وسى ورايدا زاڭگەرلەر قاۋىمداستىعى «ادال سايلاۋ ءۇشىن» شتابىن قۇرىپ, سايلاۋ ناۋقانى كەزىندە كونستيتۋتسيالىق رەفورما, پرەزيدەنت سايلاۋىنىڭ ەرەجەلەرىن زاڭ تۇرعىسىنان ءتۇسىندىرىپ, حالىققا قۇقىقتىق قولداۋ كورسەتۋدى ماقسات ەتىپ وتىر.
«پرەزيدەنت سايلاۋى تۋرالى كونستيتۋتسيالىق زاڭدار بويىنشا ازاماتتارىمىزدىڭ سۇراقتارىنا جاۋاپ بەرۋگە دايىنبىز. ولار ءبىزدىڭ قازاقستان زاڭگەرلەر وداعىنىڭ سايتى ارقىلى سۇراقتارىن جولداي الادى. بارلىق ساۋال جاۋاپسىز قالمايدى, ۋاقىتپەن ساناسپاي جۇمىس ىستەيمىز. سونىمەن قاتار زاڭگەرلەر وداعى بارلىق زاڭگەردى, ءتىپتى وداق قۇرامىنا كىرمەيتىندەردى دە وسى جۇمىسقا بەلسەنە ارالاسۋعا, ياعني پرەزيدەنت سايلاۋى تۋرالى زاڭدى حالىققا بارىنشا كەڭ اۋقىمدا تۇسىندىرۋگە شاقىرادى. بۇل – ءبىزدىڭ باستى مىندەتىمىز», دەدى «قازاقستان زاڭگەرلەر وداعى» رقب توراعاسى, زاڭ عىلىمدارىنىڭ كانديداتى, پروفەسسور سەرىك اقىلباي.
ارنايى شتابتىڭ قۇرامىندا ازىرگە 7 ادام بار, شتاب توراعاسى بولىپ س.اقىلباي سايلانعان. سونداي-اق بارلىق وبلىس ورتالىقتارىندا شتاب وكىلدىكتەرى قۇرىلادى. «ادال سايلاۋ ءۇشىن» شتابى – مەملەكەت مەنشىگىندە تىركەلمەگەن قوعامدىق ۇيىم. ء«بىز حالىق سايلاۋعا قاتىستى قۇقىعىن بىلسە دەيمىز. سايلاۋدىڭ جالپى زاڭعا ساي ءوتۋ جولدارىن, تالاپتارىن قاراپايىم تىلمەن جەتكىزەمىز, تۇسىندىرەمىز», دەپ قوستى شتاب توراعاسى.
«ادال سايلاۋ ءۇشىن» شتابىنىڭ وكىلدەرى بايقاۋشىلار, سايلاۋ كوميسسياسىنىڭ مۇشەلەرى جانە قۇقىق قورعاۋ ورگاندارىنىڭ وكىلدەرىنە سايلاۋ وتكىزۋ راسىمدەرى تۋرالى ادىستەمەلىك نۇسقاۋلىقتار دايىندايدى. بۇعان قوسا سايلاۋ قورىتىندىلارى بويىنشا بايقاۋشىلارعا قۇقىقتىق كومەك كورسەتۋدى قوسا العاندا, ولاردىڭ شتابىنا زاڭدى قولداۋ كورسەتەمىز», دەدى زاڭ عىلىمدارىنىڭ دوكتورى, پروفەسسور, وداق مۇشەسى ينديرا اۋباكىروۆا.
