ايماقتار • 28 قىركۇيەك، 2022

اۋدانعا سابىلمايتىن بولدى

74 رەت كورسەتىلدى

پاۆلودار وبلىسىن 2025 جىلعا دەيىن دامىتۋ باعدارلاماسى شەڭبەرىندە اۋىلداردا جاڭادان 15 باستاپقى مەديتسينالىق-سانيتارلىق كومەك پۋنكتتەرى اشىلادى دەپ جوسپارلانۋدا. ولاردىڭ تورتەۋى –امبۋلاتوريا، ونى – مەديتسينالىق جانە فەلدشەرلىك-اكۋشەرلىك پۋنكتتەر.

مەملەكەت باسشىسى قاسىم-جومارت توقاەۆ حالىققا جولداۋىندا اۋىلداعى دەنساۋلىق ساق­تاۋ ماسەلەلەرىنە ەرەكشە نازار اۋدارعانى ءمالىم. پرەزيدەنت كەلەسى جىلدان باستاپ اۋىل تۇر­عىندارىنىڭ قاجەتتىلىكتەرىنە باعىتتالعان ۇلتتىق جوبانى ىسكە اسىرۋدى باستاۋ تۋرالى شەشىم قابىلدانعانىن اتاپ ءوتتى. بۇل باعىتتا «اۋىلدىق دەنساۋلىق ساقتاۋدى جاڭعىرتۋ» جوباسى جۇزەگە اسپاق.

وڭىرلىك دەنساۋلىق ساقتاۋ باسقارماسىنىڭ باسشىسى ايدار سەيىتقازينوۆتىڭ ايتۋىنا قاراعاندا، اۋىلدىق ەلدى مەكەندەرگە 30 مەديتسينالىق نىسان قاجەت. ولاردىڭ ەكەۋى – اۋىلدىق امبۋلاتوريا، بەسەۋى – فەلدشەرلىك-اكۋشەرلىك پۋنكت جانە قالعانى – مەدپۋنكتتەر.

– جاڭا نىسانداردىڭ سالىنۋىمەن وڭىردە جالپى سانى 15 مىڭنان استام تۇرعىن ساپالى مەديتسينالىق قىزمەتپەن قامتىلادى دەپ كۇتىلۋدە. بۇل جوبالاردىڭ جالپى قۇنى شاما­مەن – 3،9 ملرد تەڭگە. بۇعان دەيىن دەنساۋ­لىق ساقتاۋ ۇيىمدارى مۇلدە بولماعان 3 اۋىل­دا جاڭادان مەدپۋنكت تۇرعىزىلماق. تاعى 9 نىسان توزىپ تۇرعان عيماراتتاردى جاڭار­تۋعا جانە 18 قۇرىلىس جالعا الىنىپ كەلگەن نىسان­دار­دىڭ ورنىنا سالىنباق. جوبالىق-سمەتالىق قۇ­جات­تامالاردى دەنساۋلىق ساقتاۋ مينيسترلىگى ازىرلەۋدە، رەسپۋبليكالىق ترانس­فەرتتەر بولىنەدى دەپ بولجانۋدا. ال پاۆ­لودار وبلىسىن دامىتۋ باعدارلاماسى اياسىن­­دا جوس­پارلانعان 15 نىساننىڭ بىرەۋى – اقسۋ­دىڭ قىزىل­جار اۋىلىندا 100 ورىنعا لايىق­تالعان اۋىل­دىق امبۋلاتوريا سالىندى. قۇرى­لىس باسقار­ماسى تاعى ءۇش جوباعا قۇجات ازىرلەپ وتىر. كەلەسى جىلى ەكىباستۇزدىڭ اۋىل­دىق ايما­عىن­داعى الكەي مارعۇلان اۋىلىن­دا جانە اقسۋدىڭ پوگرانيچنيك اۋىلى مەن پاۆلودار اۋدانىنىڭ نابەرەجنوە ەلدى مەكەنىن­دە مەديتسينالىق مەكەمەلەر سالىنادى، – دەدى باسقارما جەتەكشىسى.

الىس اۋىلداردا تۇراتىن حالىققا جىلجىمالى مەدي­تسي­نالىق كەشەندەر قىزمەت كورسەتەدى. يگىلىكتىڭ بۇل تۇرى­مەن 29 مىڭعا جۋىق ادام قامتىلىپ وتىر. كەشەن­دەردەگى دارىگەرلەر قازىر­دىڭ وزىندە 2 مىڭنان استام ەم­دەلۋشىدەن ءتۇرلى اۋرۋدى انىقتاپ، ولاردى ديسپانسەرلىك ەسەپكە قويعان. بۇعان قوسا اۋداندىق اۋرۋحانالار مەن پەر­زەنتحانالارعا جانە جان ساقتاۋ بولىمشەلەرىنە زا­مانعا ساي مەديتسينالىق قۇ­رال-جابدىقتار سا­تىپ الۋعا رەسپۋبليكالىق قازىنادان 1،5 ملرد تەڭ­گە بولىنبەك. تاعى 1،2 ملرد تەڭگە دەنساۋلىق ساقتاۋ مەكەمەلەرىن كۇردەلى جوندەۋ­گە باعىتتالادى. وبلىستىق دەنساۋلىق ساقتاۋ باسقارما­سى قاجەتتى جابدىقتاردى ساتىپ الۋدىڭ جوسپارىن جاساپ، مەديتسينالىق نىسانداردى جوندەۋمەن اينالىساتىن مەردىگەرلەردى انىقتادى. جاڭا قۇرالدار الىنسا، وڭىرلەردەگى ەمدەۋ ۇيىمدارىنىڭ زامانعا ساي جاراقتالۋى 85-تەن 90 پايىزعا دەيىن ارتادى.

بۇعان قوسا دەمەۋشىلەر ەسەبىنەن الداعى قازان ايىندا 60 اكۋشەر-گينەكولوگ پەن نەوناتولوگتى وقى­تۋ جوسپارلانىپ وتىر. بۇل ءۇشىن رەسەيدەن ماماندار كەلىپ، جۇكتى انالاردىڭ جاع­دايىنا شۇعىل تۇردە باعا بەرۋ بويىنشا سەمينارلار وتكىز­بەك. ال 18 مەديتسينا قىز­مەتكەرى تاتارستاننىڭ قازان قالاسىنا جىبەرىلىپ، وندا ۋلترادىبىستىق زەرتتەۋ بويىنشا وقۋدان وتپەك. وڭىر­دەگى اق جەلەڭدىلەرگە قۇر­ساقتا جاتقان بالانىڭ ال­عاش­قى دامۋ كەزەڭىندە دەن­ساۋ­­لىعىنداعى اقاۋلاردى انىق­تاۋ مىندەتى قويىلىپ وتىر.

اتاپ وتەرلىگى، بيىل ەكستراكورپورالدى ۇرىق­­تان­دىرۋ بويىنشا وڭىرگە 281 كۆوتا بو­لىنگەن. قازىر 82 جۇپ ءسابي ءسۇيۋ باقىتىن اسىعا كۇتۋ­­دە. تاعى 80 ەرلى-زايىپتىدان وڭ ناتيجە شى­عا­دى دەپ بولجانىپ وتىر. بىلتىر بالا كوتەرە الماۋ ماسەلەسى بويىنشا پاۆلودارداعى رەپ­رو­دۋكتيۆتى ورتالىقتا 1،5 مىڭ ەرلى-زايىپتى تىر­كەلگەن ەدى. «اڭساعان ءسابي» باعدارلاماسى ارقى­لى جۇزدەن استام وتباسى نارەستەلى بولدى. ولار­دىڭ اراسىندا ەگىز بالالى بولعاندار دا بار.

 

پاۆلودار وبلىسى

سوڭعى جاڭالىقتار

دوللار باعامى تومەندەدى

قارجى • بۇگىن، 16:10

ۇقساس جاڭالىقتار