قوعام • 22 قىركۇيەك، 2022

ەرتەڭىنە ەلەڭدەگەن ەل وسەدى

60 رەت كورسەتىلدى

بيىل ەل پرەزيدەنتى قاسىم-جومارت توقاەۆ بالالار جىلىن ­جاريالاعانى ءمالىم. وڭىردە كەلە­شەكتىڭ قامىن ويلاپ قىرۋار شارۋانى قامتىعان ءىس-شارالار ۇتىمدى جۇزەگە اسىرىلىپ كەلەدى.

بالالار جىلىندا كورسەتىلەر قام­قورلىقتىڭ جاي-جاپسارى تارازى باسىنا تارتىلىپ، اتقارىلاتىن جۇمىس جەتى باعىتتا ءوربيتىن بولدى. ارينە، كەز كەلگەن ماڭىزدى ءىس-شارا قىرۋار قارا­جاتتى قاجەت ەتەتىنى بەلگىلى. بۇل وراي­­داعى قاراستىرىلعان قاراجات كو­لەمى دە ايتارلىقتاي. مەجەلەنگەن جوس­پاردى مۇلتىكسىز جۇزەگە اسىرۋ ءۇشىن بار­لىعى 16،6 ملرد تەڭگە ءبولىنىپ وتىر. رەسپۋبليكالىق جانە وبلىستىق بيۋدجەتتەن بولىنگەن قارجى دەنساۋلىق ساقتاۋ، ءبىلىم بەرۋ، الەۋمەتتىك قورعاۋ، سپورت جانە مادەنيەت سالالارىنا جۇمسال­ماق. پرە­زيدەنت پارمەنىنەن كەيىن ەرەكشە ەكپىنمەن قولعا الىنعان سان الۋان جۇمىستار لەگىن ىسكە اسىرۋ ماقساتىندا مەملەكەتتىك ورگاندار جانە ۇكىمەتتىك ەمەس ۇيىمداردىڭ قاتىسۋىمەن وڭىرلىك شتاب قۇرىلىپ، بار جۇمىس جۇيەلەندى. اتاپ ايتقاندا، بيىل قاڭتار-ماۋسىم ايلارى ارالىعىندا ءارتۇرلى فورماتتاعى ­1 608 اۋقىمدى ءىس-شارا ۇيىمداستىر­ىل­سا، بۇل جۇمىس بارىسىندا 485 مىڭ­نان اسا بالا قامتىلعان.

ەندى «جايلى مەكەن» باعىتى بو­يىنشا اتقارىلعان شارۋانى تالداپ كورەلىك. بالالىق شاقتىڭ الەۋمەتتىك ينفراقۇرىلىمىن دامىتۋ ماقساتىندا وبلىستا 25 ءبىلىم بەرۋ، 3 دەنساۋلىق ساقتاۋ، 4 دەنە شىنىقتىرۋ-ساۋىقتىرۋ كەشەنىنىڭ قۇرىلىسى جۇرگىزىلىپ، بالا­لارعا ارنالعان 39 سپورت الاڭى جاب­دىقتالۋدا. قاڭتار ايىنان باستاپ وبلىس ورتالىعىندا ەلىمىزدىڭ بالالارىنا كەشەندى وڭالتۋ كومەگىن كورسەتەتىن ءىرى «قامقور» ورتالىقتارىنىڭ ءبىرى ءوز جۇمىسىن باستادى. ورتالىق بالالاردى مەديتسينالىق، پسيحولوگيالىق جانە الەۋمەتتىك وڭالتۋ قىزمەتىمەن قامتيدى. جىل سايىن بۇل ورتالىق 650-گە جۋىق بالاعا كومەك كورسەتەدى. جىل باسىنان بەرى ستەپنوگور قالاسىندا 3 ايدان 3 جاسقا دەيىنگى ارالىقتى قام­تيتىن «ەرتە ارالاسۋ ورتالىعى» قىزمەت كورسەتە باستادى. بۇل جەردە بالالار كەشەندى وڭالتۋ كومەگىن الادى. ەسەپتى كەزەڭ ىشىندە 5 جەكەمەنشىك مەكتەپكە دەيىنگى ءبىلىم بەرۋ ۇيىمى پايدالانۋعا بەرىلدى. 2022 جىلى زەرەندى اۋدانىنداعى «سۇڭقار» ساۋىقتىرۋ كەشەنى بالالاردىڭ دەمالىسى مەن ساۋىقتىرۋ باعدارلامالارى بويىنشا جۇمىس ىستەدى. بۇل مەكەمەنىڭ بۇرناعى جىلى «قازمۇنايگاز» اكتسيونەرلىك قو­عامى مەنشىگىنەن الىنىپ، وبلىستىڭ كوممۋنالدىق مەنشىگىنە بەرىلگەنىن دە ايتا كەتەلىك. ورتالىقتىڭ جوبالىق قۋاتى – 200 ورىن. تابيعاتى تامىلجىعان وڭىردە ورنالاسقان ورتالىق 140 مىڭعا جۋىق بالانى تىنىقتىردى.

وقىتۋدىڭ زاماناۋي جاعدايلارىن جاقسارتۋ ءۇشىن بيىل التى ءبىلىم وشا­عىن پايدالانۋعا بەرۋ جوسپارلانۋدا. مەكتەپتەر وقۋشىلارعا ەسىكتەرىن ايقارا اشقان كەزدە ءۇش اۋىسىمدىق جانە ورىننىڭ تارلىعى ءتارىزدى وتكىر ماسەلەلەر ءسال دە بولسا سەيىلەدى. وڭىردەگى كەيبىر توزىعى جەتكەن ءبىلىم وشاقتارىن كۇردەلى جانە اعىم­داعى جوندەۋدەن وتكىزۋ شەشىمىن كۇتكەن شارۋانىڭ ءبىرى ەدى. بۇل باعىتتا دا ايتا قالارلىقتاي جاقسىلىق شاراپاتى بار. ماسەلەن، رەسپۋبليكالىق جانە وبلىس­تىق بيۋدجەت ەسەبىنەن 63 ءبىلىم بەرۋ ۇيىمىندا جالپى قۇنى 2،4 ملرد تەڭگە بولاتىن كۇردەلى جانە اعىمداعى جوندەۋ جۇمىستارى جۇرگىزىلدى. وڭىردەگى 551 جالپى ءبىلىم بەرەتىن ءبىلىم وشاقتارىنىڭ بارلىعى جوعارى جىلدامدىقپەن جۇ­مىس ىستەيتىن كەڭجولاقتى ينتەرنەت جە­لىسىنە قوسىلدى. كومپيۋتەرلىك تەح­نيكا­مەن قامتاماسىز ەتۋ جايى دا جاقسارتۋدى قاجەت ەتەتىن. ماسەلەن، ءبىر كومپيۋتەردى ءۇش وقۋشى پايدالاناتىن. بولىنگەن قاراجاتتىڭ ەسەبىنەن بۇل ورايدا دا ىلگەرى جىلجۋ بار. وبلىستاعى ءبىلىم وشاقتارىندا 45 مىڭنان اسا كومپيۋتەرلىك تەحنيكا پايدالانىلۋدا. 205 ءبىلىم بەرۋ ۇيىمىندا روبوتتەحنيكا كابينەتتەرى جابدىقتالعان. ەرەكشە قاجەتتىلىگى بار 10 مىڭنان اسا بالانىڭ جايى ەسكەرىلدى. بۇل ساناتتاعى بالالاردى قولداۋ ماقساتىندا 28 ارنايى ءبىلىم بەرۋ ۇيىمى ۇتىمدى جۇمىس جۇرگىزۋدە. بيىل جاقسى اۋدانىنىڭ قيما ورتا مەكتەبىندە قولداۋ كابينەتى پايدالانۋعا بەرىلدى.

بالالاردىڭ دەنساۋلىعى – باستى نازاردا. بۇل ورايدا «دەنى ساۋ بالا» باعىتى بويىنشا بىرقاتار شارۋا قولعا الىنعان. «سالاماتتى ۇلت» ۇلتتىق جوباسى اياسىندا پاتروناجدىق قىزمەت­تىڭ امبەباپ پروگرەسسيۆتى مودەلىمەن 6 300-گە جۋىق نارەستە قامتىلعان. بۇل – بارلىق بالانىڭ 93،5 پايىزى. سونى­مەن قاتار بيىل قاجەتتى مەديتسينا­لىق جاب­دىقتاردى ساتىپ الۋعا 339 ملن تەڭ­گە قاراجات قاراستىرىلدى. جاڭادان مەدي­تسينالىق قۇرال-جابدىقتار الىندى. جەتى اي ىشىندە پروفيلاكتيكالىق تەكسەرۋدەن 47 845 بالا وتكىزىلدى. جۇرگىزىل­گەن جۇمىس ناتيجەسىندە دەنساۋلىعىندا اقاۋى بار 395 بالا ديسپانسەرلىك ەسەپكە الىندى. ورفاندىق ءدارى-دارمەكتى ساتىپ الۋعا 312 ملن تەڭگە قاراجات ءبولىندى.

«بالا قورعاۋ» باعىتى بويىنشا دا جۇيەلى جۇمىس قولعا الىنعان. بالالار مەن مەكتەپكە دەيىنگى ءبىلىم وشاقتارىن­­­دا جۇمىس ىستەيتىن قىزمەتكەرلەردىڭ قا­ۋىپ­سىزدىگىن قامتاماسىز ەتۋ ماقساتىن­دا بارلىق ۇيىمدى بەينەباقىلاۋ جۇ­يەسىمەن جابدىقتاۋعا بيۋدجەتتەن قو­ماقتى قاراجات ءبولىندى. شالعايداعى شاعىن ەلدى مەكەندەردە تۇرىپ جاتقان مەكتەپ وقۋشىلارىن وزگە اۋىلداعى ءبىلىم وشاقتارىنا تاسىمالداۋ ءۇشىن جال­پى قۇنى 366 ملن تەڭگە بولاتىن 65 كولىك ساتىپ الىندى. 207 ەلدى مەكەننىڭ 5،5 مىڭنان اسا وقۋشىسىن تاسىمالداۋ كەزىندە قيىندىق تۋمايدى. از قامتىلعان وتباسىلاردىڭ 15 مىڭنان استام مەكتەپ وقۋشىسىن الەۋمەتتىك قولداۋ ءۇشىن تە­گىن مەكتەپ فورماسىمەن قامتاماسىز ەتۋ ۇيعارىلعان. بۇل ءىس-شارانى جۇزەگە اسىرۋ ءۇشىن 692 ملن تەڭگە ءبولىندى. بۇگىن­گى تاڭدا 1-سىنىپتىڭ 15 074 وقۋشىسى جانە حالىقتىڭ الەۋمەتتىك جاعىنان از قام­تاماسىز ەتىلگەن وتباسىلاردىڭ 15 مىڭ­عا جۋىق بالاسى تەگىن ىستىق تاماق­پەن قامتاماسىز ەتىلىپ وتىر. بۇل ماقساتقا 3،6 ملرد تەڭگە كولەمىندە قا­را­جات بولىنگەن.

وڭىردە 3 151 مۇگەدەكتىگى بار بالا قامقورلىق اياسىنان تىس قالعان جوق. وسى ساناتتاعى 388 بالا ارناۋلى الەۋ­­مەتتىك قىزمەتپەن قامتىلعان، 204 بالا ءۇي جاعدايىندا ءبىلىم الۋدا. ۇيدە وقي­تىن بالالاردى ماتەريالدىق جاعى­نان قامتاماسىز ەتۋ ماقساتىنا ارنايى قارا­­جات ءبولىنىپ وتىر. جىل باسىنان باس­تاپ بۋرا­باي، تسەلينوگراد اۋداندارى مەن قوس­شى قالاسىندا الەۋ­مەتتىك وڭالتۋ ورتا­لىقتارى اشىلدى. كوكشەتاۋ قالاسىندا ارناۋلى الەۋ­مەت­تىك قىزمەت كورسەتۋ ورتالىعى جۇمىس ىستەيدى.

جەرگىلىكتى وكىلەتتى ورگانداردىڭ شە­شىمىنە وراي اي سايىن ايتۆ ينفەك­تسياسى بار 13 بالاعا ەڭ تومەنگى كۇن­كورىس دەڭگەيىنىڭ ەسى ەسەلەنگەن مولشە­رىن­دە الەۋمەتتىك كومەك كورسەتىلەدى. بۇگىن­گە دەيىن 3،7 ملن تەڭگە تولەندى. قالا­لىق باعىتتاعى جولاۋشىلار كولىگىن­دەگى 1 371 كوپبالالى انا مەن كوپ­بالا­لى وتباسىلاردان شىققان بالالار­دى جەڭىلدىكپەن جول ءجۇرۋىن قامتاماسىز ەتۋ ماقساتىندا وبلىستىق بيۋدجەتتەن 41،5 ملن تەڭگە ءبولىنىپ وتىر. ءاۋتيزمى بار بالالاردى الەۋمەتتىك بەيىمدەۋ جانە پسيحولوگيالىق، پەداگوگيكالىق سۇيەمەلدەۋ ءۇشىن دە وبلىستىق بيۋدجەتتەن 35،5 ملن تەڭگە باعىتتالعان. كامە­لەتتىك جاسقا تولماعاندار اراسىندا قۇقىق بۇزۋشىلىقتىڭ الدىن الۋعا باعىتتالعان الەۋمەتتىك-قۇقىقتىق قىز­مەتتەردى كورسەتۋ ءۇشىن 4،5 ملن تەڭگە قا­راجات قاراستىرىلدى.

قيىن ومىرلىك جاعدايداعى بالا­لار­دى الەۋمەتتىك-پسيحولوگيالىق-پەدا­گو­گيكالىق سۇيەمەلدەۋدىڭ كەشەندى جۇ­يە­سىن قالىپتاستىرۋ ماقساتىندا وب­لىس­تىق بيۋدجەتتەن 3،9 ملن تەڭگە ءبولى­نىپ وتىر. بالالاردىڭ قوسىمشا بىلىم­مەن قامتىلۋى دا – نازاردا. بۇل باس­­تاما اياسىندا 12 مىڭعا جۋىق بالا شىعار­ما­شىلىق ۇيىرمەلەرمەن جانە ارقيلى سەكتسيالارمەن قامتىلعان.

اۋداندار مەن قالالاردىڭ ورتالىق كوشەلەرىندە بالالار جىلىنىڭ لوگوتيپى بار 36 باننەر ورناتىلعان. كوز سالىپ قاراعان ادام ەل بولاشاعىن ەسكە الادى. بولاشاقتىڭ قۇنداعىن جاناشىرلىق لەبىمەن جىلىتىپ، ۇلى كوشتىڭ بو­يىنداعى ۇرپاقتىڭ جاز گ ۇلىندەي جايناپ وسۋىنە جاسالىپ جاتقان قىرۋار جۇمىس­تىڭ ءبىر پاراسى وسىنداي.

 

اقمولا وبلىسى

سوڭعى جاڭالىقتار

ءرۋبلدى ساتىپ الۋ 31%-عا ءوستى

ەكونوميكا • بۇگىن، 15:23

ۇقساس جاڭالىقتار