قوعام • 28 قىركۇيەك، 2022

ۇقك كارىم ءماسىموۆتىڭ ءىسىن ءالى تەكسەرىپ جاتىر

3209 رەت كورسەتىلدى

باس پروكۋروردىڭ ورىنباسارى اسەت شىنداليەۆ ءماجىلىس كۋلۋارىندا ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ماسىموۆكە قاتىستى ءىس بويىنشا تۇسىنىكتەمە بەردى، دەپ حابارلايدى Egemen.kz.

اسەت شىنداليەۆ بۇل ءىستى ۇقك تەكسەرىپ جاتقانىن ەسكە سالدى.

«بۇل ىسكە قۇپيالىلىق بەلگىسى بەرىلگەن، ياعني وعان قاتىستى ماتەريالدار باق-قا تاراتىلمايدى جانە جاريالانبايدى»، دەدى ول.

باس پروكۋروردىڭ ورىنباسارى بۇل ءىس بويىنشا كۇدىكتىلەردىڭ بارلىعى قاماۋدا ەكەنىن اتاپ ءوتتى.

«ەشكىم ەشقايدا كەتىپ، جاسىرىنعان جوق. ءىس اياقتالدى، ءىس ماتەريالدارىمەن تانىسۋ باستالدى. ءبىز ىسپەن تانىسۋ ءۇشىن ءىس جۇرگىزۋ شەكتەۋلەرىن قويعان جوقپىز»، دەپ قوستى اسەت شىناليەۆ.

ەسكە سالا كەتسەك، 6 قاڭتاردا قازاقستان پرەزيدەنتى قاسىم-جومارت توقاەۆ كادرلىق اۋىس-تۇيىستەر جۇرگىزىپ، كارىم ءماسىموۆتى ۇلتتىق قاۋىپسىزدىك كوميتەتىنىڭ توراعاسى قىزمەتىنەن بوساتتى. ول بۇل قىزمەتتى 2016 جىلدان بەرى اتقارىپ كەلگەن.

سول كۇنى ۇقك مەملەكەتتىك وپاسىزدىق فاكتىسى بويىنشا سوتقا دەيىنگى تەرگەۋ باستالعانىن حابارلادى. اتالعان قىلمىستى جاسادى دەگەن كۇدىكپەن ۇقك-ءنىڭ بۇرىنعى توراعاسى كارىم ءماسىموۆ پەن باسقا دا ادامدار ۇستالىپ، ۋۇي-عا قامالدى.

13 قاڭتاردا ۇقك كارىم ماسىموۆتەن باسقا، ۇقك توراعاسىنىڭ ەكس-ورىنباسارى - «ا» ارنايى ماقساتتاعى قىزمەتىنىڭ باستىعى ءانۋار سادىقۇلوۆ پەن ۇقك توراعاسىنىڭ ورىنباسارى داۋلەت ەرعوجيننىڭ ۇستالعانىن ناقتىلادى.

14 ناۋرىزدا قر باس پروكۋرورى بەرىك اسىلوۆ كارىم ءماسىموۆ 17 جىلعا باس بوستاندىعىنان ايىرىلۋى مۇمكىن ەكەنىن حابارلادى.

22 ساۋىردە سىبايلاس جەمقورلىققا قارسى قىزمەت قر قك-ءنىڭ 366-بابى 4-بولىگى بويىنشا پاۆلودار وبلىسى پوليتسيا دەپارتامەنتىنىڭ ەكس-باستىعى نۇرلان ماسىموۆكە قاتىستى سوتقا دەيىنگى تەرگەۋدى باستاعانى بەلگىلى بولدى، وعان اسا ءىرى مولشەردە پارا الدى دەگەن ايىپ تاعىلدى. وسىلايشا،  نۇرلان ماسىموۆكە ىزدەۋ جاريالاندى. انتيكور ونىڭ ورنالاسقان جەرى تۋرالى اقپارات ءۇشىن 12 ملن تەڭگە كولەمىندە سىياقى بەرىلەتىنىن حابارلادى.

25 تامىزدا ۇلتتىق قاۋىپسىزدىك كوميتەتى كارىم ءماسىموۆ، ءانۋار سادىقۇلوۆ، داۋلەت ەرعوجين، مارات وسيپوۆ جانە لاۋازىمدى تۇلعالار د.م.اكيپوۆ پەن ن.ك.بەكمۇراتقا قاتىستى قىلمىستىق ءىستى تەرگەۋدى اياقتاعانى بەلگىلى بولدى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار