كوميتەت توراعاسى ۆلاديمير ۆولكوۆ ءوزىنىڭ كىرىسپە سوزىندە سەنات جانىنان قۇرىلعان جۇمىس توبى جوعارعى سوت ۇسىنعان سوت جۇيەسىن رەفورمالاۋ جونىندەگى 10 قادامدى جان-جاقتى تالقىلاۋ بويىنشا اۋقىمدى جۇمىس جۇرگىزگەنىن اتاپ ءوتتى.
«رەفورمالاردىڭ نەگىزگى ءمانى ازاماتتاردىڭ سوتقا دەگەن سەنىمىن ارتتىرۋ بولدى جانە سولاي بولىپ قالا بەرەدى. دەپۋتاتتار سوڭعى 4 جىلدا سوت جۇيەسىن جاڭعىرتۋعا وراي 30-دان استام زاڭ قابىلدادى. ەنگىزىلگەن تۇزەتۋلەردىڭ ارقاسىندا وسى جىلدىڭ باسىنان باستاپ باسقا سالالاردان, ونىڭ ىشىندە كورپوراتيۆتىك سەكتوردان كەلگەن 50-گە جۋىق زاڭگەر-پراكتيك سۋديا بولدى», دەدى ۆلاديمير ۆولكوۆ.
قاتىسۋشىلار شارا بارىسىندا سوت جۇيەسىن رەفورمالاۋ ماسەلەلەرىن تالقىلادى. سەناتورلاردىڭ ايتۋىنشا, وزگەرىستەر سوت پروتسەسىندەگى تاراپتاردىڭ تارتىسىن جاقسارتۋعا, سۋديالاردىڭ تەڭ مارتەبەسىن قامتاماسىز ەتۋگە, سول ارقىلى ولاردىڭ سوت توراعالارىنا تاۋەلدىلىگىن تومەندەتۋگە, سونداي-اق سۋديالاردىڭ وزدەرى سوت توراعالارى مەن سوت القالارى توراعالارىن سايلاۋ سيپاتىن ەنگىزۋگە مۇمكىندىك بەرەدى.
سەناتور قاناتبەك سافينوۆ دوڭگەلەك ۇستەل جۇمىسىن جۇرگىزە وتىرىپ, سەناتتا جۇمىس توپتارىنىڭ 14 وتىرىسى وتكەنىن, وندا ۇسىنىلعان سوت رەفورماسىنىڭ ەرەكشەلىكتەرى ەگجەي-تەگجەيلى قارالعانىن اتاپ ءوتتى.
«مەملەكەتتىك ورگانداردىڭ ۇستانىمدارى دا پىسىقتالىپ, زاڭگەرلەر قاۋىمداستىعىنان, قۇقىقتانۋشىلار مەن قوعامدىق ۇيىمداردان ۇسىنىستار الىندى. ءبىز رەفورمانىڭ جۇمىس توپتارىندا تالقىلانباعان باسقا دا قادامدارىن دا تالقىلاۋ قاجەتتىگىن ايتتىق», دەدى سەناتور سافينوۆ.
وتىرىس بارىسىندا جوعارعى سوتتىڭ اكىمشىلىك ىستەر جونىندەگى سوت القاسىنىڭ توراعاسى اسلان تۇكيەۆ, كازگيۋ ۋنيۆەرسيتەتىنىڭ باسقارما توراعاسى تالعات نارىكباەۆ جانە باسقالار دا بايانداما جاسادى.
سەناتور ۆلاديمير ۆولكوۆ وتىرىستى قورىتىندىلاي كەلىپ سوت جۇيەسىن رەفورمالاۋ جۇمىستارى جالعاسىپ جاتقانىن ايتتى. كوميتەت كەزدەسۋ بارىسىندا ۇسىنىلعان باستامالار مەن يدەيالاردى جان-جاقتى زەردەلەپ, الداعى جۇمىس توپتارىندا قارايتىنىن اتاپ ءوتتى.
