الداعى سەنبى كۇنى استاناداعى «ۇلتتىق تەننيس ورتالىعىندا» كاسىپقوي تەننيسشىلەر قاۋىمداستىعى (ATP) ۇيىمداستىراتىن ATP 500 ساناتىنداعى جىلدىڭ ەڭ سوڭعى ءتۋرنيرى – Astana Open باسەكەسىنىڭ جالاۋى جەلبىرەيدى. نەگىزى تەننيسشىلەردىڭ بۇل دوداسى جوسپار بويىنشا قىتايدا وتۋگە ءتيىس ەدى. الايدا ATP بيىل قىتاي جەرىندە وتەتىن بارلىق ءتۋرنيردى كەرى قايتارىپ الدى. ءسويتىپ, 2004 جىلدان بەرى بەيجىڭدە وتكىزىلىپ كەلگەن جارىس بيىلدان باستاپ قازاقستان استاناسىنا كوشىرىلدى. وسىلايشا, بۇعان دەيىن ەلوردادا ەكى رەت وتكەن ATP 250 جارىسىنىڭ مارتەبەسى جوعارىلاپ, ATP 500 تۋرنيرىنە اينالدى.
استاناداعى ءتۋرنيردىڭ ماڭىزدىلىعىنا توقتالماي تۇرىپ, الدىمەن تۇسىنىكتى بولۋ ءۇشىن ATP 250 مەن ATP 500 جارىسىنىڭ ايىرماشىلىعى قانداي, كاسىپقوي تەننيسشىلەر قاۋىمداستىعى (ATP) جىلىنا قانشا تەننيس ءتۋرنيرىن ۇيىمداستىرادى, بۇلاردان بولەك تاعى قانداي جارىستار بار, تەننيسشىلەر وزدەرى قاتىساتىن ءتۋرنيردى قالاي تاڭدايدى دەگەن سياقتى وقىرمانداردى قىزىقتىراتىن سۇراقتارعا از-كەم جاۋاپ بەرە كەتەيىك.
جالپى, كاسىپقوي تەننيسشىلەر قاۋىمداستىعىنىڭ كۇنتىزبەسىنە ساي, جىلىنا ءارتۇرلى ساناتتاعى 800-گە جۋىق تەننيس ءتۋرنيرى وتەدى. سونىڭ ىشىندە ATP ارالاساتىن ەڭ نەگىزگى تۋرنيرلەرگە توقتالار بولساق, قاۋىمداستىق ءبىر جىل بەدەرىندە ۇزدىك تەننيسشىلەر باق سىنايتىن «ۇلكەن دۋلىعا» ساناتىنداعى ەڭ ءىرى ءتورت جارىستىڭ (اۋستراليا اشىق چەمپيوناتى, فرانتسيا اشىق چەمپيوناتى, «ۋيمبلدون», اقش اشىق چەمپيوناتى), ATP Master 1000 (9 تۋرنير), ATP 500 (13 تۋرنير) جانە ATP 250 (40 تۋرنير) باسەكەلەرىنىڭ وتكىزىلۋىنە تىكەلەي اتسالىسادى.
ATP وسى جارىستاردىڭ دارەجەسىنە قاراي رەيتينگتىك ۇپايلاردى دا بەلگىلەيدى. ايتالىق, «ۇلكەن دۋلىعا» ساناتىنداعى بارلىق جارىستىڭ جەڭىمپازىنا 2000 ۇپاي بەرىلسە, كەيىنگى دەڭگەيدەگى تۋرنيرلەردە باسەكە اتاۋىنا بايلانىستى ۇپايلاردى ۇلەستىرەدى. ماسەلەن, ATP Master 1000 تۋرنيرىندە توپ جارعاندار 1000 رەيتينگتىك ۇپايدى قورجىنىنا سالسا, ATP 500-دە ۇزدىك شىققان تەننيسشى 500 ۇپايعا يە بولادى. ATP 250 دوداسىندا دا ءدال سولاي. جەڭىمپاز سپورتشى ءوز رەيتينگىنە 250 ۇپاي قوسادى.
ءتۋرنيردىڭ قارجىلاي سىياقىسى دا جارىستىڭ دەڭگەيىنە قاراي بەلگىلەنەدى. «ۇلكەن دۋلىعا» ساناتىنداعى بيىلعى جارىستاردىڭ جالپى جۇلدە قورى – 35-71 ميلليون اقش دوللارى ارالىعىندا بولدى. ATP Master 1000 جارىستارىنا قاتىسقان تەننيسشىلەرگە 6 جانە 10 ميلليون اقش دوللارى كولەمىندە قارجىلاي سىياقى ۇلەستىرىلدى. ATP 500 ساناتىنداعى تۋرنيرلەردىڭ جۇلدە قورى 1,5-4 ميلليون اقش دوللارى ارالىعىندا بولادى. رەسمي دەرەكتەردە Astana Open ATP 500 ءتۋرنيرىنىڭ جۇلدە قورى 3,728,045 اقش دوللارىن قۇرايدى دەلىنىپ وتىر. ATP 250 ۇيىمداستىرۋشىلارى 1 ميلليون اقش دوللارى كولەمىندە قارجىلاي سىياقى تاعايىندايدى.
مىنە, وسى جايتتاردان كەيىن-اق قاي ءتۋرنيردىڭ ءباسى جوعارى ەكەنىن, تەننيسشىلەر كوبىنە قاي جارىستى تاڭدايتىنىن اڭعارۋعا بولادى. ATP رەيتينگىنىڭ العاشقى جۇزدىگىندە تۇرعان تەننيسشىلەر مىندەتتى تۇردە «ۇلكەن دۋلىعا», ATP Master 1000, ATP 500 ساناتىنداعى تۋرنيرلەرگە قاتىسۋعا تىرىسادى. سەبەبى اتالعان جارىستاردا رەيتينگتەگى ۇپاي سانىن دا, قارجىلىق جاعدايىن دا جاقسارتىپ الۋعا تولىق مۇمكىندىك بار. ماسەلەن, قازىردىڭ وزىندە ەلورداداعى Astana Open ATP 500 تۋرنيرىنە جۋىردا عانا اقش اشىق بىرىنشىلىگىندە توپ جارعان, قازىرگى تاڭدا ەرلەر اراسىنداعى الەمدىك رەيتينگتە ءبىرىنشى ورىندا تۇرعان يسپانيالىق كارلوس الكاراس, سونداي-اق ءار جىلدارى «ۇلكەن دۋلىعا» تۋرنيرلەرىندە باس جۇلدەنى جەڭىپ, ATP رەيتينگىندە كوش باستاعان سەربيالىق نوۆاك دجوكوۆيچ, رەسەيلىك دانيل مەدۆەدەۆ, حورۆاتيالىق مارين چيليچ, وليمپيادا چەمپيوندارى – شۆەيتساريالىق ستانيسلاس ۆاۆرينكا (بەيجىڭ, (2008) جانە بريتانيالىق ەندي ماررەي (لوندون (2012), ريو (2016) سىندى تەننيسشىلەر قاتىساتىندارىن مالىمدەدى. سونىمەن قاتار رەيتينگتەگى توپ-10 سپورتشىنىڭ بەسەۋى, توپ-20 قاتارىنداعى تاعى بەس تەننيسشىنىڭ ەلورداعا كەلەتىنى بەلگىلى بولدى.
جۇپتىق سىندا دا «ۇلكەن دۋلىعا» دوداسىنىڭ بىرنەشە چەمپيونى وينايدى. جانكۇيەرلەر دۇنيەجۇزىلىك رەيتينگتە كوش باستاعان دجو سولسبەري (1 اتر), رادجيۆ رام (2 اتر), نيل سكۋپسكي (3 اتر), ۆەسلي كولحوف (4 اتر), جان-جيۋلەن رويەر (5 اتر), مارسەلو ارەۆالو
(6 اتر), حورۆاتيالىقتار – نيكولا مەكتيچ/ماتە پاۆيچ, قولۋمبيالىقتار روبەرت فاراح/حۋان سەباستيان كابال مەن تاعى باسقا تەننيسشىلەردىڭ ونەرىن تاماشالاي الادى.
ءوز جەرىمىزدە وتەتىن حالىقارالىق دودادا قازاقستاندىق تەننيسشىلەردەن ەلىمىزدىڭ ءبىرىنشى راكەتكاسى الەكساندر بۋبليك نەگىزگى كەزەڭدە ويناسا, رەيتينگتە تومەن تۇرعاندىقتان, ۇلتتىق قۇرامانىڭ بەدەلدى مۇشەسى ميحايل كۋكۋشكين ۋايلد كارد (ارنايى شاقىرتۋ) ارقىلى قاتىسادى. سونداي-اق دەنيس ەۆسەەۆ, بەيبىت جۇقاەۆ, گريگوري لوماكين, دميتري پوپكو قازاقستان چەمپيوناتى بارىسىندا Astana Open دوداسىنىڭ ىرىكتەۋ سايىستارىنا جولداما الۋ ءۇشىن بارىن سالادى. ال جۇپتىق سىندا اندرەي گولۋبەۆ پەن الەكساندر نەدوۆەسوۆ ونەر كورسەتەدى.
جالپى, Astana Open ATP 500 ءتۋرنيرى – قازاقستاندا وتكەلى تۇرعان ATP ساناتىنداعى ەڭ ءىرى ءتۋرنيردىڭ ءبىرى بولسا, سارى قۇرلىق ايماعىنداعى ءۇشىنشى جارىس سانالادى. ازياداعى ATP 500 سەرياسى بويىنشا وسىعان دەيىنگى ءىرى جارىس دۋبايدا (Dubai Tennis Championships) وتسە, ەندى Astana Open دوداسىمەن ءبىر مەزگىلدە Rakuten Japan Open Tennis Championship ءتۋرنيرى دە ۇيىمداستىرىلادى.
