وسپان باتىر يسلام ۇلىنىڭ ەل مەن جەر ءۇشىن جاساعان جانقيارلىعى, قان كەشىپ ۇرىس سالعان ۇلت قاھارمانىنىڭ ساياسي ارەكەتى, سونداي-اق نۇرعوجاي باتىردىڭ ەرلىكتەرى مەن مۇراسى كونفەرەنتسيانىڭ باستى تاقىرىبى بولدى.
كونفەرەنتسيا بارىسىندا ىستانبۇل قالاسىنان ارنايى كەلگەن نۇرعوجاي باتىردىڭ نەمەرەسى ءباحادۇر حادجيحان مەن ميمار سينان كوركەم ونەر ۋنيۆەرسيتەتىنىڭ پروفەسسورى ابدىۋاقاپ قارا وسپان باتىر تۋرالى نۇرعوجاي باتىردىڭ تۇپنۇسقا قولجازباسىن ارحيۆ قورىنا سىيعا تارتتى. ايتا كەتەيىك, قولجازبا نۇرعوجاي باتىردىڭ ءوز قولىمەن توتە جازۋمەن جازىلعان ءارى بۇل بۇرىن-سوڭدى ەش جەردە جاريالانباعان.
ورتالىق مەملەكەتتىك عىلىمي-تەحنيكالىق قۇجاتتاما ءارحيۆىنىڭ ديرەكتورى بايان جۇماتاەۆانىڭ ايتۋىنشا, قازاقتىڭ حح عاسىرعا تاڭباسىن باسقان سوڭعى باتىرى, شىعىس تۇركىستاندا حالقىنىڭ ەگەمەندىگى مەن ازاتتىعى جولىندا كۇرەسكەن وسپان باتىر يسلام ۇلىنىڭ قازاق تاريحىندا الار ورنى وتە زور. «امەريكالىق تاريحشى ليندا بەنسون «قازاقتىڭ التىن اڭىزى» دەپ اتاعان وسپان باتىر بۇكىل التاي جەرىن جانە شىعىس تۇركىستانداعى قازاقتاردى ەزىپ جانشىپ تۇرعان قىتاي گۋبەرناتورى شىڭ شى سايدان ازات ەتۋگە كۇش سالعان.
وسى تۇستا ايتا كەتەيىك, كۇرەسكەر تۇلعانىڭ ءومىر جولىن جاڭا, تىڭ قىرلارىنان تانىتاتىن وسپان باتىردىڭ العاشقى سەگىز كوميسسارىنىڭ ءبىرى نۇرعوجاي باتىردىڭ ەستەلىكتەرى ۇلكەن تاريحي ماڭىزعا يە. ويتكەنى ول وسپان باتىردىڭ جانىندا بولعان. سوندىقتان وسى ەكى الىپ تۇلعانى بىرگە ناسيحاتتاۋ بولاشاق ۇرپاقتى رۋحاني تۇرعىدان باي, ەلجاندى ەتىپ قالىپتاستىرۋعا ىقپال ەتەرى ءسوزسىز», دەيدى ب.جۇماتاەۆا.
