وتىرىستا ەڭ اۋەلى پرەزيدەنت سايلاۋىندا مۇمكىندىگى شەكتەۋلى ازاماتتاردىڭ داۋىس بەرۋىن قامتاماسىز ەتۋ ماسەلەلەرى ايتىلدى. ورتالىق سايلاۋ كوميسسياسىنىڭ مۇشەسى اناستاسيا ششەگورتسوۆا «سايلاۋ تۋرالى» كونستيتۋتسيالىق زاڭدا مۇگەدەك ازاماتتاردىڭ سايلاۋ قۇقىقتارىن قامتاماسىز ەتۋ جونىندە بىرقاتار نورما بار ەكەنىن ەسكە سالدى.
– ورتالىق سايلاۋ كوميسسياسىنىڭ 2018 جىلعى قاۋلىسى مۇگەدەك جانداردىڭ سايلاۋ قۇقىقتارىن ىسكە اسىرۋ جونىندەگى ۇسىنىمدارىن بەكىتتى. 2021 جىلدان باستاپ كوميسسيا وتىرىستارىنىڭ ترانسلياتسياسى مەن اقپاراتتىق بەينەماتەريالدارى سۋردواۋدارمامەن قامتاماسىز ەتىلەدى. ورتالىق سايلاۋ كوميسسياسىنىڭ سايتىندا «مۇمكىندىكتەرى شەكتەۋلى ازاماتتاردىڭ سايلاۋ قۇقىقتارى» ءبولىمى جۇمىس ىستەيدى.
2017 جىلدان باستاپ بۇۇ-نىڭ مۇگەدەكتەردىڭ قۇقىقتارى تۋرالى كونۆەنتسياسىن ىسكە اسىرۋ ماقساتىندا ورتسايلاۋكوم جانىندا مۇگەدەكتەردىڭ سايلاۋ قۇقىقتارىن قامتاماسىز ەتۋ جونىندەگى جۇمىس توبى جۇمىسىن جالعاستىرۋدا. جۇمىس توبىنىڭ 19 مۇشەسىنىڭ 17-ءسى – مۇگەدەك جانداردىڭ قوعامدىق بىرلەستىكتەرىنىڭ وكىلى, – دەدى اناستاسيا ششەگورتسوۆا.
جيىندا سايلاۋ ناۋقانى كەزىندە مۇگەدەك ازاماتتاردىڭ سايلاۋ قۇقىقتارىن قامتاماسىز ەتۋ بويىنشا بىرقاتار تاپسىرما بەرىلدى. ماسەلەن, جەرگىلىكتى اتقارۋشى ورگاندارعا: مۇگەدەك جاندارعا داۋىس بەرۋگە ارنالعان ۋچاسكەلەردىڭ قولجەتىمدىلىگىن تەكسەرۋدى; داۋىس بەرۋ كەزىندە ەرەكشە جاعدايلاردى قاجەت ەتەتىن مۇگەدەك جانداردىڭ سانى تۋرالى مالىمەتتەر دايىنداۋ جانە ازاماتتاردى تىركەۋ ورنى بويىنشا داۋىس بەرۋدىڭ ناقتى ۋچاسكەسىندە ولار ءۇشىن ءتيىستى جاعدايلاردى قامتاماسىز ەتۋ ماسەلەلەرىن قوسىمشا پىسىقتاۋ; داۋىس بەرۋ ۋچاسكەلەرىندە ورتسايلاۋكومنىڭ قاۋلىسىمەن بەكىتىلگەن سايلاۋ ۋچاسكەسىندە داۋىس بەرۋگە ارنالعان ءۇي-جايدى, داۋىس بەرۋگە ارنالعان پۋنكتى جاراقتاندىرۋ جونىندەگى نۇسقاۋلىققا سايكەس مۇگەدەك جاندارعا ارنالعان بۇرىشتاردى جاراقتاندىرۋدى قامتاماسىز ەتۋ, تۇتقالاردىڭ, پاندۋستاردىڭ, سونداي-اق باسقا دا قاجەتتى قۇرىلعىلاردىڭ بولۋىن قاراستىرۋ; مۇگەدەك جاندارعا داۋىس بەرۋگە ارنالعان ءۇي-جايلاردى بارىنشا قولجەتىمدىلىكپەن قامتاماسىز ەتۋ ماسەلەلەرىن نازارعا الۋ كەرەكتىگى ايتىلدى.
ال داۋىس بەرۋگە ارنالعان ورىنداردا ءارتۇرلى تاكتيلدى كورسەتكىشتەر (مۇمكىندىگىنشە) بولۋعا ءتيىس. تىرەك-قيمىل اپپاراتىنىڭ فۋنكتسيالارى بۇزىلعان, ونىڭ ىشىندە كرەسلو-اربالاردى پايدالاناتىن سايلاۋشىلاردىڭ قولجەتىمدىلىگىن ەسكەرە وتىرىپ, جاسىرىن داۋىس بەرۋگە ارنالعان كابينا, مۇگەدەك جاندارعا ارنالعان ارنايى جابدىقتالعان ورىن, مونيتورى بار كومپيۋتەر بولۋعا ءتيىس. قۇلاققاپتار, قوسىمشا جارىقتاندىرۋ, لۋپالار دا قاراستىرىلماق.
جيىندا كوميسسيا مۇشەسى اسىلبەك سماعۇلوۆ قول قويۋ پاراقتارىن دايىنداۋ, بەرۋ مەرزىمدەرى, سونداي-اق سايلاۋشىلاردىڭ قولدارىن جالعان دەپ تانۋ تۋرالى باياندادى.
– «سايلاۋ تۋرالى» زاڭعا سايكەس پرەزيدەنتتىككە كانديداتتى قولداپ قول جيناۋدى سەنىم بىلدىرىلگەن ادامدار ۇيىمداستىرادى. ال كانديداتتىڭ كونستيتۋتسيا جانە «سايلاۋ تۋرالى» زاڭدا بەلگىلەنگەن تالاپتارعا سايكەستىگىن تەكسەرۋدەن كەيىن بەس كۇن مەرزىمنەن كەشىكتىرمەي كوميسسيا بەرەتىن قول قويۋ پاراقتارىمەن رەسىمدەلەدى. پرەزيدەنتتiككە كانديداتتى وبلىستار, رەسپۋبليكالىق ماڭىزى بار قالالار جانە رەسپۋبليكا استاناسىنىڭ كەم دەگەندە ۇشتەن ەكiسiنiڭ اتىنان تەڭدەي وكiلدiك ەتەتiن سايلاۋشىلاردىڭ جالپى سانىنىڭ كەم دەگەندە بiر پايىزى قولداۋعا تيiس. ەلىمىزدەگى سايلاۋشى ازاماتتارىنىڭ بىرىڭعاي ەلەكتروندىق تىزىلىمىنە سايكەس 2022 جىلعى 1 شىلدەدەگى جاعداي بويىنشا رەسپۋبليكا سايلاۋشىلارىنىڭ جالپى سانى 11 ملن 827 مىڭ 277 ادامدى قۇرايدى. وسىلايشا, پرەزيدەنتتىككە ۇمىتكەردى كەمىندە 118 مىڭ 273 سايلاۋشى قولداۋى كەرەك, – دەدى ا.سماعۇلوۆ.
«سايلاۋ تۋرالى» زاڭ جانە وسك قاۋلىسىنا سايكەس, قول قويۋ پاراعىنىڭ ۇلگىسى بەكىتىلگەن. ءاربىر قول قويۋ پاراعىنىڭ رەتتىك ءنومىرى بولادى جانە سايلاۋشىلاردىڭ قولدارىن جيناۋعا ارنالعان 20 جولدان تۇرادى. پرەزيدەنتتىككە كانديداتتى قولداۋعا قول جيناۋ جونىندەگى تولتىرىلعان قول قويۋ پاراقتارى اۋماقتىق سايلاۋ كوميسسياسىنا تاپسىرىلادى, ول 10 كۇن مەرزىمدە پاسپورت قىزمەتتى قىزمەتكەرلەرىن تارتا وتىرىپ, قويىلعان قولداردىڭ دۇرىستىعىن تەكسەرۋدى جۇزەگە اسىرادى, پرەزيدەنتتىككە كانديداتتى قولداپ قويىلعان قولداردىڭ راستىعىن تەكسەرۋ ناتيجەلەرى تۋرالى ءتيىستى حاتتامانى رەسىمدەيدى جانە ونى ورتالىق سايلاۋ كوميسسياسىنا جولدايدى.
سايلاۋشىلاردىڭ قويعان قولدارى سايلاۋشىنىڭ دەرەكتەرى تولىق بولماسا, قارىنداشپەن قويىلسا, تۇزەتىلسە, سايلاۋشى اتىنان باسقا ادام قويسا جالعان بولىپ تانىلادى.
