامدىعى بويىنشا الەمدە 15-ورىن, حالىقارالىق تۋريزمگە جۇمسالعان شىعىندار بويىنشا 4-ورىن الادى.
جاپونيانىڭ قازاقستانعا قاراعاندا اۋماعى الدەقايدا كىشى جانە ەل ىشىندە تاۋ كوپ بولعاندىقتان, ولاردى قازاقستاننىڭ كەڭ دالاسى, وزەن مەن كولى, تۇمسا تابيعاتى قىزىقتىرادى. ساياحات كەزىندە جاپوندار ەلىمىزدىڭ ءار ايماعىنداعى كورىكتى جەرلەر بەينەلەنگەن كادەسىيلاردى ساتىپ الۋدى ءجون كورەدى ەكەن.
سونىمەن قاتار كەيىنگى جىلدارى جاپونيانىڭ حالىقارالىق ىنتىماقتاستىق اگەنتتىگى (JICA) قازاقستان, قىرعىزستان, تاجىكستان, تۇرىكمەنستان, وزبەكستان سەكىلدى ورتالىق ازيا ەلدەرىنىڭ تۋريزم سالاسىن ىلگەرىلەتۋ بويىنشا ىلعي قولداۋ كورسەتىپ كەلەدى.
وڭىرلىك ءتۋريزمدى ىلگەرىلەتۋ جونىندەگى باستامالاردىڭ ءبىرى رەتىندە JICA توكيوداعى Tourism Expo Japan 2022 كورمەسىندە جوعارىداعى بەس مەملەكەتتىڭ تانىستىرىلىمىن ءبىر ستەند اياسىنا بىرىكتىرىپ, اقىسىز نەگىزدە ۇيىمداستىرىپ بەردى. حالىقارالىق كورمەدە قازاقستان دەلەگاتسياسى كەلۋشىلەرگە ۇلتتىق تاعامدارىمىز بەن مادەنيەتىمىزدى تانىستىردى.
ء«بىز ءۇشىن ورتالىق ازيا ەلدەرىمەن بىرلەسكەن ستەندكە قاتىسۋ ۇلكەن تاجىريبە. دەگەنمەن, ءار ەل ءوز ەرەكشەلىگىن كورسەتۋ ارقىلى, ءوز ەلىنىڭ ءتۋريزمىن تانىستىردى. قۋانارلىعى, قازاقستاننىڭ ستەندى تۋريستەر ەڭ كوپ كەلگەن نىسانداردىڭ بىرىنە اينالدى. قازاقستانعا دەگەن قىزىعۋشىلىقتىڭ جوعارى بولۋىنا بايلانىستى, ەلىمىزدى تانىستىرۋعا بارعان تۋروپەراتورلاردىڭ بوس ۋاقىتى مۇلدەم بولعان جوق. جاپونيانىڭ شىعىس باعىتىندا جۇمىس ىستەيتىن تۋركومپانيالارىمەن ۇنەمى كەلىسسوز جۇرگىزىپ وتىردى», دەيدى Kazakh Tourism ۇلتتىق كومپانياسىنىڭ توراعاسى تالعات امانباەۆ.
قازاقستاندىق تۋروپەراتورلاردىڭ وسى ءبىر ايتۋلى كورمەگە قاتىسۋى ەلىمىزدىڭ تۋريستىك الەۋەتىن عانا ەمەس, سالت-ءداستۇرىن, مادەنيەتىن تانۋدى ارتتىرۋعا, شەتەلدىك اۋديتوريانى ادىلەتتى قازاقستانمەن تانىستىرۋعا مۇمكىندىك بەردى.
