بولگاريا, سولتۇستىك ماكەدونيا جانە گيبرالتار سەكىلدى مىقتى قۇرامالارمەن ءبىر توپتا سىنعا تۇسكەن گرۋزيا التى تۋردا 16 ۇپاي جيناپ, تۋرنير كەستەسىندە جەكە-دارا كوش باستادى. ەكىنشى ورىنعا 9 ۇپايى بار بولگاريا قۇراماسى يە بولسا, سولتۇستىك ماكەدونيا ءۇشىنشى ورىنمەن
(7 ۇپاي) ليگاداعى ورنىن ساقتاپ قالدى. ال ءبىر ۇپايمەن كوش سوڭىندا قالىپ قويعان گيبرالتار «س» ديۆيزيوندا قالۋ ءۇشىن ەلەكتىك ماتچ وتكىزەدى. گرۋزيا فۋتبولشىلارى التى تۋردىڭ بەسەۋىندە قارسىلاستارىنان باسىم تۇسسە, تەك ءبىر كەزدەسۋىندە عانا ۇپاي ءبولىستى.
قازاقستان مەن گرۋزيا بۇگىنگە دەيىن جاسىل الاڭدا ءتورت مارتە رەسمي ماتچ وتكىزگەن. وكىنىشكە قاراي, سونىڭ ۇشەۋىندە جەرلەستەرىمىز جەڭىلىستىڭ كەرمەك ءدامىن تاتۋعا ءماجبۇر بولدى. ءبىر كەزدەسۋدە قارسىلاستارىمىزبەن تەڭ تۇستىك. ەڭ العاش ەكى ەلدىڭ فۋتبولشىلارى 2005 جىلى الەم چەمپيوناتىنىڭ ىرىكتەۋ كەزەڭىندە كەزدەستى. الماتىدا وتكەن العاشقى ماتچتا قوناقتار 1:2 ەسەبىمەن جەڭىسكە جەتتى. كەزدەسۋدىڭ ەسەبىن 23-مينۋتتا دانيار كەنجەحانوۆ اشقانىمەن, ەكىنشى تايمدا گرۋزيالىق فۋتبولشىلار ەكى گول سوعىپ, تارازى باسىن وزدەرىنە اۋداردى. ال گرۋزيادا وتكەن قارىمتا ماتچتا ەسەپ اشىلعان جوق – 0:0.
كەيىننەن ەكى قۇرامانىڭ جولى 2018 جىلعى ۇلتتار ليگاسىنىڭ العاشقى ماۋسىمىندا قايتا ءتۇيىستى. استاناداعى العاشقى ماتچتا جەرلەستەرىمىز قوناقتارعا 0:2 ەسەبىمەن جول بەردى. 69-مينۋتتا گيورگي چاكۆەتادزە ەسەپ اشسا, ارادا بەس مينۋت وتكەندە سەرگەي مالىي بايقاۋسىزدا ءوز قاقپامىزعا گول سوعىپ الدى. سىرت الاڭداعى جاۋاپتى ماتچتا دا گرۋزيا فۋتبولشىلارىنىڭ مەرەيى ۇستەم بولدى – 2:1. گيورگي چاكۆەتادزە مەن گەورگي مەرەباشۆيليدىڭ گولدارىنا 90-مينۋتتا ورالحان ومىرتاەۆ ءبىر گولمەن جاۋاپ قايتاردى.
بۇدان بولەك, قۇرامالار ەكى مارتە جولداستىق ماتچ وتكىزدى. 2013 جىلعى كەزدەسۋدە قازاقستان 1:0 ەسەبىمەن جەڭىسكە جەتسە, 2016 جىلعى باسەكەدە تەڭ ەسەپ تىركەلدى – 1:1.
ەندى, مىنە, ەكى ەل اراسىنداعى جەتىنشى كەزدەسۋ 2024 جىلدىڭ ناۋرىزىندا تبيليسيدە وتەدى. «س» ديۆيزيونىنىڭ ءبىرىنشى پلەي-وفف ماتچىندا قازاقستان مەن گرۋزيا, ەكىنشىسىندە تۇركيا مەن گرەكيا قۇرامالارى سىنعا تۇسەدى. ءسويتىپ ۇزدىك شىققان ەكى قۇراما فينالدا كەزدەسىپ, جالعىز جولدامانى ساراپقا سالادى. ەگەر, قازاقستان ۇلتتىق قۇراماسى وسى ەكى ماتچتا دا قارسىلاستارىنان باسىم تۇسەتىن بولسا, وندا 2024 جىلى گەرمانيادا وتەتىن كارى قۇرلىق بىرىنشىلىگىنە تىكەلەي جولداما الادى.
جالپى, ۋەفا ەرەجەسى بويىنشا, ۇلتتار ليگاسىنان ءۇش قۇراما ەۋروپا چەمپيوناتىنا جولداما الا الادى. بۇعان دەيىن ەۋرو-2020-دا 4 كومانداعا مۇمكىندىك بەرگەن. وسى جولى ءۇش كۆوتا ءبولىپ وتىر. ياعني ا, ۆ, س ديۆيزيوندارىنىڭ ۇزدىكتەرى گەرمانيا جاسىل الاڭدارىندا دوپ تەبەدى. بيىلعى تۋرنيردە «ا» ليگاسىندا حورۆاتيا, يسپانيا, يتاليا جانە نيدەرلاند قۇرامالارى ۇزدىك شىقسا, «ۆ» ليگاسىندا شوتلانديا, يزرايل, بوسنيا جانە گەرتسەگوۆينا مەن سەربيا قۇرامالارى ءبىرىنشى ورىندى يەلەندى.
سونداي-اق 9 قازاندا گەرمانيانىڭ فرانكفۋرت قالاسىندا ەۋروپا بىرىنشىلىگى ىرىكتەۋ كەزەڭىنىڭ جەرەبەسى تارتىلادى. كەلەسى جىلدىڭ ناۋرىز جانە قاراشا ارالىعىندا وتەتىن ىرىكتەۋ سايىستارىندا جەڭىمپاز اتانعان قۇراما مەن ەكىنشى ورىنعا يە بولعاندار ەۋروپا چەمپيوناتىنا تىكەلەي جولداما الادى. ولارعا ۇلتتار ليگاسى ارقىلى جولداماعا قول جەتكىزگەن ءۇش قۇراما قوسىلادى. ەگەر ۇلتتار ليگاسىنىڭ پلەي-وفف كەزەڭىنە شىققان قۇرامالار ىرىكتەۋ كەزەڭدەرىندە جولداماعا يەلىك ەتسە, وندا ول توپتا رەيتينگتە كەلەسى تۇرعان كوماندا پلەي-وففقا قاتىسادى.
