قوعام • 28 قىركۇيەك، 2022

مەملەكەتتىك ءتىلدى مەڭگەرۋ دەڭگەيىن انىقتاۋ بويىنشا كوميسسيا قۇرىلدى - وسك

55 رەت كورسەتىلدى

قازاقستان رەسپۋبليكاسى ورتالىق سايلاۋ كوميسسياسى 20 قاراشادا وتەتىن كەزەكتەن تىس پرەزيدەنت سايلاۋىنا كانديداتتاردىڭ مەملەكەتتىك ءتىلدى ەركىن مەڭگەرۋىن انىقتاۋ جونىندەگى كوميسسيا قۇرۋ تۋرالى قاۋلى قابىلدادى، دەپ حابارلايدى Egemen.kz.

«قازاقستان رەسپۋبليكاسى پرەزيدەنتتىگىنە كانديداتتىڭ مەملەكەتتىك ءتىلدى جەتىك ءبىلۋى قازاقستان رەسپۋبليكاسى كونستيتۋتسياسىنىڭ 41-بابىنا سايكەس لينگۆيستيكالىق كوميسسيانىڭ شەشىمىمەن ايقىندالادى. وسى ماسەلە بويىنشا وسك-نىڭ قۇزىرەتى «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 54-بابىنىڭ 2-تارماعىندا كورسەتىلگەن. اتاپ ايتقاندا، وسى باپقا سايكەس، كونستيتۋتتسيانىڭ 41-بابىنىڭ 2-تارماعىن رەسمي ءتۇسىندىرۋ تۋرالى كونستيتۋتسيالىق كەڭەستىڭ شەشىمى بويىنشا مەملەكەتتىك ءتىلدى بىلۋدەگى كانديداتتىڭ بىلىكتىلىگىن انىقتاۋ ورتالىق سايلاۋ كوميسسياسىنىڭ شەشىمىمەن ايقىندالادى. قر كونستيتۋتسياسىنىڭ 41-بابى 2-تارماعىن رەسمي ءتۇسىندىرۋ تۋرالى كونستيتۋتسيالىق كەڭەستىڭ 1998 جىلعى 9 قازانداعى №280 قاۋلىسىنا سايكەس، قر كونستيتۋتسياسىنىڭ 41-بابى 2-تارماعى نورماسىنىڭ مەملەكەتتىك ءتىلدى ەركىن مەڭگەرگەن دەگەن بولىگىندە «قازاق تىلىندە ساۋاتتى تۇردە وقيدى، جازادى، ءوز ويىن قينالماي وڭاي جەتكىزەدى جانە كوپشىلىك الدىندا سويلەي الادى»، دەپ ءتۇسىندىردى قازاقستان رەسپۋبليكاسى ورتالىق سايلاۋ كوميسسياسىنىڭ حاتشىسى مۇحتار ەرمان وسك وتىرىسىندا.

بايانداماشى سونداي-اق قازاقستان رەسپۋبليكاسى پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرۋىن انىقتاۋ وسك قاۋلىسىنا سايكەس قۇرامىندا كەمىندە 5 ادامنان تۇراتىن ماماندار بار لينگۆيستيكالىق كوميسسيانىڭ قورىتىندىسىمەن ايقىندالاتىنىن اتاپ ءوتتى.

«قازاقستان رەسپۋبليكاسى پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرۋىن بەلگىلەۋ ءتارتىبى تۋرالى وسك-نىڭ 2005 جىلعى 31 تامىزداعى No 12/26 ارنايى قاۋلىسى بار. مەملەكەتتىك ءتىلدى ەركىن مەڭگەرگەندىگىن انىقتاۋ ءۇشىن قازاقستان رەسپۋبليكاسىنىڭ پرەزيدەنتتىگىنە كانديدات لينگۆيستيكالىق كوميسسيا ۇسىنعان تاقىرىپ بويىنشا كولەمى 2 بەتتەن اسپايتىن جازباشا تاپسىرما ورىندايدى. ەكىنشى تاپسىرما بويىنشا،  لينگۆيستيكالىق كوميسسيا ۇسىنعان 3 بەتتەن اسپايتىن ءماتىندى وقيدى. ۇشىنشىدەن لينگۆيستيكالىق كوميسسيا ۇسىنعان تاقىرىپ بويىنشا 15 مينۋتتان كەم ەمەس ۋاقىت ىشىندە كوپشىلىك الدىندا ءسوز سويلەيدى»، دەپ قوستى مۇحتار ەرمان.

سوڭعى جاڭالىقتار

دوللار باعامى تومەندەدى

قارجى • بۇگىن، 16:10

ۇقساس جاڭالىقتار