قورعانىس مينيسترلىگى ازاماتتاردىڭ مەرزىمدى اسكەري قىزمەتىن وتەۋگە ىنتاسىن ارتتىرۋ ماقساتىندا جاڭا جوبا باستاۋدى كوزدەپ وتىر. ول مەرزىمدى اسكەري قىزمەتىن وتكەرگەن بارلىق ازاماتتارعا ۇلتتىق بىرىڭعاي تەستىلەۋدى ەسەپكە الماي, اسكەري بورىشىن وتەگەن سوڭ ەكى جىل ىشىندە جوعارى وقۋ ورىندارىنا تۇسۋگە مۇمكىندىك بەرەدى.
بۇگىندە قورعانىس مينيسترلىگى ءتيىستى ەرەجەلەرگە وزگەرىستەر ەنگىزۋ جۇمىستارىن باستاپ كەتتى. جوبانى ىسكە اسىرۋ ءبىلىم بەرۋ سالاسىنداعى زاڭناماعا وزگەرىستەر ەنگىزۋدى تالاپ ەتپەيدى. بۇل جوبا 2023 جىلدان باستالادى. مۇنداي جەڭىلدىكتەر قازىرگى ۋاقىتتا بورىشىن وتەپ جۇرگەن ازاماتتارعا جانە 2022 جىلى اسكەرگە شاقىرىلۋعا جاتاتىن ساربازدارعا بەرىلەتىن بولادى. دەمەك كۇنتىزبە بويىنشا كۇزدە اسكەردەن كەلگەن سوڭ, ولاردىڭ وقۋعا تۇسۋگە مۇمكىندىكتەرى بار. بۇرىنعى اسكەري قىزمەتشىلەر جوعارى وقۋ ورىندارىنىڭ اسكەري كافەدراسىندا تەگىن وقي الادى. جاڭا جوبانى عىلىم جانە جوعارى ءبىلىم مينيسترلىگى دە قولداپ وتىر. بۇدان بولەك, اسكەرگە بارىپ كەلگەندەرگە بىرنەشە جەڭىلدىك جاسالادى. اتاپ ايتقاندا, ولار – ۇبت-نى ەسەپكە الماي, اڭگىمەلەسۋ ناتيجەسى بويىنشا ەكى جىل ىشىندە اقىلى نەگىزدە جوعارى وقۋ ورنىنا ءتۇسۋ, جوو اسكەري كافەدراسىندا تەگىن وقۋ جانە اسكەري وقۋ ورىندارىنا ەمتيحانسىز جانە ۇبت-سىز وقۋعا ءتۇسۋ مۇمكىندىكتەرى.
جوبا بويىنشا اسكەري وقۋ ورىندارىنا ەمتيحانسىز ءتۇسۋ جانە ازاماتتىق جوعارى وقۋ ورىندارىندا وقۋ گرانتىن الۋ كەزىندە اسكەري قىزمەتشىلەردىڭ وتان الدىنداعى بورىشىن وتەگەن ازاماتتارعا باسىمدىق بەرىلەدى دەپ وتىر. ەلىمىزدىڭ بارلىق وڭىرىندەگى قىرىققا جۋىق جوعارى وقۋ ورنى اسكەري بورىشىن وتەگەن ازاماتتارعا ءبىلىم الۋعا جەڭىلدىكتەر بەرەتىنىن راستادى.
– جەكە قاسيەتتەرىنە, ۇلگىلى تارتىبىنە جانە مەرزىمدى اسكەري قىزمەتىن وتەۋ كەزەڭىندە جاۋىنگەرلىك دايارلىقتا قول جەتكىزگەن جوعارى ناتيجەلەرىنە قاراي اسكەري قىزمەتشىلەرگە جوعارى وقۋ ورنىنىڭ گرانتى ەسەبىنەن تەگىن جوعارى ءبىلىم الۋ مۇمكىندىگى بەرىلەدى. مۇنداي جاستارعا قورعانىس مينيسترلىگىنىڭ اسكەري وقۋ ورىندارىنا ەمتيحانسىز جانە ۇبت-نى ەسەپكە الماي-اق وقۋعا ءتۇسۋ مۇمكىندىگى ۇسىنىلادى. اسكەري وقۋ ورىندارىنا ەمتيحانسىز ءتۇسۋ جانە ازاماتتىق جوعارى وقۋ ورىندارىندا وقۋ گرانتىن الۋ كەزىندە اسكەري قىزمەتشىلەردىڭ وتان الدىنداعى بورىشىن وتەگەن بالالارىنا دا باسىمدىق بەرىلەدى دەپ وتىر. جوبانى ىسكە اسىرۋ ءبىلىم بەرۋ سالاسىنداعى زاڭناماعا وزگەرىستەر ەنگىزۋدى تالاپ ەتپەيدى, – دەپ اتاپ ءوتتى قورعانىس مينيسترلىگى.
ازىرگە بۇل باستامانى 30 ۋنيۆەرسيتەت قولداعان. الداعى ۋاقىتتا ولاردىڭ سانى 50-گە دەيىن جەتۋى مۇمكىن. قازىر جوعارى وقۋ ورىندارى جاۋىنگەرلەر تەگىن تۇسە الاتىن ماماندىقتار ءتىزىمىن دايىنداپ جاتىر.
سونىمەن قاتار قورعانىس مينيسترلىگى ەكىنشى دەڭگەيلى بانكتەرمەن اسكەري بورىشىن وتەپ جۇرگەندەرگە «نەسيەلىك دەمالىس» بەرۋ ماسەلەسىن پىسىقتاپ جاتىر. سونداي-اق مينيسترلىك ساربازداردىڭ قاۋىپسىزدىگى ماسەلەسىن دە قولعا الماقشى. ماسەلەن, اعا وفيتسەرلەردىڭ جاۋاپكەرشىلىگىن ارتتىرىپ, اتا-انالار كوميتەتىمەن تىعىز بايلانىس ورناتۋ جوسپاردا بار. پسيحولوگتەر دە جاۋىنگەرلەرمەن جيىرەك كەزدەسىپ, مورالدىق قولداۋ كورسەتپەك. بۇدان بولەك, اسكەري بورىشىن وتەگەن جانە «كادەت» سىنىبىن بىتىرگەن تۇلەكتەر ۋنيۆەرسيتەتكە گرانت الۋ ءۇشىن 5 پايىز كۆوتا بولىنەدى.
