ساياسات • 29 قىركۇيەك، 2022

قارجىنىڭ قايتارىمى بولا ما؟

42 رەت كورسەتىلدى

جولداۋدا كوتەرىلگەن ۇلكەن ماسەلەنىڭ ءبىرى – اۋىل شارۋاشىلىعىن دامىتۋ. پرەزيدەنت قۇجاتتا بۇل سەكتوردى دامىتۋ ەلىمىزدەگى باستى پروبلەمانىڭ ءبىرى دەپ اتاپ كورسەتتى. اۋىل شارۋاشىلىعىنداعى احۋال مەملەكەتىمىزدىڭ ازىق-ت ۇلىك قاۋىپسىزدىگىنە تىكەلەي اسەر ەتەتىنى تاعى بەلگىلى.

وسىعان وراي مەملەكەت باسشىسى: «ەلىمىزدىڭ اۋىل شارۋاشىلىعى ونىمدەرىنىڭ كولەمىن جانە ونىڭ قوسىمشا قۇنىن ارتتىرۋ قاجەت. بۇل – ستراتەگيالىق مىندەت. قازىر تەك بيداي مەن مال ساتىپ وتىراتىن زامان ەمەس»، دەي كەلە، ۇكىمەتكە اگروونەركاسىپ سالاسىن سۋبسيديالاۋدىڭ ۇزاق مەرزىمگە ارنالعان جاڭا تاسىلدەرىن ازىرلەۋگە تاپسىرما بەرگەن ەدى.

جولداۋدا پرەزيدەنت تاپسىرعان اگرارلىق سەكتوردى سۋبسيديالاۋ، اۋىل تۇرعىندارىنىڭ تابىسىن ارتتىرۋ جانە ينۆەستيتسيالىق جوبالاردى ىسكە اسىرۋ مىندەتتەرى قالاي جۇزەگە اسىرىلىپ جاتىر؟ ءماجى­لىس دەپۋتاتى قاينار اباسوۆتىڭ توراعالىعىمەن وتكەن Amanat پارتياسى جانىنداعى اگرو­ونەر­كاسىپتىك كوميتەتتىڭ وتىرىسىندا وسى جانە وزگە دە ماسە­لەلەر تالقىلاندى.

اۋىل شارۋاشىلىعى ءمينيسترى ەربول قاراشوكەەۆتىڭ ايتۋىنشا، وسى سالاداعى سۋبسيديالاردىڭ تيىمدىلىگى مەن ناتيجەلىلىگىن ارتتىرۋ ءۇشىن ونى الۋشىلارعا بىرقاتار مىندەتتەمە ەنگىزۋ جوسپارلانىپ وتىر.

«بۇل ءوز ءوندىرىسىنىڭ ءونىمىن جىل سايىن كەمىندە 3 پايىزعا ۇلعايتۋ­دى قامتاماسىز ەتۋ (فورس-ماجور جاعدايلاردى قوسپاعاندا)، ەڭبەك ونىمدىلىگىن جىل سايىن ارتتىرۋ جانە نەگىزگى كاپيتالعا ينۆەستيتسيا قۇيۋدى قامتاماسىز ەتۋ»، دەدى مينيستر.

كوميتەت وتىرىسىندا بايانداما جاساعان ە.قاراشوكەەۆ اۋىل تۇرعىندارىنىڭ تابىسىن ارتتىرۋ باعىتىندا اتقارىلىپ جات­قان جۇمىسقا دا نازار اۋداردى. اگروونەركاسىپتىك كەشەندى 2025 جىل­عا دەيىن دامىتۋ جونىندەگى ۇلت­تىق جوبا شەڭ­بەرىندە اۋىل تۇر­عىن­دارىن نەسيە­لەندىرۋ جۇمىسى كوز­دەلىپ وتىر. وسى ماقساتتا 2023 جىلدان باستاپ جىل سايىن 7500 شاعىن نەسيە بەرۋ جوس­پارىمەن 30 ملرد تەڭگە سوماسىن­دا قارجىلاندىرۋ كولەمى قاراس­تى­رىلدى. سونداي-اق مينيستر ينۆەس­تي­­تسيالىق جوبالاردى ىسكە اسىرۋ ماسە­لەسىنە دە جەكە توقتالدى.

«مەملەكەت باسشىسى قاسىم-جومارت توقاەۆ «ادىلەتتى مەملەكەت. ءبىر­تۇتاس ۇلت. بەرەكەلى قوعام» اتتى قازاق­­­ستان حالقىنا جولداۋىندا اگرو­ونەر­­كاسىپتىك كەشەندى دامىتۋ ماسەلە­سىنە قا­تىستى بىرقاتار مىندەت قوي­عان بولا­تىن. بيىل اگروونەركاسىپ­تىك كەشەن­­دە 81،1 ملرد تەڭگە سوماسىنا 110 ين­ۆەس­تيتسيالىق جوبا پايدالانۋعا بەرىل­دى. ناتيجەسىندە، 2022 جىلدىڭ 8 ايىن­دا اوك-ءتىڭ نەگىزگى كاپيتالىنا قۇيىل­عان ينۆەستيتسيا كولەمى 524،8 ملرد تەڭ­گەنى قۇرادى. بۇل 2019 جىلدىڭ ۇقساس كەزەڭى­مەن سالىستىرعاندا 1،7 ەسە كوپ (306،3 ملرد تەڭگە). جىل سوڭىنا دەيىن 127 ينۆەستيتسيالىق جوبانى ىسكە قوسۋ جوسپارلانىپ وتىر»، دەپ اتاپ ءوتتى ول.

وتىرىس قورىتىندىسى بويىنشا كوميتەت بەيىندى مەملەكەتتىك ورگاندارعا ارنالعان بىرقاتار ناقتى ۇسىنىمدار قابىلدادى. اۋىل شارۋاشىلىعى سالاسىنا ميللياردتاعان قارجى ءبولىنىپ وتىر. ال قايتارىمى قالاي بولماق؟

سوڭعى جاڭالىقتار

دوللار تاعى قىمباتتادى

قارجى • بۇگىن، 16:13

رۋدنىي تۇرعىندارى جىلۋسىز قالدى

ايماقتار • بۇگىن، 14:50

ۇقساس جاڭالىقتار