ماسەلەن, بۇرىن ءاربىر شاعىن اۋىلدىڭ وزىندە مەديتسينالىق پۋنكت جۇمىس ىستەپ, ناۋقاسقا شالدىققان ادامدارعا العاشقى مەديتسينالىق-سانيتارلىق قىزمەتتى كورسەتۋشى ەدى. وكىنىشكە قاراي, ۇكىمەت «قازاقستان رەسپۋبليكاسىنىڭ دەنساۋلىق ساقتاۋ ۇيىمدارى جەلىسىنىڭ مەملەكەتتىك ءنورماتيۆىن بەكىتۋ تۋرالى» 2009 جىلعى 9 ساۋىردەگى №494 قاۋلىسىمەن اۋىلدىق ەلدى مەكەندەردەگى دەنساۋلىق ۇيىمدارىن «وڭتايلاندىرۋدى» ءجون دەپ شەشكەن. ءسويتىپ تۇرعىندارىنىڭ سانى 800 ادامعا جەتپەيتىن شاعىن اۋىلدارداعى مەديتسينالىق پۋنكتتەردىڭ ءبىرسىپىراسى جابىلدى. ال ءبىرازىندا قىزمەت ىستەپ تۇرعان فەلدشەرلىك-اكۋشەرلىك پۋنكتتەر قىزمەتكەرلەرىنىڭ سانى قىسقارتىلىپ, مەديتسينالىق پۋنكتتەرگە اينالدىرىلدى. حالقىنىڭ سانى 2 مىڭ ادامعا جەتپەيتىن اۋىلدارداعى دارىگەرلىك امبۋلاتوريالاردىڭ شتاتى دا «قايشىعا ءىلىنىپ», فەلدشەرلىك-اكۋشەرلىك پۋنكتتەر بولىپ قايتا قۇرىلدى. سونداي-اق تۇرعىندارىنىڭ سانى 10 مىڭ ادامعا جەتپەيتىن اۋىلدىق ەلدى مەكەندەردەگى اۋرۋحانالاردىڭ دارىگەرلەرى دە قىسقارتۋعا ۇشىراپ, مۇنداي دەنساۋلىق ساقتاۋ ۇيىمدارى دارىگەرلىك امبۋلاتوريالار رەتىندە قالدىرىلدى. وسىنداي ەۋروپالىق ستاندارتتارعا ساي «وڭتايلاندىرۋ» حالىق دەنساۋلىعىنا تەرىس اسەرىن تيگىزگەنى انىق. اسىرەسە قىسى قاتال سولتۇستىك وڭىرلەردە قاتتى بوراندى كۇندەرى جولدار جابىلىپ, «جەدەل جاردەم» كولىكتەرى وتە الماي قالاتىندىقتان, دارىگەرى جوق اۋىلدارداعى تالاي ناۋقاس دەر كەزىندە ءتيىستى مەديتسينالىق كومەكتى الا الماي قينالىپ, دەنساۋلىق جاعدايىن ناشارلاتىپ العانى, ال قايسىبىرى ءجانتاسىلىم بولعانى جاسىرىن ەمەس.
بۇدان ءتورت جىلداي بۇرىن قاراعاندى وبلىسىنىڭ شالعايىنداعى شەت اۋدانىنىڭ اقجال كەنتىنە جولىمىز تۇسكەن ەدى. سوندا جەرگىلىكتى تۇرعىندار 4 مىڭ ادام تۇرىپ جاتقان كەنتتەگى اۋرۋحانا قىسقارتىلىپ, دارىگەرلىك امبۋلاتورياعا اينالدىرىلعانىنا ۇلكەن رەنىش بىلدىرگەن. سەبەبى ولار ابدەن توزىعى جەتكەن جالعىز «جەدەل جاردەم» كولىگىمەن ماشاقات شەگىپ, اۋدان ورتالىعى مەن بالقاش قالاسىنداعى اۋرۋحانالارعا بارىپ ەمدەلۋگە ءماجبۇر بولىپ ءجۇر ەكەن. ولار جابىلىپ قالعان اۋرۋحانانى قايتادان اشۋعا, تىم بولماسا ناۋقاستاردى تاسىمالداۋعا ىڭعايلى زاماناۋي رەانيموبيل بولۋگە كومەكتەسۋىمىزدى سۇراعان. اقجالدىقتاردىڭ وسى مۇقتاجدىعىن كەيىن سول كەزدەگى وبلىس اكىمى ەرلان قوشانوۆقا جەتكىزگەنبىز. ول اقجال كەنتىندەگى دارىگەرلىك امبۋلاتوريانى رەانيموبيلمەن قامتاماسىز ەتۋ ماسەلەسىن بىردەن شەشىپ بەرگەن-ءدى. ال بۇرىنعى اۋرۋحانانى قالپىنا كەلتىرۋ دەنساۋلىق ساقتاۋ مينيسترلىگىنىڭ قۇزىرەتىندە ەدى.
مەملەكەت باسشىسى قاسىم-جومارت توقاەۆ «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىندا: «مەديتسينالىق ينفراقۇرىلىمدى كەشەندى تۇردە جاقسارتۋعا باسا نازار اۋدارۋ كەرەك... مەن كەلەسى جىلدان باستاپ ۇلتتىق جوبانى جۇزەگە اسىرۋدى تاپسىردىم. بۇل قۇجات, ەڭ الدىمەن, اۋىل تۇرعىندارىنىڭ سۇرانىسىن قاناعاتتاندىرۋعا ارنالعان.
بۇگىندە ەلىمىزدەگى 650 ەلدى مەكەندە ەمدەۋ مەكەمەسى جوق. الداعى ەكى جىلدا بۇل اۋىلداردا مەديتسينالىق جانە فەلدشەرلىك-اكۋشەرلىك بولىمشەلەر سالىنىپ, قاجەتتى قۇرال-جابدىقپەن تولىق قامتاماسىز ەتىلەدى. وسىلايشا, مەملەكەت ءبىر ميلليوننان استام ادامنىڭ العاشقى مەديتسينالىق-سانيتارلىق كومەك الۋىنا مۇمكىندىك جاسايدى», دەدى. پرەزيدەنت ايتقان 650 اۋىلدىق ەلدى مەكەننىڭ العاشقى مەديتسينالىق-سانيتارلىق كومەك كورسەتەتىن مەكەمەسىز قالعانى – ۇكىمەتتىڭ جوعارىدا اتالعان قاۋلىسىنىڭ سالدارى. ونى دايىنداعان دەنساۋلىق ساقتاۋ مينيسترلىگىنىڭ شەنەۋنىكتەرى – «اسفالتتا وسكەن» ءھام ەۋروپادا ءبىلىم العان ماماندار بولار. ولاردى مينيسترلىككە جاۋاپتى قىزمەتكە تاعايىنداماس بۇرىن اۋىلدىق جەرلەردەگى دەنساۋلىق ساقتاۋ ۇيىمدارىنا جۇمىسقا جىبەرىپ, ناقتى ءومىر شىندىعىن كورسەتىپ الۋ كەرەك ەدى, ارينە...
